香港燒鵝舉世聞名，其中又以甘穗煇創辦的鏞記名氣最盛，姑勿論是否全港最好吃，但全港最出名的燒鵝一定非鏞記莫屬，而鏞記二代掌舵人甘健成的長子甘崇軒開設「甘饕燒鵝」，次子甘崇轅開設米芝蓮一星的「甘牌燒鵝」，皆是燒鵝界的名店，可謂一門雙傑。可惜日前藝人盧覓雪幫襯後意外發現甘饕燒鵝將於3月17日結業，並稱問及老闆娘搬去哪裡，老闆娘表示「諗住上內地搵商機，喺度真係搞唔掂喎～」。
藝人盧覓雪的帖文一出，立即引來不少網民回應。對於甘饕燒鵝突然結業的消息，網民並未一面倒地表示不捨，有人認為上內地搵商機未必有，可能危機更多：「上內地？危機就有！做乜咁睇唔開？祝好運。」、「而家先北上鬥平，諗清楚好喎」；也有人表示甘饕燒鵝質素一早變差：「我以前都成日去，但之後真係真心覺得難食咗好多！」 當然也有甘饕燒鵝的支持者表示可惜，「「呢間唔做幾可惜，燒鵝、老火湯都好正」；又有人認為：「冇辦法啦，香港做生意頭號殺手就是租金！就算你幾叻都冇用，每月生意做埋都唔夠俾租！祇有排隊等結業，無奈！無奈！」
https://hk.news.yahoo.com/%E9%8A%85%E9%91%BC%E7%81%A3-%E7%87%92%E9%B5%9D-%E5%90%8D%E5%BA%97-%E7%94%98%E9%A5%95-%E7%B5%90%E6%A5%AD-%E7%9B%A7%E8%A6%93%E9%9B%AA-000342165.html
