好驚自己有一日會爆煲（長文）

老豆喺我6歲個年就過咗生，由細到大得我同老母相依為命，所以我哋感情都算幾好

咁老豆走咗之後佢就被逼出嚟返工頂起頭家，佢係大陸人嫁過嚟香港，廣東話講得唔好，加上佢轉數唔快，佢係職場成日被人恰，另外老豆果邊啲親戚都唔係好鐘意佢，有啲歧視佢，講嘢成日有骨

我記得大約係我小三嘅時候，佢工傷整傷條腰左，搞到要做手術，係冇左穩定收入嘅情況下，佢壓力更大，最後搞到抑鬱症（後尾大個啊媽果邊親戚同我講先知），咁之後就一直冇返工，靠老豆之前啲保險同佢啲積蓄生活。

佢日日屈係屋企，慢慢開始有啲被害妄想，有時對住空氣講野，話有人害佢，果時我細個+佢病情未去到好嚴重，真係察覺唔到佢有問題，佢一直keep 住咁嘅狀態直到我高中，我發覺佢真係越嚟越唔對路，因為佢開始鬧我害佢，有時係我訓著覺嘅時候打醒我，我就問我媽果邊啲親戚，先知佢有抑鬱症同埋自己斷咗藥（佢識係醫生面前扮正常），我之後有試過搵社會幫手，但係佢唔肯見，最後冇開file，我亦有試過搵親戚幫手，但係老豆果邊親戚本身就係搞到佢情緒病嘅其中一個源頭，冇可能叫佢見佢地，啊媽個邊啲親戚佢肯見但係勸唔掂，最後所有親戚都放棄唔理佢（因為老母會鬧佢地）

高中之後基本上得我一個人面對佢，佢成日就無拉拉鬧我/鬧空氣，話所有人都害佢，有時仲會掉屋企啲嘢，之前連埋DSE壓力，搞到我日日都訓唔好。
到我入Uni之後佢病情更加嚴重，開始製造噪音同外人嘈交（e.g. 鄰居、路人，之前仲試過鬧上差館/被人向房屋署投訴，我試過上上吓堂被房屋署call返屋企睇佢發生咩事）

唔知係咪咁嘅情況下，佢身體越嚟越差，之前仲有乳房葉狀線瘤/子宮頸癌，大半年內入過2次院，導致佢覺得有人害佢入醫院

直到近排佢又話個胸有粒野，有時會刺痛，仲多咗咳，但係今次我勸都勸唔掂佢去睇醫生，仲要日日話我白痴/唔係佢個仔，夾埋外人一齊送佢入醫院（有好多好難聽嘅說話）

我真係唔知可以點做，佢正常嘅時候真係好錫我，加上我得佢一個親人，我真係唔想睇住佢身體慢慢差落去，但係每次好聲好氣同佢講，都會被鬧到狗血淋頭

一邊要聽佢難聽嘅說話，一邊擔心佢，我真係好怕我有一日會爆煲，同佢一齊住真係好影響我嘅生活，我唔想面對，我好想逃避所有野

試下搵學校社工傾下 排解咗你心中嘅情緒問題先
媽媽方面 再問下有無專業既意見比到你

我估你阿媽有太多唔開心嘅事喺醫院發生，所以唔想去醫院？
定係你試下話你自己唔舒服，叫佢陪你睇醫生？咁佢可能會肯去醫院？

或者你媽有冇話最聽邊個話？例如你阿媽係人都鬧但唔會鬧佢，如果有呢個人嘅存在，揾佢幫手勸你媽

你嘅壓力來源係你媽，希望你揾到人幫手，咁你應該會感覺好d

辛苦你了
佢入院個陣會唔會搵下社工幫
照顧情緒病患者唔易 加油

多謝大家支持，我自己情緒暫時都算穩定，只係有時生活所有壓力一齊黎嘅時候抖唔到氣。
依家慢慢開始睇化咗，啊媽方面盡力做咗就算

你响邊區？ 打182183

醫院令捉佢入醫院食藥先

樓主已經好叻啦 咁都入到u

樓主好堅強
我媽同你有d似，早發作時帶佢去診所睇醫生
醫生開左藥俾佢
呃佢話會訓得好d
佢食左一排就正常返

之後又有野刺激到發作
再睇醫生食藥

以後都講野好小心
多左關心佢
冇發作了

我細個都好驚，放學仲要買餸幫手，好大壓力，
唔想返屋企
自私地為自己預留左放學一小時行街
我都冇其他親人幫，個老豆廢廢地

辛苦晒你雖然冇咩advice比到你，但加油! 實有辦法嘅