#方皓玟(#小明)日前在社交網預告將亮相 #TVB 音樂節目《J Music》,跟LOONG 9成員冼靖峰合唱《分手總約在雨天》,有網民表示對小明失望,連日在她的社交網留言鞭撻。
小明今(22日)在IG開live跟網民傾偈,回憶曾跟陳蕾一起拍亞視劇《親密損友》,「我覺得好有趣,呢個世界好細,大家做呢行,只要你肯奮鬥去做,始終都會做到一個自己嘅天空,嗰時大家都係細路女,喺亞視演劇經歷一段時間,去學習去認知自己。」
有網民直問「為何上TVB?」小明表示:「我唔覺有咩問題,歌手都想多啲機會去推廣自己嘅作品,任何平台都歡迎,自己係好隨意,覺得冇所謂。」她表示網民每個留言都有看,自己亦會站在對方的立場去反思,但如果覺得自己沒做錯,問心無愧就會繼續去做。
對於很多網民反對她上TVB,小明希望大家了解節目製作才作出批判,「我知好多人唔睇TVB,但可以去睇吓,啱咪睇,唔啱咪唔睇,何必諗到咁複雜?」小明慨嘆很多人都是未審先判,無論對人或對事,「有冇真係去了解呢個人嘅背景、佢背後發生咗咩、有咩苦衷,又或者佢以前做過咩呢?唔好就咁judge人哋。」
雖然有網民支持小明,但亦有網民表示不理解,更揚言要unfollow以示抗議,小明表示︰「當然你可以unfollow我,因為呢個係你自由,你鍾意我就會繼續鍾意,follow過我之後unfollow都係緣份,多謝你哋曾經follow過我。」
有網民問點解唔上ViuTV?小明指已很久沒上ViuTV,「只要任何平台邀請,可以宣傳自己嘅音樂都可以。」
#娛壹