細佬條女搬咗入嚟幾個月 頭家就嚟散

講少少background先，屋企得我、老母同細我四年嘅細佬，住私樓（得我供緊），細佬仲讀緊書
是咁的，我細佬第一次拍拖，開頭我都好支持佢溝下女，可以有自己嘅感情生活。 點知佢拍拖半個月就偷偷地帶條女返屋企，老母一返屋企就呆撚咗，又唔介紹又唔打招呼就咁不歡而散，第一印象麻麻。
後嚟老母就覺得既然見過面，過節邀埋細佬女朋友上嚟慶祝，叫做正式認識下對方。上到嚟都無咩嘢，都叫傾到吓偈，慢慢就開始習慣佢會間唔時上嚟食飯。見多咗就發現佢條女都幾多問題，無禮貌(即係入屋當我成家人透明唔打招呼/幫佢拎嘢又唔講唔該)、講嘢好幼稚同粗魯，傾開偈知佢讀到中學畢業就唔讀書，宜家無做嘢。睇得出老母都有啲反感。
後嚟條女就直頭住咗入嚟（我都係去完半個月旅行返嚟先知屋企多咗個人） 我問老母做乜俾佢住入嚟，間唔時上嚟訓咪算囉，佢話唔識拒絕，叫我俾啲空間佢兩個發展⋯唉屌 生活嘅尷尬、不便個啲就省略⋯都可以忍受。早排佢哋覺得張床太細，瞓得唔好，想換張大床。老母知道咗件事，話可以讓佢間房出嚟，我第一時間話唔得，點解要讓俾細佬同條女，又未結婚，過人世咩。我屌柒細佬未搵錢，唔好用屋企資源嚟養佢條女，佢話層樓佢有份住，帶邊個返嚟瞓係佢自由。好多說話我無講出嚟，因為我知講咗就無兄弟做，唔想頭家四分五裂。事到如今大家面左左咁，究竟點解決