四房細仔猷君娶咗中國名模太太奚夢瑤，二人不時都會上一啲內地綜藝節目大曬恩愛，算係比較高調嘅一位。而佢現年30歲嘅哥哥何猷亨就相對低調，但都有不時同女星傳緋聞，而仍然未娶嘅佢就自然成為城中筍盤。
日前猷君拍咗一條短片，片中佢同哥哥猷亨各自拎先一杯雪糕，猷君話要同哥哥玩鬥快食晒，叫哥哥倒數3、2、1先開始。不過猷亨一數3嘅時候，猷君已經出貓偷步一啖咬落雪糕，猷亨即刻講咗一聲「頂」，就一口食晒一杯雪糕，後來居上。輸咗嘅猷君要飲晒另一杯奶昔，真係睇見都飽；而哥哥雖然贏咗，但都見佢好錫猷君，主動話要幫佢飲埋剩低半杯，見到佢哋真摯嘅兄弟情。
