Beyond主音黃家駒位於將軍澳華人永遠墳場嘅墓碑今日早上傳出被狂徒破壞!據報毀壞者為自稱「香港網絡紅人」、「社會破壞者」、「白卡聯盟成員」,綽號「光頭Bob」嘅一名15歲梁姓男子,據悉佢同另一男子已經被警方以涉嫌刑事毀壞拘捕,墓碑現時被白布圍封,並有警員搜證。
網絡流傳嘅影片見到一名光頭男子今日早上到家駒墳前宣稱:「我要炮製黃家駒呢個X街、呢個X樣…」,然後進行大肆破壞,包括倒可樂、爆粗辱罵家駒、腳踢、吐口水、用筆塗鴉家駒遺照及墓碑,該男子更用鐵錘扑爛家駒墓碑,然後指社會睇唔起佢:「認住我社會破壞者光頭Bob,你地睇唔起我呀嘛,我而家證明一切,我光頭Bob唔係流料嚟!」影片流出後,引嚟各地歌迷震怒。
Beyond黃貫中接受傳媒訪問,大罵破壞者:「小則肚痛,大則橫死。」「拉咗未?」