5月1日。香港大雨。
「5 1 」呢2個數目字，相信喺我同您們心中依然係代表住一個信念，一個還未實現的夢吧。
所以我決定喺今晩，同我最愛錫嘅您哋公佈一件重磅大事。
對！我已經離開咗香港到英國生活了！🇬🇧
相信有生之年都不會/不能再回去呢個我最愛，但亦一日一日崩壞的香港了。
用呢個Po，講多一點點吧。
/
其實真係下定決心做離開香港呢個決定絕對係在23條落實嗰一晚的。
我在牆內的遭遇日後再詳談。
今晚我反而想同您哋講究竟離開監獄前的一天和之後發生的事。
實在聽得太多話我哋呢班喺佢哋心目中有影響力的人，是會不停被加控罪，不能出獄直至影響力變零，甚至被遺忘為止。
所以在9月29日放監前，其實我係一直都被「無法出獄」呢個想像和恐懼重重圍困住的。一直好擔心國安會在出獄前的一天來找我，然後告訴我再加控什麼什麼罪的⋯⋯
結果，國安處喺9月28日的下午3點，真的來找我了。嗰刻我全身從來未試過如此發抖的。由監房工作地點行上去國安探訪室短短10分鐘的路程，成為咗我人生最折藤的10分鐘。
因為我實在太害怕不能離開呢個地獄了。
之後見到2個國安處人員呢2個(就係當日上門拉我的其中2個) 拎住2個好薄的File入嚟，當刻心情有放鬆了一點，因為我相信如果要加控罪，應該是拎住一大堆什麼文件，什麼證據入來，而不是2個薄File吧。
最終佢哋同我講嘅，不是加控罪，而是令我更意想不到的東西。
爆料時間來了
以下係其中部份真實對白
「Tommy，你想唔想返大陸發展？
如果你想我哋可以幫你安排，同你一齊去！
你其實一直都係做娛樂工作啫，只不過你19年太寸啦，又幫咁多𡃁仔，上面先搞你啫！
你出嚟都要用錢㗎？可以俾個價錢我哋丫，我哋研究下，唔好同錢鬥氣！
即係上面覺得如果你坐完出返嚟，肯幫返我哋做宣傳呀，講座呀，會係一個好大嘅迴響，考慮下丫，我哋點合作都得！
你睇阿布泰老細都棄暗投明啦…」
下刪一萬更爆的對話，之後Patreon 再分享…
當時聽到呢度，我心諗你哋係咪痴撚線架，我俾你哋屈咗入去坐成20個月監，千辛萬苦捱完你哋同我扮Frd？叫我合作，叫我過底？
完全相信佢哋係無帶個腦返工的。
當時我當然無俾任何視佢哋嘅表情出嚟啦
在國安面前永遠都必須有限度的妥協，因為佢哋隨時可以再次令我陷入牢獄之中。
當刻我只係希望可以順利出獄。
所以我聽曬之後我就答咗佢哋一句
「我暫時無呢啲打算住，我暫時只係想知道我聽日可唔可以順利離開監房？」
幸運地我最後真係可以順利離開。
但係嗰種恐懼，一路無離開過我。因為其實每個禮拜國安都會打俾我，WhatsApp 我，「查詢」我近况，約我見面，拍戲咁，搵架密封嘅七人車接我，然後不停努力咁游說我變節！
當然，每次我都係耍走佢哋。
但我永遠唔會知道邊一次見面，佢哋會再一次無理直接將我從七人車送進監房，我同我家人都真係再受唔起呢種折磨了。
其實離開監獄後，我的情緒病要來了。一個人時會流眼淚，明明看笑片都流眼淚，每晚發惡夢，磨牙，每次門鐘響就覺得門外就是國安處的人準備帶走我，我完全走不出來。後來醫生診斷後，確定我確診焦慮症和創傷壓力症，但還好未算太嚴重。但情況只會一日比一日差。
我心態係好想繼續留港的，但之後佢哋對我嘅萬般阻墝，一堆無日無夜的分化同批鬥，然後去到23條加快落實通過。
我知道可以做的，就係堅決的，萬般不捨的離開呢個我土生土長，生活咗44年的香港了。
您哋知道我有幾不捨得大家嗎？
未來會喺英國呢個地方有咩奇遇我真係唔知道
但我起碼可以大呼一聲
我真的自由了！！！
呢種免於恐懼的自由，好耐無感受過了。
而到埗翌日我立即負返一個我負少咗2年的責任就係
送仔返學💛
真係好掛住佢哋👨👦👦
最後我想講
我之後會好努力好努力的在英國繼續用片段，文字，用音樂作品去做我一直堅持和相信的事。
我從來無開過任何收費頻道，一直無開Patreon，亦好少請求大家支持我，但今次好想向向大家請求一次
好希望您哋可以支持我，我希望呢度嘅每一個您，可以訂閱我嘅Patreon ，喺嗰度，我會將更多更多大家有興趣知道的，所有真相，內幕，日常，音樂等同大家分享，甚至可以收到我嘅手寫信同埋同我獨家視像通話。
您哋嘅訂閱，除咗幫助我喺英國繼續發展事業之外，亦可以令我可以再一次大大力，無後顧之憂的向在學生提供援助，呢個係我放學前答應過他們的，希望您哋可以陪我一齊做，亦都係陪佢哋一直並肩而行。
雖然我感覺自己係被政權迫走，但我必須活得比從前更好，呢個先係對敵人最大力的反擊，
您哋願意支持我嗎？Patreon 連結在留言🙏🏻
再次感謝大家。
今晚講住咁多先！
保重！後會有期！
