明知佢中意男人 又出過櫃 仲問佢女人
(星島）
經常刷新連續工作小時紀錄的「教主」盧瀚霆（Anson Lo）是百分百的工作狂，被封為「黐線Lo」，但原來愛情在他生命中都佔上重要位置，將來有拖拍不排除會退出幕前，更預言最快在5年後才發生，但自言目前不是「戀愛腦」，理想中的「教主嫂」亦非「教母」類型！
Anson Lo新歌《深閨》擊敗了《不可愛教主》、《永順街39號》及《浪漫殺死巨蟹座》，成為了他暫時最喜歡的慢歌，他透露收到作曲人徐浩的Demo時，已經一take收貨：「我覺得呢首歌係一種好浪漫嘅氛圍，好似從自己第一身出發唱俾一個人聽，話俾佢知我幾咁珍惜佢、愛佢，係好有感情嘅一首歌。」
與Wyman（黃偉文）討論新歌概念時，起初他是希望造一首求婚的歌，AL：「雖然我冇話要結婚，但想係一首好aggressive表達自己愛呢個人嘅歌，不過Wyman卻認為求婚不符合我的年紀、階段及形象，於是從其他角度入手。」
被Wyman笑為人緊張
原來3月到英國巡唱時才是AL首次與Wyman見面，之前兩人的合作都是靠通電話來溝通，早前Wyman 在社交網以uptight（緊張）來形容AL為人，AL笑言：「佢喺社交網，或者通電話都係用呢個字形容我，佢覺得我個人好緊張，對住前輩、陌生人都有一種隔膜，好期待睇到我唔同嘅一面。」直至上次英國見面相約食飯，大家都飲咗少少酒，好快破冰更興奮到咩都講一餐，AL自認個性慢熱內向，但一旦得到彼此信任就會有安全感，他會呈現細路仔的一面。
《深閨》其中一句「拒絕再做凡間千人迷」是AL最喜歡的：「熱戀中的情侶，好想對對方有承諾，呢首歌其實係好relate到，但突然間出一句『拒絕再做凡間千人迷』，變返好relate到Anson Lo，如果我拍拖嘅時候，其實都可以有呢個選擇，完全唔做𠵱家呢個行業，隱退淨係拍拖。」記者俾佢呢句嚇一嚇，即問：「咁你會唔會咁做？」AL坦言：「呢兩年都應該唔會，可能5年後，未去到話完全唔做、淨係拍拖，因為我都唔係『戀愛腦』，雖然愛情對我嚟講都幾緊要，但呢幾年工作緊要程度高好多，所以如果真係呢一兩年去拍拖，應該係要攞balance。」
懂得照顧另一半
已經很久沒有拍拖的AL表示：「係好耐無拍拖，所以錄《深閨》係會唱到喊，因為我幻想如果自己拍緊拖，都應該真係成日會留喺屋企，無論係自己個人偏好或者工作需要都好，我都會成日留喺屋企，加上自己近年好少social life，所以越唱越感觸。」
經常被標籤不懂得做家務的AL，究竟能否照顧另一半？他趁機為自己澄清一番：「應該都會，雖然大家經常標榜我唔識煮嘢食，但其實我𠵱家自己一個住，基本生活技能我都有，食完嘢抹枱、拖地、執床（你成日浸嗰個浴缸係咪你自己洗？）係，所以唔係大家講到我完全坐喺度唔做，如果拍拖，基本日常都會照顧到人。」
踢爆「教母」太強權
至於心儀對象會否target 教母（AL母親）的類型？AL帶有猶豫，並踢爆教母太強權，笑言：「教母頂級聰明，但太強權，屋企差唔多所有決定都係佢做；但我自己心儀唔係呢類型（鍾意嗲啲？）係囉係囉，好似講到好嫌棄我阿媽咁。我觀察我父母相處方式，唔係我好想要，但其實佢哋workout得好好嘅，但我自己就唔太鍾意好強權，唔係好想所有都係佢話事，可能係6:4 balance 。」
新歌中的女主角會忘記他，現實中AL最怕誰人忘記了自己？他直言是教母：「我媽咪，尤其屋企人年紀開始大，媽咪身體又比以前差咗，過去呢年我都擔心媽咪多咗，因為佢好固執又好唔聽話。」相反，最希望誰人可以忘記自己，AL就選Jeremy（李駿傑），並笑指Jeremy太了解他不是一件好事，希望對方再重新認識他。
自認常報喜不報憂
性格向來內斂的AL，以前總會將所有事藏在心裏不說：「我諗呢方面比起出道都進步咗，視乎咩事情，有啲事我都會share俾大家聽，但我都仲係有報喜不報憂嘅時候，因為我覺得呢個係我個job要承受嘅嘢，我冇辦法每一日都將唔開心嘅嘢講出嚟，對件事冇幫助，仲要令心愛我嘅神徒唔開心，咁我又覺得唔係太啱。」
而《深閨》英文名《The homebodies》原來是由唱作歌手Serrini（梁嘉茵）出手改的，AL非常喜歡：「我完全冇諗過會有英文名出現，過去嘅慢歌都冇英文名存在，所以今次有覺得好新奇，Wyman 好貼心仲搵埋Serrini幫手，成件事好Sweet。」自從為Serrini 演唱會擔任嘉賓後，兩人甚少幕前合作，但在社交網都有留意對方的作品，並會有幾句交流，期望之後會再有機會合作。
同杜Sir合作感挑戰
此外，AL在美加巡唱前已經開拍杜琪峰的新戲，對於首度與杜Sir合作，他坦言：「我覺得好有挑戰性，杜Sir開工時間好彈性，以前拍電影通常凌晨四點起身化妝set頭，拍到夜晚，但杜Sir有時淨係拍夜晚，但收工時間未必係講嗰個時間，佢係一個完美主義者，好多時突然間要去圍讀傾好耐，呢個係我未試過，傾得好深入，係十分珍貴嘅經驗。」
已經唔係冇生活技能咁簡單，除非佢𠄘認嗰啲係節目效果
