拜仁搵教練搵到去水晶宮 但再食檸檬
拜仁慕尼黑尋找新主帥不斷碰壁,最新一位人選係水晶宮奧地利籍領隊格拉斯拿,佢今年初接手水晶宮之後,球隊表現脫胎換骨,吸引拜仁注意,不過格拉斯拿會繼續留喺水晶宮,唔會離隊。
《德國天空體育》報道,拜仁睇中49歲嘅格拉斯拿,皆因呢位奧地利教頭有執教德甲經驗,曾擔任禾夫斯堡同法蘭克福主帥,21至22年協助法蘭克福奪得歐霸盃冠軍,因此有意聘請呢位少帥接掌拜仁教鞭。
格拉斯拿上季離開法蘭克福,休息半季,今年2月接手執教水晶宮,雖然英超有「榜尾3寶」墊底,一路唔使驚降班,但水晶宮喺佢改造下近期大爆發,包括上月中作客擊敗利物浦,終結紅軍晏菲路球場29場不敗紀錄,最近又大炒曼聯4蛋,近6場5勝1和走勢強勁,吸引拜仁注意。
據報格拉斯拿無意離隊,繼續執教水晶宮,亦即拜仁再被拒絕。拜仁自宣布杜曹季尾離隊後,尋覓新帥處處解礁,先後有沙比阿朗素、拿高斯文、蘭歷克、施丹、哥迪奧拿等5位名帥請拜仁食檸檬,格拉斯拿係第6個。