https://www.facebook.com/share/p/F48B2MfFVaMWesqd/?mibextid=WC7FNe
昨晨阿仙奴大勝車路士嘅比賽只有45%控球權,係本季至今34場聯賽中第二少嘅一場(最少一場係作客曼城打防反嘅28%)。出現控球少呢個現象,通常都係源於兩個原因:(1) 有球在腳時踢得更加直接,較多冒險嘅向前傳送,較少安全嘅橫傳回傳;(2) 無球在腳時迫搶力度不大,唔介意對手控球在腳,較多時間採取mid block等待對手犯錯。
先睇第一個原因,阿仙奴今場喺左閘位用上Tomiyasu,防中位用上Partey,相比起組織型嘅Zinchenko同Jorginho佢地嘅用波能力比較遜色。所以今仗嘅進攻更多由侵略性較大嘅Odegaard發辦,佢喺比賽嘅參與度好高,全場84次觸球(今季平均只有71次)交出8次關鍵傳球。另一方面車路士一對中堅對Havertz嘅防守非常鬆懈,亦有利阿仙奴踢得簡單直接。
翻睇先開紀錄一球,內收嘅Tomiyasu同Partey形成雙6號,但中路人馬疊雜所以Odegaard拉到邊線幫波 (圖1)。Saka接應短傳後內切,搵到墮後嘅Havertz作為third man (圖2)。(車路士一對防中未能遮線,一對中堅未有殺出黎係令人費解,對比圖3圖4 Gabriel對Jackson嘅貼身防守。)皮球經Partey過渡至左邊嘅Rice,推進一段引黎Gilchrist注意後助攻比Trossard射入。
再睇第二個原因,喺初段取得領先,意味阿仙奴唔需要急於喺前場重奪控球,所以佢地今場嘅迫搶力度較平常低:Odegaard未有每球都壓上最前向Badiashile施壓,反而更多時間看管身後嘅Caicedo,等Rice同Partey唔洗跳上前、可以分別專心看管Enzo同Gallagher (圖5)。此舉預防早前所講4-4-2迫搶面對4-2-3-1嘅漏洞,犧牲部分控球率換取對防線更佳嘅保護。