前Super Girls成員李靜儀(Heidi)昨日出席U Beauty Awards活動,多年來都保持到弗爆身形,令人羨慕。近日完成電影《夜校》的宣傳工作,終於可以好好放假休息,她透露正籌備聖誕粉絲聚會。「入行咁多年多數都係暑假搞見面會,今次聖誕節希望可以諗個Dress Code,又會準備禮物畀大家,等大家開開心心過節。」
Heidi表示現時科技發達,比初入行跟粉絲的聯繫方便好多,以前要靠歌迷會,現時她透過IG頻道或TG群組,經常都可以跟粉絲們傾偈,「班粉絲好乖,大多數都係話想影相同見我,不過佢哋好多都好怕醜,尤其男仔!男仔唔主動點樣追女仔呀?好擔心佢哋!(你擔心冇人敢追?)我?我唔擔心呀,好多人追,哈哈哈!講笑!」
提到現時的感情狀況,Heidi形容是「開心狀態」,「我拍拖唔鍾意特別公開,直至好穩定階段就會公開,(怕粉絲唔接受?)我成日同佢哋講,始終有一日都會結婚,不過佢哋真係好乖,有時留言話:『我都想見到女神搵到自己幸福!』,我睇到好感動。」她表示結婚順其自然,自己較多男粉絲,怕結婚後大家不再喜歡她。