又好耐無見啦。今次想同大家分享嘅生物雖然唔係好關微生物事,但係病房間唔時都會寄佢哋嚟微生物化驗室做化驗。佢地就係大部分人見到都會想嘔嘅屍蟲,即係烏蠅嘅幼蟲------蛆蟲(Maggot)。
———————————————————————————
有時病房如果喺病人嘅傷口度發現到烏蠅幼蟲就會將佢哋寄嚟微生物化驗室。而我哋嘅主要目標就係鑑定佢係咪蛆症金蠅 (Chrysomya bezziana)嘅幼蟲。
其實一般常見嘅烏蠅品種都有機會喺人嘅傷口產卵引起蠅蛆病(Myiasis),例如通街都係嘅麻蠅(Sarcophagidae)、金蠅(Chrysomya)同埋絲光綠蠅(Lucilia sericata)等等。其中金蠅屬裏面有好多嘅品種都被證實可以引致蠅蛆病,例如街市成日見到有綠色金屬光澤嘅大頭金蠅(Chrysomya megacephala)。而金蠅屬中最危險嘅就係蛆症金蠅。呢啲烏蠅嘅幼蟲孵化之後會以患者嘅肉為食,令傷口惡化。
咁蛆症金蠅到底有咩咁特別要特別警惕呢?蛆症金蠅成蟲雖然好似普通烏蠅咁主要食腐肉同埋排泄物,但麻煩嘅係雌性成蟲只會喺活嘅哺乳類動物,包括人類身上無皮膚保護嘅地方,例如傷口或者黏膜生產卵,每次仲會生過百粒卵,並且喺24小時內孵化。當卵孵化成蛆之後,蛆蟲會鑽入宿主嘅身體組織並以宿主嘅壞死或者活組織為食,引發蠅蛆病。頭先提過有其他品種嘅烏蠅都有機會會引致蠅蛆病,但蛆症金蠅幼蟲同其他烏蠅幼蟲最大嘅分別就係蛆症金蠅幼蟲會以壞死同埋活組織為食,而其他烏蠅幼蟲就多數只會以壞死組織為食。蠅蛆病嘅治療方法一般係用鉗逐隻拑出嚟。換言之其他烏蠅幼蟲引起嘅蠅蛆病只限於淺層嘅壞死組織,而只要將淺層嘅幼蟲同埋壞死組織清走就好快會好返。但由於蛆症金蠅幼蟲會以活組織為食,所以萬一佢地寄生咗喺病人身上,佢地有機會鑽入皮膚嘅深處,令醫生難以清除病人身上嘅幼蟲,更加容易引發嚴重嘅細菌感染。有啲病例係因為幼蟲數量太多同已經深入咗病人身體組織入面而需要截肢。大家可以參考下面呢篇新聞。
https://hk.on.cc/hk/bkn/cnt/news/20171016/mobile/bkn-20171016063032424-1016_00822_001.html
但好彩嘅係蛆症金蠅喺香港嘅密度唔係好高,而且都唔係成日有病例。佢哋喺新界區會比較常見,原因係新界區多野生哺乳類動物,而呢啲野生動物好易會有傷口,提供咗地方畀蛆症金蠅產卵。
———————————————————————————
好啦咁到底點樣分辨蛆症金蠅呢?送嚟化驗室嘅通常都係烏蠅嘅幼蟲,而極少會直接寄隻成蟲過嚟。而唔同品種嘅烏蠅幼蟲嘅外表係好相似,就咁肉眼係好難分辨到,所以需要用儀器放大佢哋啲啲特徵去認。首先蛆症金蠅幼蟲身上只會有啲短而幼嘅綱毛。如果你見到條蟲身上係啲又粗又長嘅毛嘅話咁多數係其他金蠅嘅幼蟲嚟。
下面呢張圖就可以見到佢哋身上邊有啲好短好短嘅綱毛,而黑色嗰兩個鈎係佢哋嘅口鈎(Mouth hook),可以令我哋容易分辨到佢哋邊一面係頭部邊一面係尾部。
送一張可愛圖片畀大家
要再進一步鑑定嘅話就要放大佢哋嘅氣門(Spiracle),氣門其實係佢哋用嚟呼吸嘅地方。氣門可以分為前氣門(Anterior spiracle)同後氣門(Posterior spiracle),前氣門可以喺佢哋嘅身體近頭部搵到,外形生得好似手指咁,而蛆症金蠅嘅前氣門係得4-7節,最常見嘅會係4-5節左右。多過7節嘅就會係其他品種嘅烏蠅蟲。
後氣門可以喺佢哋嘅pet pet搵到,通常蛆症金蠅嘅後氣門會凹陷咗入身體入面,而其他品種嘅話就會比較凸出嚟。如果後氣門嘅氣門溝(Peritreme)有開口嘅就好有可能係蛆症金蠅,無開口嘅就會係其他無害嘅烏蠅蟲。
呢張圖俾大家睇吓有開口同冇開口嘅分別
當以上提到嘅特徵都吻合嘅話我哋先會鑒定到佢喺蛆症金蠅。當然最準確嘅方法其實係做基因測序(DNA sequencing)。
順帶一提點解佢哋要有兩set氣門呢?咁係因為當佢哋進食嘅時候個頭會鑽入去啲食物入面,前氣門就會閉塞咗。呢個時候後氣門就可以令到佢哋喺進食嘅時候繼續呼吸。
呢張係完整嘅鑑定流程圖
Identification flowchart adapted from Chapter 2.1.10. New World screwworm (Cochliomyia hominivorax) and Old World screwworm (Chrysomya bezziana). In: OIE terrestrial manual. Paris: World Organisation for Animal Health (OIE); 2013.
下面幾張圖係麻蠅嘅幼蟲嚟。雖然佢嘅身上都係得啲幼而短嘅綱毛,後氣門嘅氣門溝都係有開口,但係前氣門就超過7節,所以就知道佢唔係蛆症金蠅嚟。
上面提及到嘅蛆蟲成蟲係乜嘢樣我就冇實物嘅圖片,大家可以參考下面兩條link:
https://www.fehd.gov.hk/tc_chi/pestcontrol/images/Pestnews_33c.pdf
https://www.fehd.gov.hk/tc_chi/pestcontrol/handbook_pest_control/cap4_59-65.pdf
———————————————————————————
如果唔想有啲咁嘔心嘅生物喺你身上出現,就保持清潔,唔好俾傷口外露,都唔好俾烏蠅喺你傷口上面逗留有咩問題歡迎一齊討論。下次嘅話不如同大家講下臨床上嘅真菌。