[警世-長文] 想抽眼袋既姐妹入 千其唔好去Coxmed
話說小妹比眼袋問題困擾左多年, 訓幾多, 查幾多眼霜做按摩保養都冇用, 做過眼部溶脂, 眼部Hi-Fu都解決唔到, 有日見到個 page係講述到點做都改善唔到眼袋問題係因為果D係脂肪黎, 可以用抽脂呢個技術去處理。
我開始做好多research想搵一個最安全既手法去移除呢個眼袋，處理眼下脂肪有好多方法，開刀/針筒抽脂等等手法, 最後我簡左個最安全既微創手術去做,
呢個微創手術係主打唔洗開刀, 只係係眼瞼內側開口小於2mm既開口眼眶, 從而抽出眼眶內多餘脂肪, 術後唔需要縫合，外觀亦無手術痕跡。
不過始終呢個係手術, 我都會驚, 所以事前我都有wtsapp問過間公司個李姑娘, 抽走脂肪之後眼下皮會唔會變到鬆弛, 脂肪有冇機會會生返等問題, 咁佢就話脂肪無左之後會增生骨膠原，所以會變得更加緊致同埋平滑，而我既情況就唔會鬆弛嘅，只不過係任何嘅美容院療程其實都已經冇作用，建議我去見醫生。
果位醫生姓湯，我表示我自己好努力咁去搞，試過既方法都解決唔到，湯醫生笑話我眼下果D係脂肪黎，抽走脂肪同我去做機做溶脂係唔同，因為果舊脂肪始終都係度，唯有抽走佢係最治標治本既方法，一了百了，咁我都依然係問返佢會唔會變到鬆弛, 脂肪有冇機會會生返等問題，佢就好有自信咁講佢做左呢D手術成10幾20年，我咁後生恢復能力好快復原，拍晒心口咁講至少保我10年都無事，就算我要捱夜都冇問題，如果唔係佢免費幫我做多次，聽佢咁講真係覺得好穩陣好吸引呀。
我終於下定決心去做呢個手術啦! 呢個手術我係2023年12月中做既, 做完大約一個半月左右去覆診, 我覺得對眼都仲係有D脹, 湯醫生就話依家仲係恢復期當中, 過多排會好D, 比左D膠紙我貼係眼下做鞏固, 我果陣抱住半信半疑既心態，覺得比幾塊膠紙我咁hea既, 不過佢係醫生，有過咁多經驗，我就聽佢話繼續等下先。
直到依家已經係術後4個月啦, 我發覺個眼袋依然係好明顯, 只係比起術前係細左少少, 個效果真係唔多理想。我就wtsapp之前同我follow up果個顧問，比埋D相佢睇，佢就話幫我問左醫生, 醫生話係我皮厚, 眼袋脂肪已經抽左出黎，就算再開睇都係冇脂肪架啦，D皮要等佢慢慢收，然後話我笑果個位係卧蠶黎並唔係眼袋, 皮果方面就建議我做其他嘢去改善。 我就話我好難接受做完之後同未做前既分別唔大，身邊既朋友都仲話我眼袋好明顯, 然後佢就sd返我術前同1個月術後既對比圖比我, 堅持話我D脂肪已經抽晒, 然後我都sd返我術後4個月既相比佢睇, 話皮鬆係會有關係, 但同術前比真係細得少少, 依家係卜左出黎, 跟住佢就用好官方既回應答我如果我想針對眼周的皮膚緊致, 介紹我做咩咩treatment, 依家有優惠, 叫我考慮下
我果下心諗真係WTF??? 我做完手術都keep唔到4個月, 你依家就話係我既問題???? 要我繼續課金???? 然後我打左篇千字文比佢, 想佢正視返個問題, 佢就同我講我可以用緊致嘅眼霜, 然後繼續堅持話係我皮膚質素冇彈性, 我話你地依家淨係識得叫我課金, 佢就話無需要再要我幫襯佢地, 佢介紹呢D產品比我佢地係冇賣, 叫我去萬寧買, 話我誤會喇, 我就話你地連叫我返黎覆診比你地睇下都無呀, 之後佢就再冇應過我
我見佢已讀不回之後就搵返最初同我contact果個李姑娘, 希望佢可以幫忙跟進一下件事啦，佢話我皮鬆既話要做Treatment，做完手術之後D膠原蛋白有幾多就睇自己生唔生性, 然後就用生仔唔包做保養呢個比喻話比我知如果我要做收緊眼部療程就繼續課金啦
當初同佢地傾既時候拍晒心口講唔會鬆, 又講到保養期內佢地會負責, 誇張既手法誘道客人去做呢個手術，但客人一有問題想搵人跟進一下，就話呢D好睇個人問題, 想再好D就課金啦，輕鬆將個責任轉嫁落客人道。
可能會有人講, 佢地係有幫你做到手術呀, 只係你唔滿意個效果咋嘛! 我明白好多時溝通都會存在住不確定性, 但係係公司同客人之間既分歧又係唔係再無空間去處理呢? 點解一尾就話係客人問題，咁當初又話唔會鬆?，究竟佢係咪真係有抽得足D脂肪我唔知, 係咪反彈再生我又唔知, 有冇諗過真係幫我check下係咩問題？比左接近3萬蚊係咪連少少follow up同執漏既空間都無? 依家係佢話醫生話咩就咩，佢話唔係眼袋就唔係眼袋啦。係唔係乜都話個個客人身體狀況唔同, 只要唔係醫療事故咁佢地就可以咩責任都唔洗負?? 咩討論既空間都無??
當初哄你做手術果陣就落足嘴頭，收錢果陣就收得好快，之後客人有問題既時候就將客人一腳踢開。好老實講我比左接近3萬蚊去做呢個手術都係因為想徹底解決困擾多年既問題, 而佢地都講到做完手術後10年都唔會有眼袋問題，但依家做完都係有，我真係好絲疑我果個眼袋係咪抽得唔乾淨或者反彈再生。3萬蚊對我黎講唔係一個細數目, 我諗過度過先去下呢個決定，在消費者既角度連4個月既效果都維持唔到，感覺真係好受騙。
後尾我發現有單新聞係呢報導 “湯醫生因誇大醫學美容療程 被控四項專業失德,醫委會判罰停牌2個月緩刑＂, link我就唔post係度啦, 不過你地search返個標題就會搵到
發生呢件事真係令我好無奈, 出呢個post既原意想多D人關注返呢間公司既人同售後服務真係好差，就算搵醫生做都要搵間手勢好同肯負責任既診所做, 最後附上我同佢地員工既對話同我眼部既情況比大家睇:
2023年11月 向李姑娘查詢既對話
2024年4月16日 同顧問既對話
2024年4月17日 同顧問傾唔店, 搵返李姑娘傾
最後就係我依家眼部既狀況
