我哋係一班廣東話教育嘅工作者。我哋一直都覺得 「今年嘅漢字」（今年の漢字） 呢個世界各地漢字文化圈都會搞嘅年尾活動好有意思。呢個活動旨在揀出一個能夠代表該年度社會氣氛、事件或流行趨勢嘅漢字，係1995年由日本開始嘅。
可惜喺香港，呢個活動由親北京政治團體「民建聯」騎劫舉辦，雖然佢哋一直落足廣告宣傳，但公信力一直成疑。
但直至今年2023年，「民建聯」忽然之間唔搞！因此，我哋決定突襲！
比賽會由KongHub，一個由關注廣東話傳承嘅海外港人成立嘅平台去舉辦，令香港人都可以用一隻字去代表佢哋嘅心聲。
由於要確保比賽公平性，我哋選擇用Google Form收集大家投票。
大家投完票即刻可以睇到結果，確保選舉完全公開透明公正！
由於選舉每人限投票一次，實際操作上大家要用Google帳戶登入先投到。但大家可以放心，過程中只有Google系統驗證，我哋係唔會睇到大家嘅電郵資料。如果咁都有疑慮，請自己安排用冇個人資料嘅電郵投票。
詳細規則如下：
投票資格：凡係全球各地嘅香港人都有資格參與投票，唔限年齡、性別或居住地。
投票時間：即日起至香港時間2023年12月29號11點59分截止。結束將會喺31號公佈。
選擇漢字：每位參與者可以選擇一個漢字，呢個漢字應該反映咗當年度香港人嘅集體經歷、感受或者係主要事件。
投票方式：參與者可以透過指定嘅=Google Form或者KongHub網站進行投票。每人只限投一次。
投票結果：投票結束後，會計算所有有效票，選出得票最多嘅漢字。結果將會喺指定日期公佈。
明白嘅話，大家就可以開始投票喇！
投票連結：http://bit.ly/2023HK
投完票都歡迎留言講下自己揀咗邊隻字同點解～
