Before (唔記得同一燈光影 但冇P過 iPhone前置直出~)
Now
首先講結論:
暫時睇效果係有效嘅 但洗咗3萬幾蚊(手術+一支童顏針)
個人嚟講唔特別推薦激光去眼袋手術
針對於好似我咁因為夜瞓而黑眼圈重同有淚溝嘅人 推薦打針多啲啲 但打針要兩三年就返去打~
大家可以自行決定 但唔建議我去嘅果間診所~
總結原因懶人包:
* 手術話係用激光 創口好細 但康復期短極都要兩星期(頭一個星期係完全唔見得人嘅瘀同腫 *下面補圖)
* 手術期間同之後兩三日都有明顯嘅痛感 就效果嚟講唔覺得值得貼錢買難受!
* 價錢唔平 (學生真係唔好諗~)
* 點都要加其他針劑/療程先有效
結論講完講真人經驗 長文分享:
我係2024年4月喺旺角嘅一間美容診所做
(個人對間診所嘅感受唔良好 會喺下面偷偷地開名)
Q1 激光去眼袋體驗分享
因為個staff 同我講 個手術係一個好細嘅手術
通常一星期就好 後生嘅三日到都消腫and瘀
但講緊其實我廿頭 都兩個禮拜先消哂腫同瘀! (都未計我角膜出血 啫係眼微絲血管爆 啲瘀血要多個禮拜先消到)
手術當日先會講手術嘅風險!
想知間嘢sell我俾錢嘅時候點解一句都冇提過
雖然我都同意手術風險好細 但你講到明唔會退錢亦冇得轉讓
做手術前果下先同我講有咩風險 就算風險大我都局住食㗎啦~
聽完就去一間休息室食藥
由我食藥後半小時合埋眼 再有意識就已經開始緊做第一隻眼
只可以話絕對唔係唔痛!
lazer就唔痛 只會聞到啲燒肉味 但其他例如攞啲脂肪出嚟果啲動作 其實會令眼眶位鈍痛
我係咁biu眼水同埋好想個醫生停一停手俾我緩一緩
會有個staff㩒住你同埋講「冇事㗎 忍一忍」
手術體感時間係15-20分鐘一隻眼 唔知實際幾耐
因為我都係中途先恢復意識 會建議大家帶個friend陪一陪你!
因為果個喺休息室失去意職再醒返就喺手術室嘅感覺係會好令人panic的
手術完咗會俾你睇返啲清咗出嚟嘅脂肪
之後就返休息室敷冰 敷完簽字拎藥就走得
做完手術返休息室敷冰
敷完冰搭車走
返到屋企要墊高個頭 避免充血 先冷敷消腫 後熱敷散瘀
頭幾日盡量唔洗頭同唔好洗面 我淨係用生理鹽手抹一抹執面啲油
同埋最好戒下口 唔好食辣/炸嘢(我應該就係冇戒口所以有準時食消炎藥都第三日發咗一日燒)
頭幾日傷口會keep住滲啲血
第一晚可以用紙巾印一印 因為血量都多
第二日開始就可以用獨立包裝棉花棒同生理鹽水慢慢抹走啲血
記住準時食藥滴眼藥水避免發炎/感染
但我想講診所俾嘅眼藥水我覺得係一少少刺眼
我後尾消腫後喺藥房再配咗眼藥水 果隻就感覺好好多~
連登擺相有啲難 詳細康復圖可以去依個post睇:
https://www.baby-kingdom.com/forum.php?mod=viewthread&tid=23742373&fromuid=3508526
康復期有相睇係真係頭一星期都見唔到人
根本唔係咩一個星期/幾日會搞得掂!
同埋如果好似我咁有結膜出血 就會眼白變血紅色 都幾恐佈! 要兩個星期先慢慢自己吸收返哂!
大家想做又唔想好明顯俾人知做咗手術就要預起碼一星期嘅假期先好做~
Q2童顏針體驗
因為要等手術創口恢復先可以打針
到我幾個星期後 再返返去診所 一入到去首先會被輕輕力sell 你話唔要佢都唔會堅持(等你打完先會大力sell~)
會先幫你喺休息室敷麻藥 麻藥敷咗成45分鐘 (中間啲staff會自出自入喺個休息室搵嘢~)
敷完個眼袋位係痺到冇乜知覺
跟住入手術室醫生會同你講你依家會做啲咩 大概會腫幾日 打完針要按摩
會喺你面前溝鹽水落個童顏針到(因為原本係粉狀的)
打果陣會有啲冤痛 但係可接受嘅
打完即時
過程都快 打完即時腫 因為鹽水要時間吸收
但個腫唔係打R6咁淨係個眼袋位腫出嚟
係會整體蘋果肌突出嚟咁腫 同埋係好快散
like我做完去睇九龍城寨再返屋企 大概幾個鐘頭到就望落正常哂
打完後四個鐘頭到
就依支童顏針嚟講
打完好快就恢復同明顯改善到淚溝同黑色素嚟講
我係推薦的 但大家要自己搵啱診所做!
Q3 點解對間嘢觀感咁差?
本身預約果陣見間嘢好透明 就咁whatsapp會同你講明價錢($19xxx)
少少背景for大家ref 我有用line諮詢過一個台灣整容醫生
佢睇完覺得我可以做眼袋內開+補脂 total係75000台幣 做完手術七日後覆診拆線
三個月內醫生會跟進脂肪存活率再睇下要唔要補脂 補脂再另計 但會平啲 around 5000-8000台幣
但又要機票酒店 價錢上唔算太值得突登飛去做
就咁睇價錢上香港做好似都差唔多 所以上咗去諮詢諗住睇下點
但實際上係冇「諮詢」可言
因為你唔會有咩檢查/見到醫生 只有個staff sell 你
話間嘢嘅老板就係醫生 「依啲美容手術好睇手勢」「 太平都冇人信啦」「咩眼袋問題都啱做依個手術」「後生做就啱㗎啦」
同埋要另外加打針或者做機先有效
同埋會俾啲相你睇話人地都係好似我咁後生就做 「佢都做咗咩咩咩療程」
但其實個staff係唔會主動去講療程係做啲乜點樣做 打針都係冇講打咩針 或者支針要打幾多次
要你去問 問都會答得好模糊
如果本身對醫美冇咩知識就會好似我咁連要問啲咩都諗唔到
再加上會逼你即場俾錢約時間 話淨係依家先係咁嘅價位 唔俾考慮嘅時間你
咁事前冇做功課嘅我幾句就俾人sell咗碌卡
其實依啲美容地方sell就緊
重點係本身佢sell我額外打支針係講話要$18000
跟住我話 唔啦太貴啦
佢就減到$12000
啫係其實佢果度係海鮮價
完全唔洗做啲咩 個staff自己就可以幫你減$6000~
最後到我手術後一個月返去打針果陣
除咗會即時叫我喺佢面前whatsapp打返好評俾佢外
又同我講「依個童顏針係要一個療程打三樽㗎 你淨係買咗一樽 你不如買多兩樽?」
我聽到果下真心WTF $12000 原來係得個療程嘅1/3
同埋如果係要打三針先有效 咁點解你會咁樣分開俾人買?
跟住我話太貴了我負擔唔到 佢話你之前買咗一針 可以平啲俾你 $10000一樽
然後我話我都係冇咁多錢 佢就話可以$8000一樽 又俾啲案例我睇
但其實佢上次有同我講過同一個案例但同上次講嘅嘢完全唔同
果陣講話佢係做咗六次機消到黑眼圈
但個staff自己上次9up完都唔記得 又拎返依個案例同我講話人地打咗三針先消到~
再講兩講就話$6980 件事不停海鮮價式減價令我對間嘢超冇信心
然後我偷偷地手機search 其實童顏針價位只係$4-5000一針 有啲再平啲添
(只係急急腳查一查個價位 有錯請講)
其實我之後都有reseach返 順便俾大家睇下唔同針劑嘅分別
which依啲喺果個人sell我打針果陣係完全冇講過
亦冇問過我想揀打咩針
(咁我乜都唔知走上去 好易會係咁俾人幫你決定哂 我都冇得怪人 只係我覺得佢地可以做好啲囉)
P.S 童顏針係真係要打三次的 但我會寧願搵其他地方打都唔會再喺到洗錢~
再P.S 醫生手勢我覺得係冇問題的
如果你地覺得唔驚sell同海鮮價
可以自行決定去搵依個醫生~
再另外講多少少點解我會咁樣長文打術後感
一嚟係我自己當初想做果陣係冇搵到香港有詳細嘅文章講醫美
一係一睇就知打手feel 一係就係大家都一知半解咁
同埋好多post都會係幾年前 冇咩參考價值
但其實大家喺Dcard會睇到好多台灣人會好詳細講自己嘅醫美體驗去幫其他人
希望我依個post可以幫到多啲人了解返 同做到自己想做嘅treatment
有咩都可以留言問我 我見到又答到會盡答