[多圖多字] 獨遊8日長野、金澤、福井之旅

《肉匠Jade金澤》

除咗「麵屋大河」，「肉匠Jade金澤」都係我上次嚟金澤冇食到覺得可惜嘅餐廳

肉匠Jade係一間專食能登牛嘅燒肉餐廳
正好今次冇得去能登半島，就當呢餐俾我達成心願啦

係呀...你無睇錯 我今晚係食2餐

「肉匠Jade金澤」位置其實都喺車站附近，非常方便



燒肉店嘅座位數量唔多，一定要提前book位
可以經Google Maps直接有條link book
上次我無book到，今日就學精！

入面嘅格局比較有格調
所有嘅座位都係以包廂形式，有啲係全密封式，有啲就係半密封式
喺度用餐私隱度比較高



一個人嚟食竟然安排全密封式嘅俾我
我都有啲唔好意思


坐低之後就開始睇吓Menu




全程都係用平板電腦落單，英文中文都有
同時仲會揀埋鹽燒定醬燒


店員會先擺低調味料同牛油


我覺得最好嘅地方係呢度可以半份半份咁叫
1-2個人黎食就可以叫多啲唔同嘢食

除此之外亦都有啲combo都可能比較划算，乜都有啲咁


能登牛相比唔少日本和牛品種名氣冇咁大
但係佢難得之處係能登牛每年產量係不足1千隻 (好似神戶牛松板牛每年產量就超過4千隻)
所以基本上唔會出口去其他地方，只會喺石川縣先會品嚐到

上能登牛牛肋肉 (上カルビ ¥990 半份)
上能登牛里肌肉 (上ロース¥990 半份)


牛肋肉一向都係油脂好多，咬落去就化開，肉質超級柔嫩


里肌肉相對肉味會濃啲，咬落去油脂咁冇咁重，肉感比較強， 比較適合冇咁鍾意成口油嘅人士


特選能登牛稀少部位牛三角 (特選三角バラ¥1390 半份)


三角バラ本身就係牛五花裏面比較高級嘅部位
霜降油脂分佈均勻，有齊豐富油脂再加埋濃郁嘅肉味
成個口感都好滿足，價錢貴少少都絕對值得


另外再叫左份上能登牛手握壽司 (￥790)


左邊熟少少係里肌肉， 烤一烤有助將啲油份逼出嚟，唔會太膩，不過略嫌上面嘅薑蓉味道太重蓋過肉味
右邊嗰塊係赤身，冇烤過，雖然有份較少，但牛肉味就濃好多，咬落去都好軟淋

雖然能登牛名氣確實唔高，但熟悉和牛嘅人都知道能登牛係絕對可以同十大和牛媲美
同附近嘅飛驒牛比，飛驒牛更加油膩，但能登牛就會更齒頰留香
所以點解和牛會分咁多唔同品種，就係因為唔同派別都總有自己長處

換網/加水 都可以直接用平板落order


肉匠Jade金澤
https://maps.app.goo.gl/daRZvnPJxxoZgMgV8

肉匠Jade去金澤一定試

記得book定位

1/2/2024

今日早餐就喺酒店搞掂

啲選擇多到呢


又有少量刺身畀你整手捲食


仲要講多次，我今次酒店只係用咗$230咋
早知之後兩晚我都繼續住呢間啦

食飽飽就拎埋行李去搭車喇



《福井縣》


當我同其他人講我去福井縣
最多人畀嘅反應就係「下 邊度嚟㗎 / 核污水喎」
然後我就要解釋喺石川縣隔離㗎咋，核事故嗰個係福島呀

但就算有人識福井縣，大家都對呢個明明大阪上嚟都係一個鐘多啲啲嘅地方一問三不知

福井縣係一個同樣盛產海鮮、山海資源豐富嘅北陸地區
尤其以擁有日本高級蟹品種-越前蟹而聞名
而且傳統工藝亦都係全國聞名，亦有好多香港人都噏得出嘅加賀溫泉
最把炮就更係曾經連續多年拿下全國最快樂城市嘅頭銜

今次名義上係第二次嚟福井縣
但實際上之前都只係去咗敦賀嗰邊，敦賀以北嘅都冇去過
咁就等我淺嘗下福井縣呢個地方啦

呢日天公不做美，黎到福井嗰刻落緊毛毛雨



去酒店擺低完行嚟就即刻返嚟福井站呢邊

由於北陸新幹線會喺3月16日通車，所以車站嘅設施都加緊佈置



例如啲手信店、藥妝店、眼鏡舖、餐廳等都會相繼進駐
(提提大家，喺車站嘅藥妝店未開之前，最近嘅大型藥妝店都要步行差唔多三個字先有)


好彩我仲趕得切係通車前出到個blog

JR福井站東口一出向左望就會係えちぜん(越前)鐵道站
同一個位置亦都有京福巴士售票中心


福井市嘅景點主要都係要依靠巴士
我會喺福井縣留三日
所以就需要嚟到京福巴士售票中心買我需要嘅巴士票


京福巴士為咗方便旅客推出咗好多唔同嘅巴士pass，畀旅客搭配各自行程使用
• 東尋坊2日Pass (僅三國町内行走)
• 永平寺、丸岡城、東尋坊2日Pass (超推薦)
• 一乘谷朝倉氏遺跡、永平寺1日Pass (超推薦)
• 越前海岸2日Pass
https://bus.keifuku.co.jp/rosen-deals-ticket/

而且就住個別嘅景點
京福巴士都有提供一啲特急巴士畀大家直接去到，唔一定要搭啲Local Bus

永平寺、丸岡城、東尋坊、一乘谷朝倉氏遺跡 巴士交通方法 可以參考埋京福巴士官網
https://bus.keifuku.co.jp/rosen-tourist-spot/

我頭2日就買咗永平寺、丸岡城、東尋坊2日Pass (￥2500)

もりもり寿司性價比都超高

雪吊係北陸周邊都好普遍
係高山都見到

係呀 北陸地區本身都好常見雪吊
嗰邊嘅雪比較濕同重
唔吊一吊好易壓爛

小弟都係好鍾意兼六園入面嘅雪吊 擺埋一齊覺得好有美感

俾我收服埋啦

出嚟啦啟暴龍！

師兄，你介紹肉匠Jade金澤 好正喎

啱晒我呢啲食肉獸

緊係啦伏野我唔會介紹啦

全程用左幾錢
日本食野真係好抵 又高質

9千左右啦
不過係因為有個別幾餐食得比較貴，如果唔係都好經濟實惠

《大本山永平寺》

福井縣行程嘅第一站就係「永平寺」

「永平寺」係其中一個京福巴士有提供特急巴士嘅景點
班次： https://bus.keifuku.co.jp/rosen-season/eiheiji-liner/

喺JR福井站東口3號站就可以上車


「永平寺」係位於深山裏面，就算特急巴士都要搭半個鐘先到

落車之後就繼續向前行


有兩條分叉路
左邊呢條直上比較多商舖，右邊上嗰條就係正式參道



冬天有好多舖頭都冇開


行到最上就開始踏入「永平寺」嘅範圍


「永平寺」歷史悠久，喺1244年由道元禪師創建嘅佛教禪寺
係日本禪宗支派曹洞宗嘅總院，亦係日本禪學重要聖地之一
寺廟而家仍然活躍，裏面有過百名僧人喺度禪修


四周被好多超過600年樹零齡嘅巨型杉樹包圍，寺廟內有超過70棟建築物


由於喺深山裏面，環境清幽
小橋流水、靈性杉樹應有盡有
在配合埋白雪就更加令成個環境變得更神聖






「唐門」
成個寺廟最多人影相嘅位就係第一個參拜嘅「唐門」
絕大多數情況下都唔會開放，除非有新住持或者重要賓客先會打開



之後就正式進入寺廟內參拜



入場費￥500


喺寺廟內係唔可以著鞋，所以入場前會畀啲膠袋畀你套住自己對鞋
有需要你都可以用佢哋呢度嘅擺鞋locker


跟住大家就可以跟住佢個參拜巡路一路行


「傘松閣」
呢度係一個用大概160塊榻榻米組成嘅大廳
只要抬頭望就可以見到230福花鳥主題嘅名畫


「七堂伽藍」
由七個堂所組成
包括：僧堂、法堂、佛殿、大庫院、浴室、山門、東司
(佛殿)
(法堂)
(大庫院)
(山門)

配合埋雪景，令到周圍都有一種沉靜嘅感覺




成個寺廟用呢啲木造嘅通道/樓梯貫穿所有建築




冬天落雪嗰陣，遊客只可以行室內嘅通道
好多室外範圍基於安全原因係封鎖咗唔畀人去嘅

雖然名氣大，但始終都比較少遊客嚟
一個人喺度行，周圍又冇人， 靜到有啲令我怕怕地
拿 我就冇做開虧心事嘅



出口位置


出返嚟沿住參道落返去，成個環境都好靚





返到巴士站等車，直接殺去丸岡



「永平寺」絕對係一個會令你身心都靜落嚟嘅地方
會覺得呢度好莊嚴，遠離塵囂

《ヨーロッパ軒》

曾經有個日本節目係問福井人有咩好嘢食推介
結果大部分人都係話「ヨーロッパ軒」炸豬扒飯

作為咁出名嘅b級美食又點可以唔試下呢

我下一個景點係打算去丸岡城
咁啱喺丸岡城附近就有一間「ヨーロッパ軒」


「ヨーロッパ軒」其實唔係啲乜嘢名貴餐廳
係福井縣嘅一個連鎖洋食家庭餐廳
由曾經喺德國柏林學廚嘅日本廚師高畠増太郎喺1923年創立，歷史悠久
總店就設喺福井市福井城址大名町站附近

裝修樸實，食品家常便飯，價格親民


除咗炸豬扒飯，亦都有蛋包飯、漢堡扒呢類

我就叫咗呢款 カツ丼 セット (炸豬扒飯set ￥1530)



計返港紙80蚊都唔使就可以食到一碗有三大塊豬扒嘅丼飯，仲有湯有沙律
真係好抵

啲豬扒係真係好大塊


講返味道
嘢食送到面前已經會聞到一陣好濃烈刺鼻嘅喼汁味
原因係高畠増太郎當年就係喺德國品嚐到喼汁，就將喼汁同日本嘅炸豬扒融合
烹調過程中會將豬扒粘上好薄嘅粉漿去炸，炸完再浸落用喼汁做底嘅醬汁

大家平時食慣酒樓牛肉球蘸喼汁都會知喼汁係聞落攻鼻，實際食落傷害性無咁大
呢個豬扒都一樣，擺落口其實係有吊味嘅作用，唔會太酸
而且外皮炸到好脆， 配合埋酸味唔會覺得好油膩


不過酸味嘅嘢始終唔係個個啱食
我自己都麻麻地喼汁，嗰種刺鼻咁令我唔係幾舒服
但食物質素嚟講，係好出色嘅洋食家庭餐廳

既然作為福井代表性嘅食物，不妨考慮試下囉

食完飯出嚟，出面橫風橫雨
啲風吹到符符聲


我企咗喺巴士站等咗一陣都仲係咁差
最後宣佈放棄丸岡城


搭巴士去蘆原溫泉站再轉jr返福井

丸岡大家其實可以揀巴士直接返福井市，或者好似我咁巴士轉jr
時間上差唔得幾多，純粹我搭巴士易頭暈，可免則免

《福井站》

呀 又真係吹脹
返到福井就停曬雨，甚至啲雲開始走緊

講到福井縣嘅生物，除咗蟹最出名
排第二嘅就一定係恐龍

從前考古學家喺福井縣挖掘到好多恐龍化石同相關嘅生存證明
所以福井縣都設立咗一個國際性嘅恐龍博物館，畀大家了解多啲恐龍

不過由於時間同興趣關係，我冇安排去恐龍博物館啦
歡迎大家同我分享！

不過喺車站附近都整咗幾個恐龍模型，係福井站嘅signature




如果你住東橫inn就可以望得好清楚

喺評價一個城市係唔係先進/一線，有冇地下鐵路往往會係其中一個指標
所以好似五大都、仙台、關西地區，地下鐵路係其中一個重要嘅交通工具

而福井市作為日本嘅二三線城市就當然唔會有地下鐵
不過就有象徵歷史嘅路面電車
大家睇過就算喇，喺福井市遊走唔太需要福井電鐵


慢慢行返去酒店休息下

途中會經過些Seibu商場，應該算係福井站附近最大型嘅商場
但都只係一啲舊式小型百貨公司
樓下都有個細細地超級市場


我total喺福井會住兩晚，都係住喺Dormy inn premium


福井站附近最唔好嘅係冇超級市場/商場
夜晚想落去買啲嘢都唔得
如果畀我再揀多次，我可能唔會住福井，寧願每日花多啲時間由金澤出發

如果大家想搵食嘅話，主要都係集中係福井站 / 福井城址大名町站 個頭
會比較多開得夜少少嘅舖頭


福井市內比較少超級市場，取而代之係好多呢啲藥妝店擔當埋超級市場個角色
裏面除咗有藥妝外，亦都有食物蔬菜
不過留意呢類型嘅藥妝店都唔係以遊客群為主，唔設免稅，但價錢同大城市免稅嘅藥妝店差唔多

《鮨十兵衛》

如果話雪屋係我最期待嘅景點，「鮨十兵衛」就係我最期待嘅一餐


「鮨十兵衛」已經有40年歷史
係福井縣數一數二出名嘅餐廳，亦都係全國評分極高嘅壽司店
更加曾經喺2021年奪得米芝蓮兩星
Tabelog 4.39分 連續7年拎銀獎

要預約食佢非常之困難，一般都要提前1-2個月預約
但居然畀我半個月前執到唯一一隻雞！

「鮨十兵衛」比較遠離福井站
比較建議大家喺福井站搭京福巴士10/11/15/16號站
去到 境町 / 文京六丁目 落車再行5分鐘


「鮨十兵衛」門外係咁樣嘅


我就企咗喺門口食住風等咗幾個字
先有人開門招呼我哋入去


可惡...我被安排坐最邊嘅位
淨係可以望住學徒幫大將做嘢


店員會畀個飲品餐牌畀你
出於禮貌，我都叫咗杯烏龍茶
(無錯...小弟廢J唔飲酒的)

平時嘅晚餐一般都係料理 + 壽司
但11月至2月係福井縣越前蟹解封嘅日子，所以呢度嘅晚餐就會加多咗一味越前蟹
當然價錢都會貴一截啦 (￥33,750)


學徒喺面前磨緊芥末


等到大家都settle好曬，大將就行出嚟

好多老字號壽司店嘅大將都係上咗年紀嘅師傅
但「鮨十兵衛」嘅大將居然只係一個四十出頭 大大隻嘅男士 - 塚田哲也


塚田先生曾經喺北海道做學徒，之後返到嚟承繼家業
結果就將呢個品牌發揚光大
成為西日本數一數二嘅壽司大師

塚田先生同學徒陸續開始處理食材同擺盤


牡丹蝦 & 鮑魚 (附海鹽/豉油)
牡丹蝦係來自優質飼養環境嘅富山灣，口感柔綿細緻又帶少少黏著口感，味道好甘甜又留有餘韻，上面再灑咗少少青檸皮令到蝦嘅鮮甜味更加突出
鮑魚都好得人驚，超級爽脆，好似食緊軟骨咁，而且好濃嘅貝殼海鮮味



鰹魚刺身
鰹魚表皮輕燒過，少少香脆
魚肉咬落去一梳梳咁散開，但又好實好嫩，就好似1822運動小鮮肉肉體咁
鰹魚本真係甘酸味喺口腔停留好耐
本身醬汁都係柚子醋再溝豉油


蒸白子配海岩紫菜
我未食過熟嘅白子，本身仲諗緊係啲咩嚟
白子滑過平時蒸蛋好多，正到爆，喺個口度爆出嚟oh my god
醬汁係用咗海岩紫菜加高湯勾芡



越前蟹
喺拆肉之前會拎畀大家打卡，成1kg嘅越前蟹好大隻
當大家打完卡，大將同學徒就會分別拆蟹，再分配畀大家
10隻字概括：蟹肉極鮮甜，蟹膏香到爆
我完全好味到speechless




北海道鮟鱇魚肝 + 蒸八爪魚
鮟鱇魚肝一向被譽為海鵝肝，入口好creamy，完全唔腥仲好香魚味
八爪魚好軟淋，咬落去鹹味同甜味互相都好夾

《鮨十兵衛》(續)

喺我哋食緊蟹同魚肝嘅同時
就代表即將踏入壽司環節
大將已經開始切緊魚生，而學徒就幫手拎切好嘅魚生去浸泡醃製



大將幾有功架


真鯛壽司
油脂比較多，魚肉質地較為軟身


深海池魚壽司
魚肉爽嫩，魚油香氣好足夠


福井鰆魚壽司
呢個超級好食，魚肉嫩滑，油脂感強，魚油味超突出


魷魚壽司
魷魚好甜，肉質唔會太潺


櫻花鱒魚壽司
雖然係鱒魚，但絕對唔係大家心目中3蚊舊個種
而係來自淡路島， 係非常高階嘅三文魚類
超級肥美，甜味超濃
又係一味令我超震驚嘅


甜蝦壽司
甜蝦肉質好綿，充滿甜味


冰見寒鰤壽司
本身鰤魚已經係出名甜美脂肪，而冰見寒鰤更加係鰤中之鰤
鰤魚食落去比較甘甜，有魚油嘅香氣，但又有種清爽嘅口感


福井鯖魚壽司
鯖魚亦都係福井比較常見嘅魚，係若狹灣嘅主角之一
肉質好清爽，不過我本身對於魚腥味比較敏感
其實大將已經處理得好好，只係我個人真係唔太鍾意鯖魚


海膽壽司
用咗北海道小川海膽，好甜好甜好甜


小肌壽司
本身嘅味道好濃，但同鯖魚一樣都唔係我杯茶


味增湯


蔥花吞拿魚蓉軍艦
塊紫菜好脆
吞拿魚蓉油到不得了，好犀利


雞蛋蛋糕
好綿，好濕潤，好重蛋味


食材選擇、師傅手握能力、食材調味 同 壽司醋飯
「鮨十兵衛」係呢四方面都掌握得好好
醋飯唔會太過黏，味道亦都平衡得好，無論係調味咗嘅刺身定係直接食，都唔會令醋飯喧賓奪主

食完成個set，就到大家單點時間
但食咗咁多樣我已經好飽，就無再加單

同時我亦都好多謝坐我隔離嘅一位福井縣嘅年輕人
佢識講基本嘅英文
多得佢，有啲魚我先知係咩，同埋可以同大將溝通

亦都多得佢，令我更了福井縣面臨住年齡老化嘅問題
好多年輕人都唔願意留喺福井，紛紛前往附近嘅大阪名古屋東京發展
令到福井縣冇曬朝氣
可能喺老一輩眼中係最幸福嘅城市，但喺年輕人嘅眼中可能只係避之則吉嘅城市

成餐飯食咗兩個鐘多啲
夜晚6:30開始，食到8:45

發現自己漏左飲品menu




埋單之後我都急急腳跟住google map行去最近嘅 福大前西福井站
趁隔離嘅超市仲未閂門，買返啲乾糧返酒店



既然喺越前鐵路隔離嘅超市買完嘢，咁我就直接搭鐵返去
淨係收現金㗎咋

-------------------------------------------------------------------------

「鮨十兵衛」
預約方法
1. 提前2個月係上網預約
https://www.tablecheck.com/shops/sushi-jubei/reserve?utm_source=google
2. 每個月1號10am (日本時間)，會喺上面同一條link放出下個月晚上6:30環節2個名額
https://www.tablecheck.com/shops/sushi-jubei/reserve?utm_source=google
3. 電話預約

用餐選擇
午市
• 逢星期一至五及日 12:00
• ￥15,400
• 提供12至13件壽司
晚市/星期六午市
• 3月至11月 18:30
• ￥26,400
• 5-6份料理及12-13件壽司
越前蟹晚市
• 11月至2月 18:30
• ￥33,750
• 5-6份料理、11-12件壽司、越前蟹料理

鮨十兵衛
https://maps.app.goo.gl/uvueSRjkKUoEbjjEA

2/2/2024

今日日頭主要行程都集中嘅三國町

有jr pass再加埋琴日買嘅京福巴士pass
所以我前往三國町嘅方法就係jr搭去蘆原溫泉再轉巴士85/97號

《雄島》

提起三國町，通常啲人都淨係諗起最出名嘅東尋坊
當然我都會去啦

但去東尋坊之前，我就先去一個叫做「雄島」嘅地方


「雄島」係位於東尋坊隔離嘅小島
係1200萬年前噴出輝石安山岩嘅岩石島
面積大概10公頃，係越前海岸最大嘅島

呢個島本身都有好多傳說
就好似喺東尋坊自殺完屍體就會飄過嚟，所以就話呢度陰氣好重

冬天要去「雄島」係要喺附近嘅安島站落車


再中間穿過啲民居行落去



當見到停車場就代表你已經喺入口喇


唔係冬天嚟嗰陣，巴士喺呢度有個站可以直接上落車


連接住雄島同安島嘅係一條長224米嘅紅色雄島橋
亦只有呢個方法先可以去到雄島



成個感覺就好似仙台松島嘅福浦島同福浦橋咁

今日氣象廳話係強風同大浪，喺條橋畀啲風吹到好辛苦
腦裏面就好on99咁ff會唔會行行下海水暴漲蓋過條橋



雄島正面嘅岩石係柱狀節理，睇上嚟好密集
而呢種亦被稱為蜂窩狀岩石


望返安島，其實就係一啲小漁村


離遠都可以見到東尋坊


雄島嘅正式入口係一個鳥居，裏面有一個小神社
但係好多留言都話行入咗鳥居之後會遇到好多靈異事件



不過先唔講會咩靈異事件
成個島得自己一個，又大風又凍，真係怯怯地

有間屋仔本身應該係有賣御守/求籤，但而家都人去樓空


成個雄島得幾條路可以行，斷估唔會蕩失路嘅
不過我就淨係行一半，先由雄島燈台嗰條路行，再兜返去左邊大凑神社
記得唔好逆時針呀，呢個係另一個傳說話會冇命返去


唔知呢個係之前地震整爛定係日久失修


條路好易行，主要都係石路為主，泥路為輔



行幾分鐘就會見到燈塔
如你所見其實係冇特別


但係呢度望出去已經直接係海岸線


週圍啲草都枯曬，更加令到成個環境都好幽靜


見到呢塊瓜割之冰指示牌，隔離有條路就可以行落去


瓜割之冰其實係講緊雨水滲落地下再喺岩石嘅裂縫滲返出嚟
而呢啲雨水據說係凍到擺一個西瓜落去會裂開

不過望咗幾眼都唔覺有水畀我摸
同埋我份人又比較細膽，唔敢周圍亂行，對於攀爬呢啲石比較冇乜信心


企喺海邊聽到啲浪拍打喺岩石嘅聲好清脆
亦都好清楚睇到成個流紋岩嘅節理


慢慢行返上去



好快就會見到 大凑神社


大凑神社有個對正個海嘅鳥居


其實成個神社都已經好舊，完全唔覺有人管理



仲有樣嘢分享，喺雄島係用唔到指南針
因為島上面有磁石岩影響住指南針嘅運作

就係同東尋坊距離近，所以先好多人話喺嗰邊自殺完嘅屍體會隨海水漂流過嚟


就係有咁多嘅原因令成個雄島都充滿住神秘嘅感覺
嚟到呢度就好似探險咁
加埋望住個海都幾寫意


如果咁啱過嚟東尋坊，不妨巴士搭多兩個站過嚟呢度行個圈

慢慢行返雄島橋回程，好彩安然無恙



去返同一個巴士站繼續前進，就去到三國港站

睇完巴打去雄島
我都想去場雄島行仲圈

我之前諗住 東尋坊再落三國港
之後就返歸
而家加埋雄島 咁有神秘感 好似又幾得意

《三國港站》

三國港站本身係越前鐵路三國蘆原線嘅總站
有部分人亦都會選擇嚟到呢度再轉成巴士去東尋坊，時間上確實會再快少少


三國港站對面有個三國魚市場


嚟到呢度可以買啲海鮮再行過去隔離座位區用餐
而座位區入面亦都會有售賣白飯同麵豉湯


不過冬季係休業嘅

買咗罐紅豆湯拎住一路行一路取暖
之後有飲埋嘅，不過真係好甜囉


三國港站有少量嘅民居、餐廳、捕魚維生嘅人士
環境相對比較清靜，或者冷清




行行下就11點，夠鐘做正事


《越前蟹之坊》

之前一路強調我嚟福井係要食蟹㗎嘛
尋晚嗰餐得幾啖蟹肉邊夠我食㗎

所以我就一早book咗呢間喺三國港站隔離嘅「越前蟹之坊」
專食越前蟹嘅舖頭



一入舖頭已經見到幾個杠養著好多蟹



呢度嘅座位係開放式嘅包間，叫做有少少私隱啦



事不宜遲，先畀咗餐牌大家睇
午餐會有啲經濟實惠嘅海鮮丼，評價都唔差




不過我由始至終都只係專住喺兩頁紙度
左邊：根據返蟹嘅重量而計錢，可以選擇煮蟹 或者 蟹刺身&燒蟹
右邊：有一人同兩人嘅豪華餐，一個餐有齊曬咁多種煮法


比較咗一陣
我最後就揀咗左邊嘅”凪” (500-700g) (￥13,200)
另外再加多￥1850轉做set

因為右邊嗰個雖然乜都有，但得400g蟹之餘仲要￥22,000
我就覺得好似我咁樣叫會比較抵啲
同埋尋日已經食咗煮蟹

如果你哋係兩個人嚟，我都比較推薦可以好似我咁叫左邊嘅
一個要煮蟹，另一個要蟹刺身&燒蟹，咁就3樣都可以涉獵到

我另外再加多咗個せいこ蟹グラタン (芝士焗雌蟹肉蟹膏￥1480)

超香芝士味，好邪惡
表皮烤到有一層薄薄嘅脆塊
勁多蟹肉同蟹膏



呢個就係加￥1,850轉嘅set
都好抵轉㗎


嗰幾件刺身都唔差，該有嘅油脂、肉質都係上乘


刺身部分就終於上菜喇，用蟹腳做成刺身



刺身好有彈性，好似食緊蒟蒻絲咁
味道好清甜
無論係點少少微微鹹味嘅豉油 定係落啲啲青檸汁都更加帶出蟹嘅甜味
我好囂張㗎，仲特登係ig story鋪自己將條蟹腳擺落個嘴度啜曬出嚟


燒嘅部分主要就係蟹鉗/2隻蟹腳位，同蟹蓋會做成甲羅燒


啲蟹膏口感實淨，真係超級香
個鹹香膏味好濃好厚，完全忍唔到口
再撈一啖飯更加覺得自己好奢侈



我亦都將個蟹身嘅肉刮曬出嚟，同埋蟹鉗蟹腳一齊食
肉質感覺會實在啲，但冇咁水嫩，乾身啲嘅
但正因為冇咗嗰啲水份幹擾，係直接食緊蟹肉自己嘅甜味，口係唔會有其他感覺阻礙你


￥13,200 + ￥1,850 食到咁嘅嘢除咗抵食我都諗唔到有咩形容詞
而且唔係午餐，晚餐都係一樣價位
想食蟹真係唔可以錯過「越前蟹之坊」




大概成餐飯食咗我2個鐘
刮蟹身啲肉都刮到我手軟，但又唔捨得唔刮乾淨

預約方法
Email直接聯絡店家 (kaninobou@bouyourou.co.jp)，用英文完全冇問題
但留意只接受11:00 / 17:00時段嘅預約
其他時間需要自己過嚟walk in攞飛排隊 (大概每輪人士都食個半鐘架)

營業時間
越前蟹解禁期(11月-2月)：平日11:00 - 15:00 / 假日11:00 - 15:30 / 每日17:00 - 20:00
其他月份： 平日11:00 - 15:00 / 假日11:00 - 15:30

越前蟹之坊
https://maps.app.goo.gl/r999rKwhZFhSmmi36

雄島 東尋坊 三國港
呢3個地方一日都輕鬆搞得掂~~

《東尋坊》

食飽飽就行過對面搭巴士繼續進發


喺三國港站搭幾分鐘巴士就已經會到東尋坊
落咗車之後沿著條路一直行入去就會係目的地



沿途有好多餐廳、手信店、小食店
大家都可以喺度食蟹㗎



行到最盡嘅位就會係勝地



「東尋坊」取名自舊時一個傳說
當年平泉寺有個法力高強嘅和尚，叫做東尋坊，成日蝦蝦霸霸
後來同另一個和尚一齊爭女，結果畀嗰個和尚聯同其他和尚推咗落懸崖
以東尋坊嘅怨念好深，最後要搵嚟大師先收服到
而當日佢畀人推落嘅懸崖就命名為「東尋坊」

我就唔知上面呢個故仔係咪真啦
但我淨係知望住個海真係好舒服


嗱 睇唔睇到好遠嗰度就係我今朝去嘅雄島喇



東尋坊最有代表性嘅就一定係綿綿一公裡長嘅岩柱群
成個陡峭高低差好壯觀





仲可以一路向出行
你夠膽嘅就可以行到最出嘅位置


我就梗係唔夠膽啦
小弟畏高人士，要我行喺啲石上面已經腳軟


浪大嗰陣周圍都啪啪聲
氣勢十足




呢條荒磯遊歩道今日封咗



呢度仲有一座東尋坊塔
即係畀少少錢喺高啲地方睇咁解囉 (￥500)
我就冇上去喇


求其喺當買咗算魷魚食
老闆仲係咁提我要喺有蓋嘅地方食
話東尋坊呢度啲雀仔好惡死，真係會擔走啲嘢食喎



行完呢個東尋坊我就完結咗三國町嘅行程
其實都仲有個地方係冇去到，好似附近有海洋動物館咁

係喎，一開頭嗰陣唔記得講
福井縣嘅京福巴士喺我去嘅時候都仲未支援IC卡
不過嚟緊已經可以用到㗎喇，話春季可以推出
唔少巴士其實都已經裝好咗部機

《福井市內》

返到市區晏晝三點幾就周圍行下

呢度係福井市政府廳
原先係福井城



呢度都仲有個結成秀康公像 (德川家康嘅第二個仔)


稍為行遠少少福井站，住宅民居都係呢啲兩三層樓高嘅
係一個好令人舒服嘅小鎮感覺


由於福井縣嘅公共交通工具唔算發達
好多戶人家都有自己嘅車代步

如果想了解多少少福井縣嘅資料，可以參觀「市立鄉土歷史博物館」



《養浩館庭園》

養浩館庭園係福井市比較有特色嘅庭園
係江戶時代福井藩主松平家嘅別邸
喺1945年遭空襲受創，1982年重建而成


門口條路叫做武士之道


入場費 ￥350


講真，我都諗咗一陣入唔入嚟
幾日前先喺兼六園行完，仲點會對呢啲小庭園有興趣
抱住當休息下嘅心態說服自己入咗嚟

行入去就已經係幾個座敷和台所、湯殿組合而成嘅房邸


要除鞋入去



入面嘅格局係充滿江戶色彩
就係平時睇日劇嗰啲



行到深處好多窗望住出面嘅湖
成件事好有詩情畫意




而且呢度秋天嘅時候係好熱門嘅賞楓之地
坐喺室內望出去會係全部都紅葉，打卡一流


成個庭園係江戶中期典型嘅迴遊式庭園
以水池為中心



再配合小橋流水、岩島、樹林、築山等造景



令到成個環境都幾chill

有啲路段係以石當橋


喺平靜嘅湖面倒影出黎，別有一番風味



我出返嚟嗰陣，又覺得環境真係幾優雅
入嚟行個圈真係無妨
如果係秋天嘅時候就更加唔可以錯過



之後附近有間大藥妝舖
我就入咗去買咗差唔多成個鐘嘅


本身諗住應該會平過落返市區買啦
最後我返到京都格價，其實價錢係差唔多
我當係呢度行得舒服啲...冇人同我爭嘢啦


晚餐時間
大家都知我嚟日本點都要食一餐麻甩牛丼飯
藥妝鋪隔離就有吉野家


既然封面就貼住呢個售出超過一億份嘅牛肉鍋，咁呢晚就食佢啦


喺冬天食熱辣辣嘅嘢，乜都好味
仲要40蚊港紙，任添飯，抵到爛啦


食完之後就慢慢行返去車站
大概15分鐘步行路程，當係消化下


夜晚車站啲恐龍會著埋燈添


福井市夜晚普遍都係靜

《一乗谷朝倉氏遺跡》

「一乗谷朝倉氏遺跡」係福井縣一個具有重要歷史價值嘅文化遺產
係日本戰國時代朝倉氏的居城遺址，係當時一個重要嘅政治同軍事中心

一乗谷城/城下町，曾經係非常繁華，被譽為北陸小京都
只可惜朝倉氏喺1573年被織田信長擊敗後，成個城下町被一把火消滅

但係1967年挖掘嗰陣竟然發現面積達278公頃嘅遺跡竟然完整埋喺黃土之下
係極為珍貴嘅中世紀時代遺跡都市，出土好多珍貴文物
同時亦係日本6個擁有國家三重指定嘅地方之一，可見佢嘅重要性
(其餘五個:金閣寺/銀國寺/三寶院/平城宮/嚴島神社)

喺福井市前往有2條路線都可以選擇
1. 福井站東口乘搭 - 「朝倉・永平寺ダイレクトバス」 (超推薦一日玩曬朝倉氏遺跡+永平寺)
2. 福井站西口乘搭本地巴士 - 62號

「朝倉・永平寺ダイレクトバス」 雖然時間短好多， 但最早都要10點先有第一班
所以我就揀咗搭62號巴士


不過喺搭巴士前我都仍然走過去京福巴士中心買返個pass先
朝倉氏遺跡1日券 ￥900 (呢張券3月嗰陣官網已經搵唔到佢嘅資料，可能冇咗)


車程大概25分鐘

有幾個站可以落
一乗谷レストラント前 / 朝倉館前 / 復原町並
個人建議如果可以揀頭兩個其中一個落車，最後係復原町並離開，會順路好多

我就係 一乗谷レストラント前 落車
面前會係一間餐廳



畀大家睇下周圍嘅環境先
真係鄉郊地方，人煙稀少



呢個係全個遺跡嘅位置地圖
會見到中上位置其實有一個一乘谷JR站，不過唔使考慮，班次極疏
隔離有個遺跡博物館，行完遺跡都可以過去了解多少小歷史
不過我呢日主要嘅範圍都係集中喺「現在地 - 復原町並」


一路行上去都係民居為主
係非常樸素嘅居住環境


如果覺得嘥時間唔想行呢截，可以直接喺 朝倉館前 落車


見到啲霧氣真係好似去咗深山地區咁
而且周圍都仲有少少積雪



先帶大家去睇朝倉館跡，係朝倉家第5代家主朝倉義景居所遺跡


入口嘅唐門，係江戶初期建造從松雲院嘅正門移到過嚟



由高處影落嚟個環境大概係咁


唐門附近會有一幅平面圖，只是畀大家睇咩位置以前係有啲咩


裏面有一個朝倉義景墓所


繼續行上去其實係一啲庭園嘅遺跡



行多一陣就慢慢行過對面馬路



「復原町」
呢度係一個透過以前挖掘出嚟同翻查歷史資料
將部分當時 城下町街道、武屋家敷、庶民町屋 重建展示出嚟


入場費￥210


入面就係咁樣嘅一條街
係咪有少少似金澤嘅長町武家屋敷跡呢



行入嚟你就會好似自身喺戰國時代咁
透過庶民町屋了解當時人民嘅居住環境同生活等





武屋家敷就冇特別重建，主要都係展示一個遺跡畀大家睇



成個環境都好傳統，好濃厚嘅日本色彩
對日本歷史有研究嘅人唔可以錯過

街頭同街尾都設有出入口
我喺街尾出嚟，就已經會係 復原町並 巴士站
亦都正式完結我呢度嘅行程


一乗谷朝倉氏遺跡畀我感覺好清幽，成個環境都好靚
係好多唔同角度都會影到靚嘅相




成個行程我大概喺度用咗個半鐘
返到福井市 10:30
直接殺返去酒店拎行李走人

臨走前都係車站附近影返幾幅相留念啦




有溜冰表演睇


成個福井確實係比較鄉下feel，我亦都唔係第一次去呢啲程度嘅城市
但福井畀我感覺係好安靜得嚟，唔係好令我感覺到朝氣

當然，福井完係絕對值得大家嚟參觀
好似我去嘅呢幾個景點都係福井縣好重點嘅地方，成個環境絕對唔係大城市可以畀到你嘅體驗

建議行程

Day 1: 福井站(08:00) → 一乗谷朝倉氏遺跡 (10:23) → 永平寺 (13:15) → 丸岡城
Day 2: 福井站(08:00) → 東尋坊 → 養浩館庭園
再有多少少時間就可以去埋勝山、越前海岸
如果你係住金澤，Day 1就可能會抆水啲
可以同養浩館庭園調返轉都得