自2月底樓市全面撤辣後,整個物業市道的確明顯改善,不過除咗一般業主外,一眾銀主亦都急於沽貨。近年出現財困的「舖王」鄧成波家族,過去多年在港瘋狂掃貨,高峰期坐擁超過600億元的物業王國,不過近年隨市道下滑,過去數年波叔家族亦受到銀主壓力頻頻沽貨,聽聞自波叔在2021年5月中離世後,佢地家族已經沽咗超過90個物業,至今累積沽貨總金額更加高達逾240億元,相等於3.5條沙田T4公路,規模相當驚人。
燈神睇返舊資料,波叔在2021年5月中離世後,鄧氏家族隨即加速沽貨,該年在波叔仙遊後瘋狂連沽47項物業。而及後的2022年及2023年,鄧氏家族繼續減磅,該兩年分別再賣多26項及14項物業。
去年底至今年初暫告一段落 近月又再加速沽6件貨
而在2023年12月至2024年2月,波叔家族僅僅只係沽咗一個物業,本來燈神以為波叔家族的沽貨行動暫時告一段落,鄧氏家族成員可以鬆一口氣,但估唔到沽貨潮已經再次重新啟動。由2024年3月至5月期間大約一個半月,鄧叔家族再次頻頻沽貨,合共賣咗6件貨,合共套現咗大約4.83億元。
波叔與銀行關係好 昔日「借盡」、高槓桿掃貨 一季豪花40億
燈神同部份曾與鄧氏家族交手的代理傾過計,其中一位代理就分析話,其實過去市況仍處低息兼未轉差時,波叔都會「借盡」以高槓桿去掃貨,當時波叔夠牙力,大型銀行又好信任波叔,所以每次波叔入市都好輕易借到七成按揭。就好似2017年,首季3個月都未完,波叔已經斥資超過40億元買入十幾項酒店、工廈及舖位,當時仲話要一年內買一百億貨!相當誇張!
不過近年工商舖市場大插水,各區工商舖物業都明顯貶值,物業重估時都會縮水,昔日批出較高按揭的銀主,近幾年一直心慌慌,擔心部份投資者出現「資不抵債」,所以近期見樓市在撤辣後開始有承接力,當然希望盡快沽貨套現。
銀主擔憂債仔資不抵債、望「收得幾多得幾多」
代理仲話,由於今次樓市跌浪持續時間非常長,至今依然唔可以肯定是否見底,一眾銀主已經無乜耐性,而且對前景又冇乜寄望,所以索性「壯士斷臂」,接收咗銀主盤就盡快賣;如果未接收到,就叫債仔盡快賣咗佢還錢好過,務求「收得幾多得幾多」。