傷兵多係戰績差既藉口還是真係重要原因？

傷兵多係戰績差既藉口還是原因？

英超今季告一段落，曼城最終順利奪得冠軍，阿仙奴就要下季再努力。今季好多球隊都受傷兵困擾導致成績下滑，究竟傷兵多係成績下降既藉口還是原因？

傷兵之最-車路士》

車路士傷兵最嚴重，全季總共有54次受傷，球員因受傷而缺乏比賽既場數有309場，最後球隊以第六名完成賽季。雖然佢地傷兵超多，但唔好忘記佢地既陣容深度超深，一隊總共有30個成員。就算傷得多，但都肯定有人可以頂上，唔駛出動青年軍。

正選門將山齊士下半季受傷，所以二號門將柏杜域頂上。中堅方面，科芬拿全季倦勤；查洛巴上半季受傷，但佢地仍有迪沙斯、高維、泰亞高施華、沙亞同傷下踢下既巴迪舒利輪換。左閘捷維爾傷左大半季，仍有古古尼亞同馬迪輪換。右閘列斯占士接近整季缺陣，仍有古斯度頂住。中場方面，拉維亞、尼干古同卓古麥卡全季受傷，仍有加拉加、安素、沙斯度 同彭馬輪換。中前場積遜、史達寧、梅迪歷同馬度亞基都冇乜受傷，四個人輪三個位踢。

車路士球員一傷多數都係接近收咧，反而好少踢兩場傷兩個月無限loop既情況，所以陣容既變動唔會太多。加上今季佢地冇歐洲賽踢，一周一賽下，加人一隊人數本身過剩，係多傷兵但影響唔算好大，反而咁樣正選陣容可以固定，人腳上未必係最勁，但唔駛得閒出下A君轉頭又用B君，陣容穩定開始有默契同開始知領隊要點踢之下，季尾就愈踢愈有貨，最後成功第六衝線。

紐卡素跌出歐聯資格》

紐卡素上季排第四，今季球隊要兼顧歐聯外，同樣飽受傷兵困擾。球隊全季有38次受傷，球員因受傷而缺乏比賽既場數有258場，最後球隊以第七名完成賽季，暫時失去下屆歐洲賽事資格。

門將樸比季中受傷抖左廿場，二號門將杜巴卡頂上。中堅方面，博文係季初傷左9場，當時球隊既舒亞同拿沙利斯係健康，到季中博文復出，球隊就可以用番正選中堅拍檔。到季尾，博文同拿沙利斯同告受傷，所以中堅位置要用丹般同舒亞頂住。泰格由第十一周賽事已經收咧，丹般同賀爾輪流踢。泰格本身都只係一個替補，對紐卡素既影響唔算太大。右閘查比亞係季尾先傷左8場，除左有利華文圖頂住，都仲有個卡夫治可用。中場傷兵較為嚴重，韋洛克接近全季受傷，只得甘馬雷斯全勤。祖寧頓由21周開始傷到35周，而小將美利亦係第29周開始傷，所以季尾開始紐卡素既中場得番甘馬雷斯同朗史達夫，被逼起用小將安達臣踢。前鋒卡林威爾遜踢下傷下，得番伊薩擔大旗。積及梅菲同哈菲班尼斯係季中傷左十場、幸好艾米朗同哥頓都健康，所以前場既陣容未算好天殘地缺，季尾幾個攻擊手都回歸，賀維仲有得揀下添。

雖然紐卡素受傷兵困擾，特別係中場方面，但整條中軸龍脊既人腳仍然係度，舒亞、甘馬雷斯同伊薩都大部分時間有踢，起碼保得住下限。去到季尾人腳番黎就贏多輸少。多左歐聯賽事兼顧，所以球隊傷兵多左，可能係疲勞度累積，都可以理解。紐卡素成績都不及上季，唔通傷兵只係藉口？

曼聯天殘地缺？》

曼聯上季排第三，今季卻以第八名完成。全隊全季有35次受傷，球員因受傷而缺乏比賽既場數有233場。數字上佢地比紐卡素同車路士少，但戰績影響最大。當中究竟有冇分別？

門將安拿拿今季全勤，不過首季登錄英超要適應，下半季佢既穩定性明顯有進步。中堅方面，上季既主力馬天尼斯踢左頭五場就傷左，抖左15場後僅復出左3場就又傷左10場，基本上佢近乎全季休息。華拉尼踢完頭三場波之後又抖左兩場，跟住都係踢後備多，到季尾又受傷抖左7場，麥佳亞已經算踢得最多，但係季中都傷左5場，而季尾佢都係要休左4場波。連迪路夫則同麥佳亞接近同時受傷，而季尾直頭復出唔到。曼聯有一段時間係正選加輪換中堅都出唔到兩個，要勞煩老將伊雲斯同小將甘華拿頂上。左閘馬拿斯亞全季倦勤；梳爾只係踢左12場咁大把，季尾13場波係冇左閘，要用連迪路夫、達洛治、雲比沙加甚至安拉拔去客串。右閘達洛治神奇地整季踢足；雲比沙加有12場係受傷踢唔到，變左球隊有唔少時間係冇閘可用。去到季尾，曼聯甚至要用卡斯美路踢中堅拍住伊雲斯。

中場方面，卡斯美路踢左頭8場波就受傷，一抖就抖左12場；明奴一開季就傷左9場；曼治僅踢左2場就傷左4場，然後踢左6場就傷左16場，基本曼治只踢左三分一球季；中場三個位只得番麥湯文尼、般奴費南迪斯、安拉拔同艾歷臣頂住。

前鋒方面算少人傷，華舒福同加拿祖都全勤，但係辛祖因個人問題冇踢兼借走；迪亞路開季又傷左19場，到季尾先開始踢番；安東尼雖然有踢但身陷家暴事件而缺乏狀態，右翼位置基本只靠加拿祖一個踢晒。前鋒海倫要適應；馬斯亞踢左16場就一傷傷到尾，所以當海倫間中都受傷果陣，球隊係冇前鋒可以用，只能擺無鋒陣或者局推福仔踢箭頭頂住。

雖然一眾球員冇紐卡素傷咁長時間、但同紐卡素唔同既係，曼聯既中軸線球員傷得多，仲要係同時間一齊傷。上季中軸鐵三角馬天尼斯、華拉尼同卡斯美路係今季一齊出既時間多唔過6場，而中堅組合更多達14種。左閘位置亦長時間缺乏正宗左閘。唔講替補球員級數夠唔夠，要傷到搵中場改去踢中堅，中場踢左閘，右閘打中場，咁樣轉黎轉去已經轉到暈左。

總結》
除左呢三隊外，賓福特同利物浦亦係其中一份子，賓福特由上季第九跌到去第十六；利物浦則有高普效應，仍然企到第三，算係咁傷兵隊之中既奇疤。頭五隊當中有三隊係聯賽既排名都下跌，小弟亦都簡作左分析，究竟傷兵因素係球隊踢得差既藉口還是原因，就等各球迷自行判斷！

無啦？