【政務SEE｜港人北上消費被當「現金奶牛」 深圳按摩師：沒有香港人就沒飯吃了】
港人北上消費力真係愈嚟愈驚人！之前有經濟學家預測一年用840億港元。有中國媒體最近發表文章，形容香港係一個「現金奶牛」，又訪問一位深圳按摩技師戴姐，佢話8成客都喺香港過嚟，仲講笑咁話「沒有香港人，我們就沒飯吃了！」相比之下，香港市道就弊家伙，港人羅小姐參加咗3次夜繽紛擺檔活動，埋單賺咗2,000蚊，大嘆利潤太少喇。
呢篇名為「深圳，猛吸香港錢」嘅文章由「真故研究室」發表，探討港人北上消費，中國人南下旅遊，對兩地零售服務業嘅影響。最吸晴就係將香港人形容為「現金奶牛」，話深圳靠近福田、羅湖口岸嘅主要商圈，湧現一批強烈吼實港人口袋嘅服務業。
福田區商場「深業上城」一間眼鏡店嘅銷售員就話，周末港人嘅消費佔生意額一半；一間按摩店嘅技師戴姐就話，8成客人都係香港過嚟，有香港人、又有喺香港讀書嘅中國學生。戴姐講笑咁講：「沒有香港人，我們就沒飯吃了」。
睇到呢度，阿絲心中感嘆，曾幾何時有一位中國旅客喺香港機場講過：「要不是中央政府照顧你們香港，完蛋了！」估唔到香港人有日翻身變地主......呃，應該係「現金奶牛」先啱。
今次真係風水輪流轉喇，香港人竟然成為「任揸唔嬲」嘅現金乳牛！不過，銀包得一個，北上港人多咗，留港消費就少咗。報道訪問賣韓國衫嘅港人羅小姐，佢嚿年10月參加過3次夜繽紛擺檔活動，但係3次先賺到2,000蚊，除返開日薪低過譚仔阿姐呀。羅小姐慨嘆：「現在本地人都出去消費，又沒有足夠的遊客進來，所以通關之後，生意反而沒有之前好做了」。
報道形容香港商家係「左等右等」，「左等不到足夠多的內地遊客，右也等不到足夠多的本地市民」，仲一針見血，話中國遊客唔止少咗嚟香港，仲孤寒咗，旅客化身「特種兵」即日來回，仲有人揀喺機場候機大廳、麥當勞、避暑中心過夜。
文章慨嘆「十年河東、十年河西。以前是內地客大包小包買爆香港，現在換港人大包小包、穿洞洞鞋走遍深圳」，但講到尾錢銀最實際，文章認為消費力流向攸關城市機遇，深圳緊係想吸引更多港人消費，「當一地的錢減少100億，另一地的錢就可能增多100億。這筆賬聰明人都會算」。
作者話，對新一代中國年輕人嚟講，父母去香港搶奶粉，似乎已經係上個世紀嘅事，而香港人嚟深圳玩，對佢哋嚟講變得稀鬆平常，理所當然。而且愈嚟愈多嘅深圳人去香港，都有一個疑問，香港仲有咩係深圳買唔到嘅呢？
阿絲作為一個「現金瘦牛」，好想大聲講，以前香港有好多深圳買唔到嘅嘢，例如六四集會、七一遊行，有唔少中國遊客旁觀、甚至低調參加，呢啲都係錢買唔到㗎。
#光傳媒
仲要開咗關先至有返
