周焯華當年成為新晉娛樂大亨，不過最哄動莫過於已婚嘅佢同混血model Mandy Lieu（劉碧麗）嘅一段情。近日有地產經紀聲稱喺當年洗米華同Mandy喺半山嘅豪宅愛巢拍片介紹，原來呢個價值過億嘅單位已經成為銀主盤。
片段所見，呢個面積超過2000平方呎嘅單位，一入門口就有私人升降機大堂，可見氣不凡。單位原本三房間格，但原業主將全屋打通，加上近乎全屋都係落地玻璃，空間感十足之餘仲可以飽覽維港及半山景致。而飯廳大到可以放到6人大餐枱，再加個內藏鋼琴嘅入牆柜。介紹單位嘅經紀不時盛讚原業主識得享受生活，因為屋內音響以至家電都係名牌貨。
間屋最正嘅應該係主人房，King Size大床上面嘅天花有塊鏡，後面嘅旋轉大梳化對正嘅天花都有塊鏡，你懂的。床邊就有個浪漫大浴缸，仲有設有蒸氣房嘅套廁，既浪漫又豪華。片尾經紀指原業主2014年以9100萬元買入單位，而家成為銀主盤放售。經紀話自己冇資格評論佢地嘅愛情故事，但就認為女方喺男方出事後，願意交出單位俾男方還債，認為係「有情有義」。有報導指，Mandy將當年獲贈嘅西半山豪宅作為債務嘅抵押品，未知同周焯華有冇關。
2014年周焯華同 Mandy Lieu撻著，更爆嘅係Mandy 同洗米華嘅正室Heidi（陳慧玲）幾乎同時傳出懷孕。2015年中，Mandy喺英國誕下女兒，冇耐Heidi亦都為華哥誕下細女。同年年底，洗米華同Mandy公開拖手現身，有傳Heidi決定退出三角關係。
正當外界都認為Mandy「贏梗」之際，洗米華同Heidi關係卻突然好轉，華哥更曾公開表態「周太只有一個」！但係洗米華同Mandy仍未斬纜，甚至繼續「造人」，生咗2女1子。到2019年，有報導話Mandy得到3億「分手費」，帶埋仔女喺英國生活。Mandy喺當地開設莊園，並創立有機健康食品品牌，兼且為雜誌寫專欄，轉型做健康家庭系KOL。
洗米華太太Heidi近年生活變得低調
而得到「最後勝利」嘅Heidi，即使夫婿入獄但風采依然，早前佢出席澳門友人飯局照片曝光，見到Heidi繼續容光煥發。早前Heidi更練出驕人健美身材，但個人IG則已設為私人帳戶。
https://hk.news.yahoo.com/mandy-lieu-%E5%91%A8%E7%84%AF%E8%8F%AF%E6%98%94%E6%97%A5%E5%8D%8A%E5%B1%B1%E5%84%84%E5%85%83%E6%84%9B%E5%B7%A2%E7%96%91%E4%BC%BC%E6%9B%9D%E5%85%89-%E5%A4%A7%E5%BA%8A%E5%A4%A9%E8%8A%B1%E6%9C%89%E5%A4%A7%E9%8F%A1-%E5%BA%8A%E9%82%8A%E5%B0%B1%E6%9C%89%E6%B5%B4%E7%BC%B8-054113875.html
