記得之前寫過陳冠希响千禧年後同COOKIES合拍咗套《九個女仔一隻鬼》，條橋就係沿用黃百鳴《開心鬼》開心少女組嘅模式。早兩日睇返報道，唔經唔覺原來《開心鬼》電影上映已經係四十年前嘅事。
《開心鬼》係1984年上映、由新藝城出品嘅電影，故事係講一個因失意於科舉嘅考生朱錦春（黃百鳴飾）上吊自殺，响百幾年後幾名中學女生林菁菁（羅明珠飾）、林小花（李麗珍飾）同顏如玉（林珊珊飾）响古廟附近露營時，林菁菁帶走朱錦春上吊個條繩，結果呢隻鬼就跟咗佢哋返宿舍。而响呢隻鬼同佢哋一齊生活過程中，不知不覺令佢哋人生出現咗好多變化，最後朱錦春受佢哋三個感化，釋懷之後投胎做人。
今時今日睇《開心鬼》劇情就一定覺得老土，但响四十年前其實就應該相當有個性同特色。由於《開心鬼》大收，於是黃百鳴就食住個勢開拍《開心鬼》系列同發展開心少女組，加入袁潔瑩同傅明憲等人。不過，《開心鬼》劇本原創就唔係黃百鳴本人，而係馬偉豪响校際舞台劇比賽中得獎劇本《朱秀才》改篇而成，黃百鳴慧眼買咗個版權。
