任何人都要好好保護自己

最近我諗起兩件過咗好耐嘅事，喺度想分享吓，知道唔係個個都會主動講自己嘢但有時係需要講出嚟同埋錯不在你，可能未必有人理解但令多啲人分享返自己嘢都好

1.
小五學校旅行，有兩個女仔拎住開咗嘅蝦條過嚟話佢哋唔食，嗰陣細個乜都唔識又為食，突然有人請嘢食梗係食

隔咗段時間嗰兩個女仔嚟問我攞錢話：食嘢唔使錢呀？俾錢！

我當刻駁唔到，我確實食咗人嘅嘢又唔想賴皮咁樣衰，都決左俾返錢。我嗰陣銀包得返$20定唔知$40，俾晒佢哋

喺等緊旅遊巴返學校嘅時候，其中一個女仔唔知係良心發現定俾人話，話俾返錢我，我因為面子問題而話唔要

而家諗返就覺得當時唔應該亂食人哋俾嘅嘢，就算食完都可以鬥臉皮厚，同埋最後回水應該即時攞返。當買個教訓

2.
呢件事係我中一嗰年發生，嗰陣唔明發生咩事

嗰陣我去學校附近一間麥記去廁所，個男廁有2個尿兜，我入去嘅時候有個中年男人去完離開。我去到開始小便嘅時候個中年男人用個水樽裝我嘅尿，話老婆大肚要用，我當時淨覺得可能童子尿有醫學作用啩

返到屋企同呀爸講佢淨係話唔好俾，而家諗返覺得其實佢都唔知點處理。係近年見到好多me too嘢同埋有唔少男士出嚟分享先發覺當初應該我俾人‘性騷擾’？

呢件事除咗呀爸之外冇同其他人講過，加上早段時間好多人分享返自己嘅故事，我就決定同媽咪講睇佢咩反應。媽咪聽完話唔知俾咩反應，之後又話點解唔入廁格

講之前都覺得會失望而最後都不出所料，我都嘗試喺佢角度諗返件事，佢身為女性未必明男廁生態。男性亦喺社會上一直被塑造為剛強嘅形象，所以都明點解咁少男性會分享自己嘅嘢，分享完冇安慰仲俾人笑

我開呢個po除咗想令多啲人分享自身嘅嘢之外，都想大家唔好譴責受害者，佢哋都唔想同唔識反應。聆聽者唔識安慰人就唔好講咁多嘢，陪喺佢身邊同鼓勵佢就得

小學有個女仔請我食菠蘿冰，咁我好鍾意食當然應承，之後同你個case 一樣佢問返我攞錢，話冇話請我食。咁小學雞怯，驚佢同老師講，就比錢佢。嗰陣小學冇咩零用錢，仲要第一次問阿媽攞錢，勁委屈自此之後，逢親有人請我食嘢我都會拒絕

真係會有陰影，咁細個真係唔識處理，講又驚俾人鬧同笑

講起旅行，小學有個插班四眼仔，開頭完全融入唔到我哋班，唧都唔笑，長期自己ban埋一便
我主動撩佢埋堆，慢慢佢變到好痴我，仲記得佢轉嚟冇耐學校就去旅行，旅行嗰日佢全程跟實我，痴身程度（物理）有如電車痴漢
假以時日佢慢慢open up，個人開朗咗，又透過我識到其他朋友
然後同我哋班其他人熟絡咗之後就唔再同我玩

呢啲又係好惡頂
當體驗吓用完即棄嘅感覺

係既 細個突然發生啲咁既事係會唔識反應 唯有當經一事蔡一智啦 不過覺得果啲人都係欺善怕惡 對住果啲人真係想對佢好啲都唔得

呢個真係好狗

個男人拎你啲尿有機會係想過毒檢

呢啲女正一陰毒臭雞嚟
咁細個就識得敲竹槓掠水

個陣明明糖黐豆咁，唔知點解180度轉變

又有啲老一輩真係當童子尿係補藥
細個親眼見過長輩即場叫小朋友痾俾佢飲

回返樓主
細個真係唔識唔出奇
應該係同想生小朋友或者生左嘅老豆老母講要好好教育下一代
就算出咗事都唔好blame the victim
唔好製造更多童年陰影

咁呢個世界總係有呢啲假仁假義嘅人
老土啲講句真係要帶眼識人