有冇啲佢唔再喺世上你先會覺得真正擺脫到嘅人

21/01/2024 2:20AM

呢種感覺我都有段時間冇接觸過，嚟嘅時候好熟悉，但又因為太耐冇接觸而有啲陌生。可能係因為今日見到好多唔同嘅人？可能係睇到大家過住各式各樣多姿多彩嘅人生而令我突然間思考自己過左個點嘅人生，亦會想像我嘅未來究竟會點呢？一諗到呢度，原來，我根本諗唔到我未來嘅生活係點。

我可以話我出生喺一個扭曲嘅家庭，有個家姐，我覺得我嘅童年係富裕，但唔係快樂。我嘅童年令我最深刻嘅，主要都係由父母嘅嘈交。我親生爸爸喺大陸工作，間中先會翻屋企，記憶中嘅佢，只係一個隔幾個星期甚至一個月先翻嚟一次嘅人，每次翻嚟我父母都會嗌交，印象會鬧會打甚至失控。我啊爸對住出面嘅人好大方，中意貶低屋企人，而最後我啊爸出軌、父母離婚收場，我啊爸因為小三有左要翻大陸結婚直接讓左撫養權啊媽，嗰年我五歲。離婚之後我啊爸每個月都會俾一筆足夠我哋母女生活嘅贍養費，啊媽覺得係啊爸欠左佢，呢份錢係應份要俾。雖然好唔想，但我同家姐每個禮拜大約都會同啊爸見一次，而我嘅記憶中，大部分嘅見面都係鬧交收場，每次唔順從佢意見嘅事，佢就會以「唔俾錢」嚟要脅我哋。同佢一齊喺街上見到認識嘅人佢會即刻鬧我哋，甚至試過喺街大吵大鬧。可以咁講，佢俾咗我一個無形嘅壓力，面對佢，我到今時今日都感到情緒不安、焦慮、成個人都覺得好煩、好困擾。

我小學中學讀書成績平庸，性格自悲，覺得自己樣唔靚、身材肥，覺得身邊嘅人好過自己。到高中嘅時候身邊好多同學開始拍拖令我都渴望拍拖，中四嗰年，我識左個男朋友，開始想去行街拍下拖。或者嗰陣只係想拍拖，我都唔知點解會同呢個男仔一齊左，佢嘅出現，只會令我自悲嘅心態不斷惡化，佢會將我同其他人比較，取笑我肥。第一次拍拖亦都令入左反叛期，唔想屋企人知道我拍拖，咩都瞞住唔想同屋企人講，而啊媽察覺我性格行為嘅改變，將我越勒越緊，以對個女上心啲為由，將佢每個禮拜一次嘅樂器班取消，佢做左「跟得母親」，除左我翻學之外，所有事情都跟出跟入，恨不得我所有事情所有行蹤都同佢報告，我當時覺得自己除咗佢翻工嘅時間之外都俾人監視住，如果我家姐外國讀書翻香港放假嗰陣，我甚至會覺得我放學一翻到屋企就係被監視。

最後我拍拖嘅事當然被啊媽發現左，佢心底當然想我分手，同時我出街嗰陣都會問我「同邊個出街」、「幾多男/女」，「去邊度食飯」、「食咩」、「幾時翻嚟」，即使我回答曬呢啲問題，我喺街嘅時候都會收到電話問我「依家喺邊」同「幾時翻屋企」。而嗰位男朋友喺拍拖冇乜耐後出軌。第一次拍拖，一直俾佢貶低嘅我覺得對方出軌嘅理由係因為自己，不斷喊。種種嘅事情當時應該係有抑鬱症，喺學校亦越來越唔合群，唔想俾身邊嘅人走入自己嘅圈子，夜晚失眠，瞓喺床度會無端端喊，間中翻翻下學仲會去廁所喊，身體就好似只有一個空殼咁，偷偷地自殘，甚至試過一兩次想去自殺嘅念頭。呢個情況持續左一年左右，有一次喺學校廁所喊到收唔到，知道自己失控到翻唔到入班房，怕老師同學以為我失蹤周圍搵我，當刻無奈之下只可以去社工室。

呢次，係我第一次我主動搵人幫我，但當時嘅社工並冇幫助到我任何野，每次嘅約談，我都只會覺得我嘅感受、情緒同想像都被批評，好似話俾我聽呢個係我嘅問題。我嘅狀況完全冇好轉，而我決定扮我慢慢有好轉，令我可以減少同佢面談嘅次數。咁啱學校換左個社工，佢比較年輕，我從同佢交談嘅過程中，感受到自己被聆聽，覺得佢真係收到我向四周求救嘅信號。而我好想自己好翻，唔再對出軌嘅男朋友死纏爛打，決定放過我自己，我嘅心態亦都越樂觀，覺得做人要自愛。為咗證明俾對方睇我係有價值，我決心減肥，足足由62kg減到55kg。與此同時，我覺得我過去嘅行為傷害左啊媽，內心非常愧疚，所以儘量孝順我媽聽佢話。

原先家庭係好影響一個人嘅價值觀，好彩你發現到問題，當有朝一日再因童年問題而唔開心時，記得唔好氣餒，你係有價值㗎