193(敢言到仆街)
2024-01-05 11:01:07
由唔知幾時開始，出現左「佐助型毒男」呢個形容詞，主要係話啲沉默得黎性格比較cool既男仔，不論係《火影忍者》既佐助，定《幽遊白書》既飛影，甚至《風雲》入面既步驚雲等等，佢地都係好沉默，但共通點都係靚仔。
即係話你想要成為佐助型毒男首先真係要簡單執執個樣先，只要你本身生得好睇，著咩衫都係靚仔，所以我呢篇野係比啲自問樣唔差但又無女既人睇，好讓你地有女埋身，唔洗自己主動出擊，至於你問我洗唔洗cosplay埋佐助，我可以答你唔好好似某youtuber咁過份地有自信。
其實佐助型毒男同時比人叫做偽毒，而我個人就覺得偽毒唔等於佐助型毒男，因為偽毒指係個樣一睇就已經似毒男，但又食到女，例如棋坤同野飲咁，不過我唔建議大家做偽毒，始終女性係需要尊重的.....
因此要成為一個佐助型毒男首先要學識沉住氣，即係唔好秒回啲信息，反客為主，展現到你好cool咁，但遲覆還遲覆，唔好覆咁少野！正所謂慢工出細貨，唔洗千字文，因為啲女會睇到頭暈暈，大約廿粒字到差唔多。
其次，如果你有搵開啲囡囡集郵既習慣都要盡量戒，不過你本身好似我一開始唔敢開口問已經成功，keep住唔好R合照，因為上面都提及到，你要展現到自己好cool，cool到好似不近女色咁，咁樣女仔同你一樣先會有安全感。
你可能會問成日扮沉思唔知諗咩好，好易變左發吽哣，所以你諗野還諗野，都要聽實女方講既野，千萬唔好放空，唔係佢突然問你野就好似你上堂唔留心聽書比老師突擊叫名比唔到反應咁柒！
你亦可能會怕因為唔講野所以同另一半好易分開，傻啦，佐助又唔係成套《火影忍者》都做梁朝偉，我只係叫你適當時先出聲，正所謂講多錯多，你講少句都唔會怕激嬲另一半啦～所以我要講既野都係咁多啦！
重點：
1.基本外觀要企理
2.適當地冷淡，但唔好比佢覺得忽冷忽熱
3.多沉思
4.適當地發言