27歲「最強童顏」羅毓儀(Yuki)出道僅5年,已於新劇《神耆小子》中「升呢」女一。不過Yuki事業火速起飛,愛情就未能同步並進,兩個月前跟YouTuber男友Mike和平分手,至今依然放唔低呢段4年情,訪問期間更悲從中來突然爆喊,然後帶淚剖白分手真相,自爆曾經打算復合。加上被口臭網民誤解分手原因,令她非常無奈。
兩年前,羅毓儀在劇集《下流上車族》飾演學生妹「車蔓蔓」,憑幾場崩潰爆喊戲獲觀眾係咁畀like,隨即人氣急升劇接劇。在新劇《神耆小子》更首度擢升女主角,跟鄭則仕有唔少對手戲,仲拍住力捧的「妙音龍子」冼靖峰(Archie) 發展感情線,前途一片光明。
分咗後曾多次傾過復合
Yuki舊愛Mike曾被網民批評「襯唔起」她,Yuki當年曾力撐對方「超級靚仔有型有才華又可愛」,女方坦言仍未放低舊情,自爆曾多次箍煲,拉扯多時最終都係決定做返朋友。她首度開腔剖白分手原因:「感情事係複雜嘅,主要係工作考慮居多,藝人生活比較煩,衍生溝通、時間、性格及生活模式等問題,唔係一朝一夕嘅事,最初以為可以解決得到,但原來去到某個位就會一發不可收拾,尤其停留橫店4個月拍《巾幗梟雄之懸崖》時變咗Long D(戀愛)。」Yuki坦言曾多次提出,希望互相遷就來維持關係,Mike亦願意付出時間,最終她唔想咁自私,逼對方改變自己:「我今年28歲,開始想將來,屋企人都問我將來有乜打算?我想將多啲時間放喺拍劇,呢方面大家有衝突。」語畢,Yuki即眼有淚光並開始哭訴:「突然冇咗一個人會唔開心,同一個人咁多年,大家陪大家經歷好多,我覺得佢都係一個好人,大家由零開始,一齊好努力去經營YouTube Channel。」
至今Yuki跟前度仍有聯絡,日前女方不慎跌親,出po後Mike亦有傳短訊慰問, Yuki又再次慨嘆愛情好複雜,她真的不懂,越諗越難過的她淚如泉湧,邊拭淚邊說:「以前好美好,好想返去從前唔懂事,唔使顧慮咁多嘅自己,但原來有啲嘢唔係鬧交,唔係翻天覆地,而係會隨時間流逝去改變,就好似沙漏咁逐少逐少溜走,返唔到轉頭。」
https://std.stheadline.com/realtime/article/1999758/%E5%8D%B3%E6%99%82-%E5%A8%9B%E6%A8%82-%E7%BE%85%E6%AF%93%E5%84%80%E6%94%BE%E5%94%94%E4%BD%8E%E8%88%8A%E6%83%85%E7%AA%81%E7%88%86%E5%96%8A-%E8%BF%94%E5%94%94%E5%88%B0%E8%BD%89%E9%A0%AD-%E5%87%BA%E9%81%935%E5%B9%B4-%E5%BE%A1%E7%94%A8%E5%AD%B8%E7%94%9F%E5%A6%B9-%E6%80%A5%E5%BD%88%E4%B8%8A%E5%A5%B3%E4%B8%80%E4%B8%A8%E7%8D%A8%E5%AE%B6