全心保存真的我
2024-04-26 23:28:37
關心下舊同學近況如何都好正常嘅,人有好奇心係人之常情,不過如果見到有啲過得比你慘,我就咁諗啦。
第1種人一生平平無奇,普通人一個,但係叫做正正常常,又冇傷天害理;
第2種後生嗰陣條命唔好,唔知係命運定風水嘅問題,不過人到中年事業,人生樣樣嘢各方面都會越嚟越好;
第3種人就係後生嗰陣意氣風發,風頭一時無兩,但人到中年開始走下坡,甚至係頹敗,不堪。
睇人仆街最開心呢個係好多香港人嘅common value,我唔知不過做人有返少少同理心,憐憫,愛心其實會比較好。不過如果嗰個人本身係一個仆街冚家剷咁就另一回事啦。
其實social media係好難完全反映一個人嘅生活。大把so called名媛post自己去半島酒店下午茶嘅相上social media,但係可能返到屋企畀老公當係沙包打到仆街呢。又或者有啲人share自己最近唔開心嘅事,放負,只係無病呻吟。呢啲嘢,局外人好難知道。
得閒關心下佢哋近況都ok嘅,不過太involve就唔好了。事不關己,己不勞心。同埋活著又唔係為咗證明畀人哋睇自己嘅生活有幾好,又或者自己有幾成功。做人又唔係為咗「贏」。 乜嘢叫贏呢?中六合彩做千萬富翁?定係擁有一個健康嘅身體?點為之贏呢?小學生猜皇帝咩,仲咁執著贏輸。人嘅煩惱同困擾Mostly都係源於身邊嘅人,對於攞自己同其他人嚟比較有一份好令人費解嘅執著。
Social media資訊量極大,係一把雙面刅。你太多資訊吸收到,你自己都會當局者迷。最緊要識得點樣善用佢,同埋做好自己。
做好自己,保持身體健康,飲多啲水,行善積德,咁就好足夠啦。