朱千雪 醫生男友門當戶對
12年港姐季軍朱千雪，有樣有家底兼有學歷，身邊不乏追求者，不過，近日千雪就被爆有個在澳洲讀醫的男友Justin Ng，男方同樣家底豐厚，父親是老牌茶莊「祺棧茶行」老闆，五年前更在香格里拉集團做執行董事，同千雪屋企人係世交，可謂門當戶對！據知千雪同Justin識咗好耐，佢不時會趁放假飛去澳洲探醫生男友，同男友屋企人一樣好friend，吳父都認定咗千雪係新抱仔，成日想個仔可以快啲娶女神入門！
朱千雪近日為美容院擔任代言人，日前就專登去做脫毛扮靚靚，蜜運中的千雪，唔知係咪因為心情靚食多咗，近日就心曠體胖，連塊面都圓碌碌。雖然有家底，但生活好平實，去完美容院脫毛，就去超市買飲品！
大方談醫生男友 朱千雪：我會結婚！
朱千雪接受東方新地記者訪問，被問到有冇拍拖，佢話感情事就順其自然，但依家時間唔夠，見面同拍拖都要就時間。提到佢有個醫生男友Justin Ng，千雪甜笑承認：「開名呀！ Justin係好男仔嚟嘅！（做醫生？）係！佢好忙！我都好忙！順其自然啦！（合唔合你杯茶？）合拍嘅！（有冇見家長？）我哋識咗好多年，係family friend嚟！見佢屋企人仲多過見佢！識咗好多好多年，所以先會熟嘅！（幾時會結婚呀？）我會結婚嘅！但唔會諗幾時囉！」首度開腔確認醫生男友地位！
