不忿六毫子稱沒欺凌阿晶 晶媽親筆信怒斥
「阿晶有病是加蔥害，六毫子和林茂發都是兇手。」
反駁六毫子自稱跟阿晶是朋友
「唔見你同X街落子蔥來探病，靈堂上你同落子蔥無送花牌。」
微辣前經理人阿晶 （Jane）今年7月輕生，至今事件逐漸丟淡，昨日（29日）凌晨微辣創辦人六毫子 （陸志豪）在社交平台發文，聲稱事發後被人持續抹黑。他自言3年前已知阿晶患情緒病，一直以好友身份在她身邊陪伴；又稱從來不欺凌、沒有透過黑社會恐嚇任何人，並預告自己會重新出發。
喪女後一直沉默的晶媽，受到六毫子的「澄清長文」刺激，終於忍不住發聲，疑似在社交平台上載親筆信反駁他。由於她喪女後患抑鬱症，更上載自己的精神科預約便條。她於貼文的標註欄寫住：「微辣你苦（撫）心自問阿晶走上絕路同你哋無關」。
疑似晶媽指女兒從沒搶廣告，寫道：「六毫子你當初如果無叫阿晶拍廣告，話為公司利益着想，阿晶命運或者就不一樣！公司同事挑起杯葛阿晶，你有冇出來解釋！是你害死阿晶禍首！」晶媽直指：「阿晶有病是落子蔥害佢，你六毫子同 #林茂發 都是兇手。」
晶媽在一年半內先後喪夫及喪女，她質疑：「六毫子你話同阿晶是朋友，點解我先生（患病），唔見你同X街落子蔥來探病，同靈堂上你同落子蔥無送花牌，送唔起是嗎？我先生走，靈堂只有毒辣公司6個同事花牌。」
「阿晶7月26日走咗，你們有無甚麼表示，個個推說無份欺凌阿晶，一個都（冇）問候我。思男兩姊妹，阿妹直播笑笑口講。」
晶媽指女兒前男友 #加蔥 （林茂發），曾在香港被佈景板壓傷腳骨折，「我晶媽燉咗幾次田七花旗蔘瘦肉湯叫阿晶攞畀佢喝，佢連基本禮貌都無，多謝都無講。」
【「你依家同張詠儀是冥婚」】
她為女兒不值，「林茂發你話你是不婚主義者，當阿晶有咗你就唔想結婚，逼阿晶落子，連做手術都唔陪佢去，我晶媽陪佢去拱北中西合醫院落仔，你知我幾憎你X街，你依家同 #張詠儀 是冥婚！」
晶媽女兒離世後，微辣等人冇表示，她在阿晶去世100日曾經去問米，「阿晶話好驚，你話找幾個兄弟整X佢，佢話好驚。」
晶媽十分悲憤，寫道：「你哋無人性，我先生病逝，我一年半死咗2個最親的家人，我依家一直都睇精神科，我都有抑鬱症。我知自己不會生存好耐，我以後死咗我都想搵你哋報X。你們還年青，好好反思，我養大個女到大學畢業要多少時間同金錢同心血，人在做，天在看！」
悲痛難過，字字泣血。
