陳嘉佳為記錄減肥成果，每個時段都會影低當時的身形，成功搣走之前體重的一半共143磅的她，着上黑色連身阿婆泳衣更加顯瘦，配上奀瘦手腳，視覺上將整個人拉長，好彩保得住上圍，3吋深坑事業線好突出。不過細細粒仍未滿意，嫌自己仲係好「大隻」，生日前未去到24腰及132磅：「現階段最開心見到成世女冇見過嘅完美下顎線；而且上圍又唔算好縮水，減肥後仲保持有E cup㗎，都唔錯。」
快速激減皮膚鬆又皺
細細粒表示會再減多少少，做啲力量型運動去收靚身形：「𠵱家冇乜上磅，唔係追數字而係追線條，的確減咗太多喇，啲皮又鬆又皺，暫時唔敢着比堅尼，就算最新三圍數字36E、29、36都未係最準確，因為啲皮層佔好多吋數，要收緊晒啲厚皮先度得啱。𠵱家我着緊人生第2條長牛仔褲，係買28吋褲頭，不過，我新陳代謝快，好大汗又怕熱，焗住雙腿感覺唔太好。」她指減咗10個月學會節制食量，飲食習慣已打回原形，雪糕、炸雞、澱粉質(只能佔30%)乜都食，食完翌日再減量。
唔介意被批身形古怪
對於減肥後被笑頭大身細腳又幼，身形古怪如卡通人，細細粒零介懷更風騷說：「傻豬，腳瘦咪仲靚，好彩腳幼咋，否則點覺得我有瘦過呀？唔好咁介意別人嘅眼光啦，係為自己而活嘅。6月我開始做運動，希望條腰瘦啲，咁樣就會更突顯三圍。其實條腰肥咗咁多年，邊得咁易瘦吖？」至於有冇覺得減磅後索咗？她笑言：「都39歲人啦仲靚乜鬼，不過，精神好咗，面色好好，冇論論盡盡，而且會少咗啲尷尬事，如去服裝店得唔到service，售貨員睇死你買唔到嘢。」她又突爆陳年不公平事件，「細個同朋友一齊食飯，話我大食要夾多份錢。」
售健康產品收入大減
另外，細細粒坦言減肥後，做直播帶貨收入明顯少咗：「要顧及跟緊我減肥嘅人，怕佢哋會誤解，以為減肥時可以食零食，所以唔會推售雪糕、薯片、朱古力，只能出售零糖低脂嘅健康產品，選擇種類受到局限，而且反應一定冇食播咁好。」她估計最快明年就可以恢復Sell零食，「到時跟我減肥嘅都應該減到，暫時搵少啲唔緊要啦，又唔係樣樣睇錢，呢一年分享我嘅健康生活都幾正能量，所以近期開咗『細細粒健康生活官方網店』，分享食開嘅健康產品及減肥進展，希望有多啲follower，幫到決心減肥嘅人。」至於39歲生日願望會否想搵另一半？她強調仲有好多目標未達成：「王祖藍講咗幾年話做媒，佢有筍盤會介紹，緣份天注定，不可強求，我反而想好好做事，事業更上一層樓，最開心喺40歲前完成咗一個心願：『嘩！細細粒都可以瘦喎！』係呀！我真係做到喇。」
https://std.stheadline.com/realtime/article/2000644/%E5%8D%B3%E6%99%82-%E5%A8%9B%E6%A8%82-%E7%B4%B0%E7%B4%B0%E7%B2%92%E5%96%AA%E6%B8%9B143%E7%A3%85%E5%85%AC%E9%96%8B%E6%B7%B1%E7%BD%85%E6%B3%B3%E8%A1%A3%E7%85%A7-%E6%9C%89%E8%85%B0%E6%9C%89%E8%83%B8%E6%90%B5%E5%88%B0%E9%8C%A2%E7%AD%89%E7%8E%8B%E7%A5%96%E8%97%8D%E4%BB%8B%E7%B4%B9%E7%AD%8D%E7%9B%A4%E4%B8%A8%E7%8D%A8%E5%AE%B6
