石頭大哥私家雞
2024-05-20 17:38:16
例牌每次打完⼀個我滿意既比賽都會打篇長文抒發下感受,今次都唔例外啦。
等左11個月終於再喺國際賽打入4強或以上,喺哩11個月入面包括左唔少次⼀輪遊。對比起2023年上半年(嗰半年可以話係我生涯其中最成功既時段之一),我評價自己既狀態係斷崖式下降,但原因究竟係咩?我都問過自己好多次,我波照練;比賽照打;對手都係嗰班人,咁點解半年前同半年後打出嚟既成績會差咁遠?我真係解釋唔到。我身邊既人都應該好清楚我哩11個月既心情係點,對自己無限質疑,成日喺訓練上都承受好大壓力,情緒都唔係幾穩定。
作為一個對自己要求好高既人,好難接受自己連續失敗,甚至到近期我自己都感覺到每次一輸波都不由自主咁塊面黑到我估旁人見到都避之則吉既地埗。面對每一次失敗我總係想正面啲咁同自己講「冇野既,再堅持下啦,考驗嚟嫁啫」「繼續相信啦,總有一日會成功既」但究竟係堅持到幾時?嗰⼀日係咪真係會來臨?不過喺我眼前都冇得揀,我就只可以堅持,喺每一日訓練要求自己做到最好,不斷諗辦法點樣增強自己,然後盡力喺比賽表現出嚟,哩樣就係我唯一可以控制到既野。
終於到今個星期泰國公開賽,出發前我對自己都冇咩特別目標,第一輪對⼀號種子,而且上兩個禮拜先喺另一個比賽輸過比佢,今次都冇咩野好再輸,所以唯一俾自己既要求就係要做得比上次好,將自己應有既實力表現出嚟唔好令自己後悔。結果出乎全世界意料我贏左,打左⼀場今年到現時為止既代表作,最後更加打入左由上年3月至今既第一個決賽!
可能有人會話「車!⼀個公開賽亞軍有咩特別?洗唔洗咁開心丫?」但我就覺得我⼀定要替自己開心,我好興幸喺低谷既時候再難捱我都冇放棄自己,我認為跌落低谷爬得返上嚟既感覺往往比贏到開巷更具意義,相信有過類似經歷既人一定會明白,所以今次我⼀定要俾個叻我自己!不過今次有唔錯既成績唔代表之後條路就會變返順,可能下次再入決賽又唔知要等幾多個月,但係既然哩一刻做到左,⼀定要活在當下,開心左先!
喺哩段失意既路上得我自己一定走唔到出嚟,要好多謝羽總 @hkbadmintonassn ,何sir,黃教練,林sir,我老婆同屋企人,贊助商 @felet_sports ,信興集團 @shunhinggroup ,體能師 @coach_sammy_performancefix ,咁多位治療師同埋所有球迷 @ngklangus_fans ,你地每一位都有份支持我扶返我起身,我都會記住喺心度!
#完