英足總宣布,曼聯後備門將湯希頓加入英格蘭歐國盃大軍,擔任陪練員,幫手陪3位門將練波,同時為球隊帶來正能量。
英格蘭國家隊官方表示,38歲嘅湯希頓將隨隊遠征德國,為3位門將比克福特、蘭斯達爾及甸恩軒達臣提供支援。英格蘭領隊修夫基表示:「好開心湯希頓同我哋一齊前往德國,佢會喺訓練場上發揮寶貴嘅作用,為3位門將提供幫助。」
修夫基又提到:「我哋同湯希頓私下相熟,佢會為球隊帶來正能量,好多謝曼聯對球隊嘅支持。」
湯希頓近年已甚少上陣,重返曼聯後成為吉祥物,但佢曾於2016同17年入選英格蘭3次,亦隨隊出席過2016歐國盃同2019歐國聯,最近佢成為曼聯首批宣布留隊球員之一,今次獲英格蘭徵召入隊,曼聯官網都有出稿聲援,可見佢人緣確係好。
英格蘭想仿效日本隊? 猥瑣佬坐場邊,隊友龍咁堅,猥瑣佬始終都係歷史最強吉祥物,係GOAT,湯希頓得唔得阿?