張致恒（Steven）同太太雯雯誕下4子，經濟拮据，以借錢度日。日前有網民喺雯雯嘅最新影片下留言指被二人呃錢，雯雯亦有正面回應。
一名自稱係Cat嘅網民指自己借咗錢畀雯雯，對方一蚊都冇還過；而雯雯之前搞寵物零食「生意」，Cat似乎都有向雯雯入貨，Cat留言：「你想點呀？畀咗幾個月時間你，爭我嗰萬六蚊一蚊（我）都收唔到，包多春魚都收唔到，之前免費送咁多嘢畀你地，你哋咁對我？！你好快啲還錢，最多比你分兩期，分兩個月每次還$8000，所有Payme過數記錄同埋Whatapp對話我都有keep。」
Cat更指要上電視公開夫妻二人「惡行」，又自爆患癌：「唔好逼我公開晒，我真係諗住搵《東張西望》，標題係『寧願呃癌症病人錢，都唔願意出去打工嘅前偶像夫妻』。唔好逼我，我預咗畀你del留言加block。」
不過雯雯就冇block佢，仲好冷靜咁回應，更一如以往咁表示自己係未有錢還：「首先，我好多謝你當初主動出現幫我哋。我從來冇諗過呃你，只係我宜家未有鬆動可以還到比你，就算其他人我同樣都係未還，當初你主動企出嚟幫我地嘅時候，我都有同你溝通我冇咁快有能力可以還到錢，你亦話你明白，至於你兩包多春魚，我冇咗你地址，你block咗我，我根本聯絡唔到你。」
最後雯雯更「耍無賴」，指「尊重」對方公開二人溝通過程：「就算你公開一切，我都尊重你，當中亦可以證明到我有講清楚我冇咁還到畀你，所以不存在呃你錢。最後希望你unblock我，比返你地址我寄畀你。亦祝你健健康康。」
