讀白 read this lines

對唔住，我連同任何人講，就算係應該最親嘅你講嘅勇氣，所以選擇喺度冰冷冷咁打字打出嚟。

—————————

我好記得我識你嗰日。

我喺連城商場唔見咗電話，用隻apple watch開尋找，行嚟行去，希望會聽到部電話響。我唔知道自己兜咗幾多個圈，兜兜吓見到你，我第一句說話係同你講：「我唔見咗電話，快啲陪我一齊搵吓」

當時嘅你只係一個好唔熟嘅同學，朋友搭朋友咁食過幾次lunch，任何功課同分組都冇交一齊過，可能係因為屬於風度。

兜咗一排，你問我其實如果真係響咁我會點做？如果對方係一個黑社會咁我點算？如果對方係一個小朋友咁又點算？又或者根本搵唔返又點算？其實只係好簡單嘅問題，但係嗰刻嘅我乜都冇諗，仲覺得你好有智慧，應該就係呢個錯覺，令我日後鍾意咗你。

Many a start is born from a misunderstanding, where beauty is not guaranteed, yet the end is often abhorring.

「我諗部電話對你嚟講一定好重要，一定有特別嘅意義，我個電話都有好多屋企人珍愛嘅相，如果我唔見咗我都會好唔開心」

你用社工嘅口吻去安慰我，同時我read到你嘅意思係唔想再搵落去，想收隊。我都好識趣咁話唔打攪你，我好親切咁同你講如果有事你行先，我仲想搵落去。

「你想搵到幾時？我哋要plan吓。」
「Plan鬼plan馬，嗰個人執到我部電話，應該都已經離開咗呢個商場…」
「所以咁搵落去意義唔大」
「係無意義，不過部電話係一個對我好重要嘅人送俾我，所以我好想搵返。」
「咁不如我請你食嘢」

然後我哋開始咗第一次食飯，係喺大圍嘅一間燒味店。我都唔記得咗佢個名，依稀記得附近有一間小學。但到而家我依然唔明白，點解有男仔帶女仔去第一次食飯嘅地方係燒味店？

「你個電話係男朋友送俾你嘅？」
我把口想答「我冇男朋友」，不過有唔想俾佢試探到我感情狀況，所以我話「唔係」
「咁你唔見咗個電話係咪會有人鬧你？」
「咁又唔會」仲唔係想試我有冇男朋友鬧？

然後整餐飯我都好冷言冷語，將個氣氛拖到好陌生。

好怕人鍾意自己，因為總覺得談戀愛係好麻煩嘅事，而且無奈之前先俾一個控制狂追，當時仲未走出對異性嘅陰影。

走嘅時候，我多謝咗佢，畢竟佢陪我兜咗半個鐘又請我食飯，我話下次返學同返你食飯啦。我心裏面盤算係夾返一頭半個月先約佢食，費事太熱情佢亂諗嘢。

佢問我仲會唔會買返iPhone，我話一定會，因為部電話真係一個好重要嘅人送俾我，就算唔見咗我都唔想換第二個Model。

部iPhone係嚟自一個叫阿正嘅男仔。

中學嘅時候我讀女校，阿正係補習班識嘅朋友，阿正係一個唔係好讀書，但係屋企都算幾有錢嘅人。嗰陣時我屋企環境有少少問題，自己讀書又唔算好叻，所以只能慳兩個月錢，先報到一期睇錄影嘅補習。

嗰個補習班嘅人應該有10幾個男仔都一齊上咗堂成年，大家都好熟。但淨係喺佢哋圈子裏面最外向最多嘢講最嘈嗰個，由我補習第一日，佢就帶頭咁話：

「哇有女校嚟嘅，純情學生妹，可惜唔戴眼鏡嘅…」

我冇乜點接觸過男同學，第一次接觸就係咁誇張，除咗嚇親之外唔知點解又覺得好得意，好好奇。

阿正主動咁坐咗喺我隔離，我面都紅埋，仲有少少想喊，但唔係反感，只係不知所措到極點。

成個補習班嘅男同學都話阿正整喊喎，喺度起哄，直到職員入嚟播片叫大家靜吓，先有返秩序。

第一次補習嘅時候覺得好難跟錄影片段，因為本身英文底子差。課堂當中阿正其實係個好正經嘅人，佢自己係咁抄筆記同留心聽，但係都偷啲時間出嚟照顧我，盡量解俾我聽點解點解。


One facet of change is the inability to reunite with those familiar, and dear.