曼聯上場英超對般尼茅夫，狀態回勇嘅安東尼馬菲奧斯冇份入選大軍名單，令人大感意外，據悉呢位巴西國腳上周五(12日)操練時受傷，所以缺陣，但安東尼身邊人士指佢傷勢輕微，被棄用全因同領隊坦哈格鬧不和。
安東尼馬菲奧斯上月英足盃對利物浦，射入重要1球，早前英超作客車路士，亦貢獻1次助攻，據悉佢向坦哈格提出，以自己現時勇態，比拉舒福特更值得踢正選，但不獲對方接納，令兩人關係出現裂痕。
雖然曼聯方面否認將帥不和傳聞，但由於坦哈格曾經有同C朗、查頓辛祖反面前科，加上打和般尼茅夫後，拎阿歷真度加拿祖做代罪羔羊，疑似引起呢位阿根廷國腳不滿。坦哈格連番同球員發生爭拗，難怪會傳出今次同安東尼決裂。
據悉以安東尼馬菲奧斯嘅「傷勢」，可以復出踢周日(21日)晚英足盃4強對高雲地利，如果到時都見唔到呢位翼鋒，大家就知發生咩事。