自從審計署報告批評中大開放餐廳之後，各大院校都人心惶惶。今日浸會大學副教授陳家洛就喺社交平台分享一張浸大財務處嘅「重要通告」，入面列明「所有校園餐飲設施只限於浸大的學生、教職員及獲許可的訪客使用。其他人士將被拒絕」。陳家洛話：「審計署針對完中大之後，自然會有呢個為噏而噏嘅動作囉，食飯得30-40分鐘，好心畀人抖下氣啦！」
不過，學生就笑言浸大東施效顰。「浸大山神」就話「等等，浸會憑咩覺得會有人衝入嚟食蟲？唔好成日當自己係中大啦」。有人直言浸大食物同豬潲嘅最大分別「就係豬潲冇咁貴」。
Instagram帳戶浸大老屎忽就做過比較，浸大飯餸價錢其實係八大中最貴，比其他院校差距可以去到20-30%。除咗貴同難食，浸大餐廳都經常發生蟲患，學生會更加曾經舉行集會同埋當眾食蟲抗議，難以相信有人會專誠走入浸大食飯。
https://www.instagram.com/p/C0ddzHIv30d
