#林海峰 今晚假座亞博ARENA舉行演唱會《Uncle AUNTIE FAREWELL PARTY》,在台上妙語如珠,一曲《For You》(軟硬天師)、《私人珍藏》、《只因喜歡你》勾起不少回憶。其間林海峰更預演叱咤頒獎禮,論盡「我最喜愛的男歌手」五強。
林海峰在台上逐一介紹入圍歌手,首先是 #張敬軒 ,他說:「軒公呢,入行……真係好似叱咤咁喎…軒公入行差唔多廿幾卅年﹐喺叱咤攞獎無數咁多,我印象當中 #我最喜愛的男歌手 佢喺2014年攞過一次,至於今年佢有冇機會再攞呢…」以叱咤主題音樂哼起來:「軒公街站拉票,得到迴響,勤力軒公應該有獎!」台下尖叫聲不絕。
「下一位, #盧瀚霆 !上年我頒咗畀Anson Lo啦,滿城風雨,我都係少講為妙,直接唱啦好冇呀?『Anson Lo Uh-Oh Uh-Oh Uh-Oh,Uh-Oh Uh-Oh Uh-Oh Uh-Oh,勤力撈撈應該有獎!」
【林海峰:Ian同我一樣,都係入男廁嘅】
講完阿撈,下一位是Ian #陳卓賢 。「陳卓賢!Ian同我一樣﹐都係屬於創作型歌手,佢同我一樣,都係唱番啲自己寫嘅作品。Ian同我一樣,都係好年輕有為。Ian同我一樣,都係好靚仔;Ian同我一樣,都係咁高啦,Ian同我一樣,都係好有希望嘅年輕人;Ian同我一樣,都係入男廁嘅。而最大分別係,Ian入到男歌手最後五強,而我係入唔到嘅。」台下一片歡笑聲,林海峰接著唱:「首首歌自己作, 好似林狗,勤力寫歌應該有獎!」
之後林海峰介紹 #尹光 Wan K.,觀眾反應非常熱烈。「光哥,同我一樣,光B同我一樣,唱一啲搞笑歌為大家帶來歡樂。我相信我行條路,同佢都一樣。即係,將來大概廿幾卅年之後,我係會入圍我最喜愛男歌手最後五強,到時我應該係八十幾歲,OK?『光B are myself,數下波波,橫掃AI應該有獎!」
輪到五強最後一位姜濤, #姜濤 亦是座上客,在台下專心欣賞。林海峰說:「咦,好似嚟咗咁嘅?Oh my GOD!係咪呀?」向下台搜索,忽然說:「係喎!Hello!喂,我約你1月1號,你咁做嚟做咩呀?早咗兩個幾禮拜喎!做咩呀?諗住有 #早鳥優惠 呀?叱咤唔會早嚟會有獎,你知唔知?」又笑謂現正綵排叱咤頒獎禮,召喚姜濤上台一齊綵排。
【姜濤:我有啲驚!】
大會鏡頭pan向台下的姜濤,姜似乎毫無心理準備,不斷搔首摸耳仔﹐偏頭傻笑,林海峰笑他:「真係做咩咁早嚟呀,兩個禮拜之後先到叱咤。你行得咁慢,你食咗好多嘢咩?」
姜濤終於上到台,林海峰帶他到台中間:「呢度呢度,你跟住走㗎啦嘛?」又指示落台的方向,有short cut。姜濤似乎仍在「結界」,非常緊張,林著他跟觀眾打招呼,姜說:「大家好,我係姜濤。」林笑:「你梗係姜濤啦,仲有邊個啫?做乜咁早嚟啫?」姜求放過:「唔好玩我…」林又說:「綵排啦你!」姜發出魔音笑聲:「綵排乜嘢?」透大氣說:「我有啲驚。」
【live band演奏《蒙著嘴》 姜即場獻唱】
林海峰安慰他不用怕,姜濤再問:「你想點…(林:交個台畀你之嘛)你交個台畀我做咩?」笑得退後兩步。林海峰求饒:「我走唔到㗎!」姜笑問:「我要做咩㗎?」林著他分享一下叱咤感受,姜求救說:「講咩…我唔知(林:講叱咤得獎感受,扮嘅啫)。」之後響起宣佈得獎者的鑼鼓聲,姜問:「講咩?(林:講多謝)多謝!」
姜似乎沒想過會被邀上台,他說:「我靜靜地睇得㗎喇…」林說:「我知我知,但睇我對你冇幫助,有害只係。」感謝他在綵排演唱會期間仍來捧場,又要他走之前唱首歌,說罷身後live band即演奏《 #蒙著嘴說愛你 》音樂,姜「吓」了一聲,林海峰已經消失了。
因為沒有ear mon,姜濤live唱時一直按著右耳捉拍子。唱完一節,林海峰又出現,帶他到台邊引路落台的方向。姜如荒失失奇兵一樣,十分搞笑。最後介紹的是:「叱咤我最喜愛男歌手頒獎嘉賓:林海峰」,林接著即唱《流行曲》。
#娛壹