正在舉行內地巡迴演唱會嘅陳奕迅，之前喺南京場有觀眾向舞台舉中指，Eason懷疑心情受影響，有半首《任我行》都背住觀眾唱。呢個周末Eason去到武漢演出，估唔到又有狂迷再現。
武漢場演出時，一名女歌迷多次喺觀眾席大叫兼「代唱」，好似唱到《任我行》最後一句時音樂靜止，呢位歌迷就搶先過陳奕迅唱埋，完全破壞歌曲氣氛。Eason多次受騷擾後，忍唔住反白眼擰晒頭，又模仿該歌迷唱完首歌。Eason之後又將咪遞向該名滋事女觀眾，示意叫佢上台唱埋一份。
過往陳奕迅演唱會都有缺德歌迷搶住「幫」Eason完成歌曲，Eason喺香港嘅DUO演唱會唱《富士山下》遇到呢類情況，立即改歌詞唱「點解每晚都有啲咁嘅野人喺度嗌生晒」，於是Eason fans都會叫呢類缺德歌迷做「野人」。有現場消息話，武漢場嗰位女「野人」係自備揚聲器去睇show，現場工作人員多次勸阻都不果，該名野人甚至高呼要佢離場就除衫！
