補充少少背景資料:真人真事廿中,第一次拍拖,係工作場合到識左個女仔,出呢篇文既原因想抒發下自己嘅感受,因為我從來都未試過好似現家咁辛苦過。
初初識佢係一齊做野果陣,第一次見到佢就覺得好合眼緣,有一種好熟悉嘅感覺,所以我係機緣巧合之下就想同佢接觸傾計,大家都傾得好開心,因為發覺自己同佢有好多好相似既地方,傾左一排亦都傾得越嚟越密,開始有一啲曖昧既氣氛,所以好快我哋就成為左好好既朋友,係工作上亦都經常互相幫忙,好自然大家傾計個陣開始都有少少flirt既成份係入面,互相都對大家都有好感,單獨係節日約佢行街食飯佢亦都肯同我出,令到我覺得係佢發出既signal,可以同佢推進關係,所以我就決定左勇敢一次同佢表明心意,但表明心意完之後佢同我講「其實我有男朋友,你知唔知?」 當時個下我既心情係好撚嬲,覺得自己好似被人欺騙左,點解你有男朋友仲要發出咁多錯誤既signal比我,明明佢有好多機會可以同我暗示/明示佢有男朋友,點解要咁樣玩我,去到最後呢一刻紙包唔住火先同我講有男朋友,姐係一開波由始至終都係諗住玩鳩我?我個下好嬲,一句說話都唔想同佢多講,已經想即刻走人。但係佢就同我講,其實佢一直都為咗呢件事覺得好煩惱,唔知點樣搵機會同我講清楚,唔想無左我呢位好朋友,之後係佢又求又哎嗲我嘅情況下,我心軟左無走到,亦都無答到佢可唔可以繼續做朋友,當下既感覺係好唔開心,個腦一片空白,亦都好嬲佢,因為我覺得鍾意佢就唔甘心正係同佢做朋友。
之後佢就同我坦白講曬佢現家既情況,包括同佢男朋友既感情狀況,佢哋拍咗幾年拖但感情一直都唔係咁好,成日都嘈交,所以一直以黎關係都唔係咁好。佢同我坦白佢都係第一次出軌,當下我都真係信佢,因為佢表露出嚟好不安既感覺,令我覺得佢唔似係到講大話,最後佢就問我係咪真係唔可以做朋友,我個陣只係同佢講如果我地繼續做朋友,我好驚我哋會情不自禁,做出一啲超越朋友會做既事,但我亦都無拒絕佢我哋唔可以繼續做朋友。最終我哋真係做左超越朋友之間嘅事,佢主動拖手攬我錫我等等。但我個人對待感情係好認真,可能我個人比較傳統,認為拍拖係應該以結婚為前提,所以事後亦都即刻同佢表明我個人既態度同埋我無辦法以第三者嘅角色長遠同你相處落去,佢亦都話自己對待感情方面都係好認真既人,唔係玩玩下,同我承諾之後會好好處理佢同佢男朋友之間嘅關係,姐係同佢男朋友分手,之後名正言順同我起埋一齊。當下我接受左佢既提案,短期內以第三者既角色同佢繼續相處落去。曾經我都以為自己係一個好有道德既人,但原來發生係你身上個陣,先發覺人性係好脆弱。我都好清楚自己已經做錯左,明明可以堅決拒絕,但我無做到離開佢,所以我一直都覺得自己係呢件事上面有一定責任,第一次比帽人帶內心凝住都唔係好舒服,所以同佢相處個陣都無辦法全心全意投入,見到佢間唔中會諗起佢有條仔呢個事實,但的確無可否認係同佢相處係好開心。當時佢男朋友有一段時間都唔係香港,所以我哋過左一段好開心既日子,佢亦都承諾當佢男朋友返黎香港就會同佢分手。
之後佢男朋友返黎香港,佢同我講佢同男朋友已經無愛情方面既感情,已經唔再鍾意佢男朋友,剩低既得返親情。佢亦都的確有同佢男朋友提出分手,但最後佢無好堅決咁分手,因為佢男朋友求佢唔好分手會改果啲,同埋佢地係同居既狀態,我個心開始好唔舒服,因為無辦法接受自己心愛既人同其他男人訓埋一齊。所以我可能都周不時會扭計同嬲,一開始都有關懷我既情緒,之後反而話我成日扭計同嬲比好大壓力佢,佢話我哋之前明明相處係好開心。我當下好唔開心,但我無表達到出嚟,選擇左自己默默承受。最後佢無做到佢作出既承諾,同我講佢開始有小小動搖,希望我比多小小時間佢二簡一。我好無奈,但我的確仲好鍾意同愛佢,所以我等左佢三個月。
最後佢選擇左同佢男朋友繼續一齊,因為佢同我講佢無辦法離開佢男朋友,仲要覺得自己都係受害者,佢選擇咗要同我分手,我果下覺得好嬲我覺得佢講既說話全部都係大話,承諾做唔到點解要make呢,我覺得自己好似一件工具,佢男朋友唔係香港對佢唔好個陣,我就係拿黎填充佢心靈上嘅空虛。當佢男朋友返黎香港對返佢好,我就好似一件被人利用完無價值可以隨便丟棄既垃圾。之後仲同我講佢想繼續同我做朋友,我當下夾雜住太多情緒,嬲佢又嬲自己點解咁on9,我最後無講任何野,因為我發現自己無辦法對佢狠心。
我到現家情緒都唔係好穩定,未試過受咁大既傷害,我亦都有陰影驚左,之後可能唔會咁傻再付出100%既愛,因為好怕自己再受到傷害,真係好痛。我好嬲自己點解咁天真,信佢係出軌之中既例外,諗返起自己做過既野好似傻仔,處處為佢著想,比佢當係狗咁撚,瘋狂踐踏我既底線同尊嚴,同時我好嬲自己點解咁低賤,明知佢係一個仆街,但係又唔捨得block左佢,好嬲自己點解自尊咁低,點解咁唔爭氣,嬲自己嬲到忍唔住係咁喊,我一直係到諗,如果佢之後搵返我,我會唔會做到堅決拒絕佢。最後發現左自己答唔出呢個答案 情緒崩潰左,我係咪有病,點解仲鍾意佢,
點解我唔愛我自己?
最後呢篇文我打咗好耐,故事亦都好長無辦法可以一一描述,多謝大家願意花時間睇到最後,亦都接受一切既批評,同埋多謝我既朋友呢段時間都吸收左我咁多負能量。