粵語殘片

戴定頭盔，呢個係參賽落選故事，而家心情喺富士山谷底，只想揾個地方拋棄呢舊夢想嘅垃圾，獅子山下嘅石頭，隨緣地拋下我便逃走，化為烏有。

故事摘要

曾康是個帶鄉音的新移民中學生，因自卑而自大，因此被同學排擠。

直至轉校生子敏出現，成為「港珠澳大橋」，促使曾康和本地生和諧共融。

曾康和子敏感情升温，曾康決心表白，並接受廣東話大特訓，展開一場求愛大
作戰！

場︰1
時︰昏
景︰銅鑼灣鬧市街
人：康（身穿恤衫西褲）、欣（康女友，OL裝）、內地旅客x2、環境人物

△ 夏天的傍晚，路燈下蚊子在圍繞飛舞。

△ 恤衫因為汗濕沾在肩膊，康感到不舒服用手指扯起恤衫，站在路邊忍耐著悶熱等待。

△ 手機收到訊息響起，康打開手機Whatsapp見是朋友強發來的訊息：「仆街仔，下星期五晚中同re-u你有冇興趣join？」附加一個鬼臉的emoji。

△ 康按手機回覆：我約咗人唻唔到喎仆街。

△ 一雙高跟鞋步至，見是欣。

欣：（疲憊）好攰呀，膊頭又痛。（用手拍一拍肩膀）
康：（收起手機，識做）我幫你拎。（伸手想幫欣取過肩上的手袋）
欣：（望一望途人，不想康尷尬）唔駛喇！
康：得啦！（取過手袋，將肩繩折起單手提著）
△ 二人邊行邊說。
欣：食咩呀？
康：你想食咩先？日本嘢？定台灣嘢？
欣：（有點不耐煩）你唔好問返我，你決定啦！
康：（隨口說）咁食千兩囉！
欣：我唔想食日本嘢，最好快啲食完返屋企抖。
康：食茶木？好近！
欣：又食茶木？
康：（不耐煩）食大家樂囉！
欣：（嬲嬲地）駛唔駛咁呀？
康：（有點㷫）你叫我決定，決定咗你又ban！
欣：你變咗喇！你以前唔會發我脾氣架！你真係變晒！
康：（心聲vo，保持冷靜對自己說）再拗落去盞激嬲佢今晚有排氹，唔好呀！（強忍，吸一口氣，道歉）sorry，係我唔啱！
欣：（怒氣未消，一輪咀）次次都係激嬲完我先識話唔啱，知唔知我死咗幾多細胞？你答我你係第幾次犯同樣嘅錯？
△ 時有個不識趣的大嬸內地旅客甲拍一拍欣肩。
內地客甲：（普通話直問）會展怎麼走？
欣：（感到厭煩）我唔識講普通話，你問第二個啦！

△ 內地客甲悻悻然走開回到同伴處。

內地客甲：（惠州話，晦氣）點解香港會展咁難搵？
欣：（隱約聽到，以為被鬧，谷氣）佢係咪鬧緊我？佢以為天龍人大晒，香港人一定識普通話呀？！
康：（息事寧人）佢冇鬧你呀！
欣：我聽到佢用鄉下話講咩香港人架！
康：佢講惠州話，話香港啲路好難行啫！
欣：你又知…（醒起）係喎，差啲唔記得你係惠州落唻！
康：行啦！入希慎涼冷氣再睇吓食咩啦！

△ 康牽著欣手行去。
康：（得敕，心聲vo）咁就俾我化解咗場中港矛盾！

場︰2
時︰夜（接）
景︰康家睡房
人：康、欣

△ 手機畫面開出，美劇男男情慾片段。
△ 欣躺在床上看著手機，笑得合不攏嘴。
△ 康躺在旁邊，無聊地玩著手機男兒當入樽籃球遊戲，覺得無癮，放下手機，伸手按熄欣的手機。
欣：（不滿）做咩呀？
△ 康沒回答，一手揸欣的胸。
欣：唔好搞啦！
康：好耐冇做啦！（伸手想除欣的衫）
欣：我好攰呀，唔濕架！
康：我會用神之手搞濕你！
△ 康伸手入欣褲襠撩弄，欣不耐煩地等待，未幾，康挫敗地縮回手。
欣：都話唔濕架啦！
康：（奸笑）係咪睇得男男多，想試吓搞後門…
△ 康伸手要脫欣褲，欣阻止。
欣：咪玩啦，聽晚先好唔好？應承你！
康：你話架！
欣：係呀！俾返部電話我，我睇多陣就要瞓啦！
△ 欣拿回手機繼續看男男片段，很高興。
△ 康在旁瞄著，無癮。
康：（喃喃）都唔知啲基佬有咩好睇！
△ 夜空鏡，時空跳。
△ 睡房已關了燈，欣頭枕在康的手臂上已睡著了，康悄悄抽走手臂，走下床。

場︰3
時︰夜（接）
景︰康家廁所
人：康、欣

△ 黑暗中見廁所門關上了，門縫透出燈光。
△ 廁所內，康站著看著手機。
△ 見手機畫面是連登討論區，帖文的標題是白滑，大波，多圖，康被吸引。
康：你不仁我不義，細佬幸福我靠自己爭取！
△ 康按入去，卻見是肌肉男的照片，連忙按走。
康：頂你個肺！又係標題黨！（低頭望下身）駛唔駛縮得咁快呀？搵過第二件囉！
△ 康按手機打開IG，搜尋各種各樣的美女照，最後鎖定了一張中學女生的校服照片。
康：今晚就寵幸你啦！
△ 康除下孖煙通正想自慰，時手機響起，康收到前女友子敏發來的whatsapp文字訊息。
敏：hi！
△ 康又驚又喜，將褲拉起，按手機回覆。
康：hi！好耐冇見！
敏：應該都有十年冇見喇可？你點呀？
康：應該唔止，我還好，你呢？仲喺英國？
敏：係呀，啱啱搬咗屋。
△ 敏發了一張照片來，以敏主觀角度拍攝，不見樣，敏穿著居家短褲躺在沙發上，露出一雙長腿，有隻貓伏在旁。
△ 康望著敏的長腿，下身慢慢有反應。
康：你隻貓好得意！
敏：佢叫chocolate，係我roommate養架！
康：（喃喃）roommate定男朋友呀？
△ 康想打探敏的感情狀況，打下文字：你同男朋友住呀？
△ 康猶豫，覺得意圖太明顯，刪除文字，改以另一種問法：有人話男人天生八字同貓唔夾，你roommate男定女呀？
△ 時傳來敲門聲。
欣：（OS）得未呀？我急尿。
康：好快！
△ 康連忙刪除文字，時敏又傳來新訊息。
敏：我下個禮拜會返香港同中同re-u，你會唔會嚟呀？
康：會呀，遲啲再傾！
△ 康收起電話，沖廁開門，見欣憋住尿，一臉不滿。
欣：做乜痾咁耐？
康：（說笑）你知我做乜都咁持久架！
△ 欣嗤笑關門，康露出惆悵神情。

場︰4
時︰夜（接）
景︰康家睡房
人：康、欣

△ 空鏡，天已漸藍。
△ 欣已熟睡，康躺在旁未能入睡，呆望著天花板，千頭萬緒。
康：（心聲VO，有感而發）每個人都有初戀，而我嘅初戀就係周子敏，但係我已經唔記得咗係幾時？喺邊度初吻？諗返就好似係上一世嘅事，嗰陣時我連廣東話都未講得正…
△ 去FB。

場︰5
時︰日（約二十年前）
景︰中學走廊連課室
人：康、班主任、同學眾（強、莉、肥妹、明等）

△ 快速碎鏡：惠州西湖日空鏡、廣深公路的風景在直通巴士的車窗略過、羅湖過關、駛往紅磡火車上的風景。
康：（VO，說話夾雜鄉音，有點自傲）我叫曾康，由惠州落唻香港嗰陣要重讀小四，所以我比同班同學大啲亦都比較高…
△ 禮賢會彭學高紀念中學外貌日空鏡。
△ 一雙木底皮鞋大步踏在走廊上，咯咯作響，引來正在閒聊說笑的同學側目注意。
△ 鏡頭由皮鞋往上PAN，見康穿著喇叭褲，背著皮書包，雙手插袋，戴著耳筒聽著歌（歌曲是男兒當入樽日文主題曲），沒有理會一旁的同學，逕自走進了門口寫著6B的課室。
康：（VO）升讀喺九龍塘嘅彭學高紀念中學之後，一直都埋唔到班幼稚嘅同學堆，直到中六開學，情況唔同晒…
△ 康走到課室後排的座位，隨便把書包拋到地上，便伏在桌上睡。
△ 康熟睡時，一隻手入鏡敲桌面，康沒反應，手再將康的耳筒拿走。
班主任：（無奈）曾康！醒喇！
△ 康醒轉，伸懶腰。
班主任：新同學，你同大家介紹吓自己喇！
△ 康伸手揉眼，視線由朦朧變清晰，見眼前站在黑板前的是個如陽光檸檬茶廣告般可人的女孩。
敏：（靦腆笑著）大家好！我叫周子敏，你哋亦都可以叫我Natasha…
康：（打斷，作弄）咁撓口嘅？不如叫阿Sa喇！順口啲！
△ 敏尷尬笑著不知如何回應。
△ 同學側目望康。
班主任：（責康）靜少少！（向敏）唔使理佢，你繼續！
敏：我之前係讀聖保祿中學，因為搬咗屋所以轉校…
明：（眼前一亮）你讀St Paul架？銅鑼灣嗰間？
敏：（微笑更正）唔係呀，我係讀跑馬地嗰間。
肥妹：有咩分別呀？​
莉：（搶答）問咁多做乜？總之都係名校啦！
康：（玩嘢）咩話？食菠蘿中學？我鍾意食菠蘿！
△ 有同學被引得發笑。
強：（向康）妖！好爛呀！
班主任：（向康）夠喇吓！
莉：（向敏）band 1轉唻band 3你一定好唔慣。
敏：（笑著說）都唔係嘅，我覺得你哋都幾搞笑吖！多多指教！
明：（感興趣，問敏）你有咩想知可以問我架！
強：慳啲喇！問我喇！我出名好人！
△ 同學噓。
班主任：好喇！埋位上堂喇！
△ 敏走向自己位置，來到康面前，對康禮貌笑一笑後，在康的前面坐下。
△ 康心裡泛起異樣感覺。
△ 走廊空鏡，鐘聲響起，時空過，到了小息時間。
△ 眾同學圍著敏聊起來，對敏很感興趣。
肥妹：你呢本筆記封面畫得咁靚嘅？你自己畫架？
敏：係呀…
強：可唔可以幫我畫呀？
敏：可以，你想畫咩呀？
強：…畫條龍係我嘅胸肌度啦！
明：（拍強胸）你呢啲肥仔波唻咋喎！
△ 眾笑。
△ 康伏在桌上，睡不著，重新戴上耳筒聽歌

場︰6
時︰日（接）
景︰又一城溜冰場／FB小學班房／FB迴轉壽司店
人：康、敏、強、莉、肥妹、明／小孩康、小孩華、老師／小孩康、小孩華

△ 放學後時間，又一城內，康獨自背著書包前往小巴站，途中經過溜冰場，見到敏和強等同學在溜冰玩得好開心。
△ 康流露羨慕神色。
△ 時敏望向康的方向，康迴避轉身離開。
△ 康手機響起，來電顯示是「癲佬」。
康：（心聲VO）林志華係我小四就識得嘅好朋友，佢都係新移民，花名叫癲佬，係因為佢真係會發癲…
XXX​​​​​​XXX​​​​​​XXX
△ Insert FB，小學四年級的班房內，華在座位轉身同康說笑。
華：…個阿嬸冇啦啦攞起朵花，讚自己人比花嬌，跟住就有隻蜜蜂飛咗入佢條褲，佢仲死撐隻蜜蜂係入去採蜜…
△ 老師用長間尺打華手。
老師：（斥道）傾傾傾！專心上堂啦！
華：（勃然大怒）我老豆老母都未打我你打我！（舉起櫈想打老師）
△ 老師嚇得向後退絆倒跌坐在地。
△ 康急拉住華阻止。
康：（VO）佢唔發癲嘅時候其實好好相與，對朋友好到冇得彈，仲記得佢細個幫老豆看花鋪，間中賺到啲零用錢，佢自己一個仙都唔用，儲起嚟請我去食元綠壽司，嗰次係我第一次食壽司…
XXX​​​​​​XXX​​​​​​XXX
△ FB壽司店內，康和華坐在迴轉帶前，華從帶上拿下一碟三文魚壽司。
華：我有一舊水，想食咩即管攞！
康：我想食鮑魚壽司！
華：鮑魚成廿蚊碟架，食其他啦！
康：又話任攞？
華：我話任攞三文魚呀！佢六蚊碟，一舊水食到廿碟啦！
康：你識唔識計數架，一百除六食到十六碟咋！
華：係喎！你叻！獎你食碟鮑魚！

場︰7
時︰昏（接）
景︰土瓜灣街市外街
人：康、華

△ 回現實，華小學的樣子融化成現在青年的模樣，同樣笑容滿面，邊行邊對康說。
華：我大佬好豪架，陣間食飯你唔駛同佢客氣！
康：但係我冇諗住跟大佬喎…
華：我都冇諗住踢你入會，唔駛劣喎！咪當識吓人囉！easy！（搭著康肩走上唐樓樓梯）
康：你做咩學人講雞腸？
華：（搞爛gag）唔止雞腸，鴨腸同鵝腸我都識講架！
△ 康沒好氣。

場：8
時︰夜（接）
景︰唐樓樓上舊式菜館
人：康、華、黑幫x10、侍應

△ 華搭著康肩走入，見到一張大圓檯黑壓壓坐著十個黑幫男，有後生有中年。
△ 華帶康坐下。
華：（介紹）我老死阿康，佢好叻仔好讀得書架！讀緊中六！（問康）會考幾多分話？
康：（堆笑）好低分，我都係掹車邊升到架咋！
大漢甲：（幫康斟了一杯啤酒）叻仔，我哋呢檯人最多都係中三畢業咋！
潮洲佬A：（半鹹半淡的廣東話夾雜潮語）我最叻！小六畢業！英文數ABCDE跟住就數唔到落去啦！哈哈哈！
△ 大漢乙看菜單唔識字，不恥下問。
大漢乙：高材生，呢個「生炒你老味」係咩唻…
康：係「生炒臘味飯」。
大漢丙：（取笑）你老味！臘字都唔識！
大漢乙：我就係唔識字先出嚟行！
大漢丁：講埋啲衰嘢，飲杯啦！（舉杯示意康飲）文化人，飲杯！
△ 眾人飲酒。
潮州佬B：讀書多唔代叻嘅，睇吓大佬就知！
大佬：（中年，斯文，像無間道2的吳鎮宇，托一托眼鏡，冷面說笑）係呀，我唔識字嘅。
△ 眾笑。
大佬：不過我有五間茶餐廳，十間酒吧，你哋跟我，衰極都有魚翅攝下牙罅嘅，華仔，我睇好你架，唻緊你幫我睇住批貨，過多一兩年啦，我開間茶記俾你打色！
華：多謝大佬！我一定金睛火眼睇實批貨！
△ 眾笑。
華：（搭著康）如果你唔想讀書嘅，咪同我兩兄弟拍住上囉！
△ 康點點頭。
大漢：飲杯！

場︰9
時︰夜（接）
景︰唐樓舊式菜館外街
人：康、華、黑幫x10

△ 眾人離開飯店，紅著臉醉醺醺。
△ 康和華走在後面，見到前方潮州佬A、B拖著手。
康：（愕然）呢兩個潮州佬基架？
華：（見怪不怪）有乜出奇啫！黑社會好多基佬架！我地社團都有幾pair！
康：（震驚）天生定後天架？
華：其他我唔知，呢兩個前輩就係後天嘅！聽講佢地當年跟住大佬出生入死，有次大佬冚咗人地個檔口，俾仇家覆桌匿咗去墨西哥幾年，就係呢兩個前輩保護佢…
康：哦…喺異地對得多，日久生情！
華：邊有咁浪漫？係冇錢叫雞，又唔搞得大佬，咪唯有互搞發洩囉，點知搞搞吓搞出感情來…黑社會成日出生入死，好易擦出愛火花架！
△ 康望著華的手，突然伸出手牽著！
華：（大愕，又驚又怒）你做乜撚嘢？！（揸實拳頭）
康：（即舉起雙手笑著澄清）你話黑社會多基佬，我試吓有冇feel啫！
華：我直架！
康：放心，我都冇feel！
△ 時前方潮州佬開始有所動作，A一掌拍在B屁股上，華與康看得頭皮發麻。
華：搞基不如去機舖打機啦！（搭著康肩行去)

場︰10
時︰翌日
景︰班房
人：康、敏、強、莉、明、肥妹、老師、同學眾

△ 陽光照進班房內，康伏在桌上睡得正香。
△ 老師敲桌面，康轉醒。
老師：（黑面）唔好再搵周公喇！
康：但係我對搣時周你冇興趣喎！
△ 同學笑。
老師：（無奈）係Miss Chow！唔係搣時周！（指作業）你地就嚟要考A-level，要開始操paper喇！讀個instruction出唻聽吓！
康：（懶懶閒）呢行字咁深我唔識讀喎！
老師：你跟我讀一次，for part A，you should put an X in the number box…
康：（讀歪音）for part A，you should put an ass in the number box…
老師：係X，唔係ass！
康：ass…
老師：（輕責）你會考都係掹車邊合格，你連咁基本嘅英文都唔識讀，點考A level oral？到時實肥佬！
明：Miss Chow，佢唔係唔識讀，係讀唔到。
莉：大陸人啲口音係咁架。
強：由佢擺個pat pat入number box啦！
△ 眾同學嘲笑，康心底自卑，但表面輸人唔輸陣，反唇相譏。
康：有一句我識讀，I don’t fucking care！仲有…（向眾同學）son of bitch！
老師：（怒）你唔可以講粗口！出去罰企！
△ 康站起走往門口，眾同學紛紛表示不屑。
眾同學：大陸哩發爛渣！／都唔知唻香港做乜，咁唔鍾意學英文返大陸讀返普通話啦！／佢而家就put the ass out of the classroom喇！
老師：你哋唔好咁講，你哋係佢同學應該幫佢架！
肥妹：點幫？佢覺得自己好叻，我哋冇能力幫佢！
明：啲大陸人自視好高，睇唔起我地香港人架！
莉：大家文化唔同唔啱傾！
△ 其他同學點頭附和。
△ 敏看在眼裡，冇出聲。

場︰11
時︰日（接）
景︰九龍塘嘉諾撒聖家學校前巴士站
人：康、敏

△ 放學後，康背著書包，戴著耳筒聽著強勁的搖滾樂來到巴士站，見到敏背著書包，手上捧著兩本書在等巴士。
△ 敏未察覺到康，康偷望敏，敏回望時二人眼神接觸，康扮cool別過臉。
△ 康感到有人掂肩膀，回望，正是敏。
敏：（笑著打招呼）hi！
△ 康有點意外，除下耳筒。
敏：（有些拘謹）你係咪等緊85號呀？
康：（冷冷）唔係，我等緊太空船載我返火星。
敏：吓？
康：喺得呢個站梗係等85號啦，唔通等太空船咩？
敏：（被逗笑）係咁嘅，我想去土瓜灣自修室，你知唔知邊個站落呀？
康：（有點不耐煩）喺上鄉道落，落咗車你再問人啦！
敏：（不多問，微笑道謝）唔該晒！
△ 二人靜默站著等車。
△ 康偷偷望敏，當敏回望時，康即移開視線不想敏察覺。
康：（想了想，覺得自己剛才太冷漠，於是主動開口）喂！
△ 敏回頭望康。
康：（有點不好意思）其實我都係上鄉道落車，到時指俾你睇點行啦！
敏：（一笑）thank you！
康：（好奇）你好似唔係住土瓜灣架喎，點解要去嗰度自修室嘅？
敏：我住喺何文田，附近冇自修室，我問過人最近應該係土瓜灣…
△ 85號巴士到站，敏先上車，康跟著上。

你都幾得閒

大家咁話

場：12
時︰日（接）
景︰巴士連路上連土瓜灣街市外街
人：康、敏

△ 巴士上，敏行到下層的雙人座，坐進靠窗的位置，空出外面的位置有意讓康坐在旁。
△ 康唔肯定敏用意，心裡怕醜，沒有坐在敏旁，選擇坐到另一邊靠走廊的位置。
△ 巴士行駛了一會後，敏主動移出坐到走廊旁。
△ 時康正望著窗外，察覺到，回望。
敏：（出於好意）唔好介意我多口啦，其實我覺得你心地係好嘅，只係平時太cool，成日寸啲同學佢哋先唔鐘意你…
康：（不屑）我唔需要佢哋鐘意我喎！
敏：（一窒，不多說，轉問）咁點解你咁唔鐘意讀書嘅？
△ 時有個大叔上車後，想坐到敏旁的位置。
△ 康主動坐到窗旁，讓出座位俾敏坐，敏便坐到康旁。
敏：（續問）你唔想讀大學咩？
康：（懶懶閒）冇話想唔想，讀到咪讀囉！點解你哋一個二個覺得讀書咁重要？其實讀唔成書都可以好叻好掂，我識人小學畢業但有生意頭腦做老闆開咗幾間茶餐廳，搵嘅錢一定多過好多大學生。
敏：你講得冇錯，不過讀書唔淨係為咗錢嘅。
康：（失笑）咁係為咗咩？求分數呀？
敏：（認真）我好想入Poly讀graphic design，畢咗業可以做designer。
康：（不解）瓜飛迪西？人唻架？
敏：（耐心解釋）graphic design，平面設計呀，例如係書嘅封面，包裝上嘅圖案，九巴嘅logo都係屬於平面設計，外國好重視，不過好多香港公司就忽略咗…
△ 時車窗外路邊的招牌上見到匯豐銀行的標誌。
敏：（指窗外）匯豐呢個logo係一個好出色嘅設計，佢係由奧地利設計大師Henry Steiner設計，呢個六角形紅白標誌係象徵住集團各個成員一齊進軍世界…（興致勃勃講解）
△ 康靜靜望著敏，沒作聲，窗外風景不斷轉換…
敏：…呢個designer真係好叻，佢仲有好多經典作品架…（一頓）sorry，係咪悶親你呀？
康：（輕笑）唔係呀，你解釋得幾好，我而家先知匯豐個標誌咁有意思。
敏：（有點意外康讚自己）你通常都係寸人，係咪講緊反話？
△ 康聳聳肩不置可否。
△ 巴士到了上鄉道站，二人下車。
康：你跟我行啦！
△ 二人走著。
敏：（望望周遭，閒聊）你住喺附近架？
康：（自嘲）公屋撚，（一指）我住喺嗰邊樂民新村。
△ 敏循康所指方向望去。
康：前面外牆有個紅蘋果標誌嗰棟就係，自修室應該係圖書館上面嗰層，lift口水牌有寫。
敏：（一笑）唔該晒！聽日見！
康：（生硬一笑）bye！
△ 敏走了兩步，回頭。
敏：等陣！可唔可以俾你email我？我想add你MSN…
康：（一愕）好…
△ 敏拿出紙和筆給康，康寫完交給敏。
敏：今晚add你！bye bye！
△ 敏離開行向紅蘋果大廈，康望著敏滿有朝氣的背影。
康：（心聲VO）其實我好羨慕佢咁有目標，我好失敗，連自己以後想做咩都唔知。
△ 康有些失落，轉身離去。

場︰13
時︰是夜
景︰樂民新村康舊居
人：康、康姐

△ 客廳，典型公屋格局，狹窄、陳舊、寒酸。康穿著背心和孖煙通對著電視打機。
△ 房間放著一張碌架床，床前是電腦檯，康姐（中七生，戴著眼鏡，書蟲模樣）正坐在檯前認真溫書。
△ 時鐘指向七點。
△ 康姐走入廚房，見煤氣爐上的鍋蓋上貼著用簡體字寫的memo紙：「鍋裡有菜」，康姐拿走memo紙，開啟爐火。
△ 時空稍跳，客廳，康和康姐正在吃飯，二人的對話用惠州話。
康姐：（提醒）就唻考A level喇喎，玩少啲遊戲機啦！
康：（不耐煩）得啦！
△ 康姐有點無奈，夾雞脾給康。
△ 康姐吃完飯放下碗筷。
康姐：我返房間溫書，你食埋就拿啲碗碟入廚房，我夜啲洗！
△ 康點一點頭，繼續吃飯。
△ 康吃完飯後拿起手掣正想繼續打機時，透過門縫見到房內康姐正認真溫書，心軟反應。
△ 康入廚房洗碗。
△ 時空稍跳，康洗完碗出廳，見電視打機畫面顯示game over。
康：（自言自語）頂！（將手掣碰向沙發發泄）
△ 見時鐘顯示已過了十點。
康：（喃喃）佢應該返咗屋企，唔知add咗我未？
△ 康行入房，見康姐正在用電腦在玩MSN。
康：阿姊，我要用電腦！
康姐：（投入對著電腦，咀角含春猛敲鍵盤，頭也不回）等一陣啦！
康：（好奇探看電腦螢幕）同男仔傾偈呀？
康姐：（即尷尬轉過電腦螢幕不讓康看）你唔好理啦！
康：（取笑）唔使怕醜喎！個男仔哪裡識架？
康姐：唔好阻住啦，用多三個字俾你用！
△ 時鐘顯示已十點三。
△ 康又走入房。
康：夠鐘喇！
康姐：打埋呢句，好快！
△ 終於到康用電腦，打開MSN，但唔見有人add自己，失望，但仍在電腦前呆等。
△ 見電腦的時鐘顯示已到10點45分，MSN畫面仍未有新訊息。
△ 康姐走近八卦探看電腦。
康姐：等緊誰呀？你平時都唔玩MSN嘅，女仔呀？
康：你唔好理喇！
△ 時鐘顯示已是11點，康打呵欠，正想關掉MSN，時突然彈出通知有人add康，康驚喜不已。
△ 電腦畫面彈出訊息：「hi！我係周子敏呀！」
△ 康正想回覆，但想了想又停下，不想顯得太在意，等了一會才鍵入回覆：「hi！」
△ 電腦顯出敏新訊息：「你個名咁特別嘅？巨龍勿用，咩意思呀？」
康：好彩佢唔明啫！
△ 康鍵入回覆：「打機用語唻。」
△ 敏：「哦…」
△ 康等了一會不見敏再有訊息，鍵入：「你做緊咩呀？」，但又覺得咁問顯得太熟絡，刪除完再輸入：「你頭先溫到好夜先返屋企？」
△ 敏：「九點幾，我阿妹要用電腦，我off喇！」
△ 見電腦顯示敏的MSN名字由綠色轉為紅色。
△ 康若有所失。
△ 深夜空鏡。
△ 房內，康睡在下格床，輾轉反側未能入睡，搖動了床架。
△ 康姐的聲音從上格床傳來。
康姐：（OS）唔好郁唻郁去啦！我好難先瞓著又俾你嘈醒！
康：好！
△ 康不再郁動，呆望著天花板，回想起。
△ Insert FB 康多次被不同的本土少女拒絕愛意的片段。
港女A：sorry呀，我對你冇feel…
XXX​​​​​​XXX​​​​​​XXX
港女B：老實講，你啲鄉音好un耳，我係唔會鍾意你架！
XXX​​​​​​XXX​​​​​​XXX
港女C：有人鐘意自己點都開心嘅，不過畀你鍾意有啲瘀囉…
XXX​​​​​​XXX​​​​​​XXX
港女D：你年紀大過我，我覺得你好似我哥哥…
XXX​​​​​​XXX​​​​​​XXX
港女E：封情信我唔係好睇得明啲簡體字，繁體字嘅愛係有個心…
XXX​​​​​​XXX​​​​​​XXX
△ Insert上場片段。
敏：今晚add你！bye bye！
△ 敏離開行向紅蘋果市政大廈，康望著敏滿有朝氣的背影。
XXX​​​​​​XXX​​​​​​XXX
△ 回現實，康仍呆望著天花板。
康：（忐忑，心聲VO，勸自己）佢當你係普通同學咋，你咁易就沉船係咪又想食檸檬？（嘆氣）我想瞓覺呀，點樣先可以唔諗佢？

新移民就收皮啦
去入筷子
完

用筷子說話vss用牙籤說話

場︰14
時︰翌日
景︰班房
人：康、敏、強、莉、明、肥妹、同學眾、老師

△ 老師揭開書開始上堂。
老師：大家打開第59頁…
△ 課室忽然傳來鼻鼾聲，眾人循聲望去，見康伏在桌上呼呼大睡。
△ 老師無奈搖頭。
XXX​​​​​​XXX​​​​​​XXX
△ 小息鐘聲響起，有些同學離開班房。
△ 敏仍在課本上寫筆記。
△ 坐在敏後面的康伏在桌上戴著耳筒聽歌，見到強走近坐在一旁正在照鏡的靚女同學莉，堆著笑臉不知在說什麼。
△ 康八卦，暗暗伸手到桌下按停了音樂，聽到強和莉對話。
強：中秋節有冇街去呀？
莉：（板著臉）你想約我呀？冇興趣喎！
△ 康瞄見不遠正在與同學閒聊的肥妹在暗暗偷望強。
康：（心聲VO）肥妹唔係第一次偷望梁俊強，但係梁俊強擺到明就係鐘意靚女，冇好結果！
強：（繼續討好莉）我諗住約埋其他人中秋節去蒲，一定好熱鬧好好玩，你都一齊啦！
莉：（感興趣）睇吓你約到啲咩人先再問我啦！
強：（高興）yes！我即刻約！
△ 見強走去約其他同學，包括肥妹，全都點頭話好。
△ 強走到敏前。
強：yo！
△ 敏放下筆抬頭。
強：中秋節夜晚得唔得閒呀？去唔去蒲呀？
敏：去蒲？蘭桂坊呀？
強：唔係，去沙灘蒲，成班人一齊玩吓遊戲啫！
敏：（失笑）好呀！預埋我！
△ 伏在桌上裝睡的康聽在耳裡。
△ 強問完敏後，眼尾也沒有望康，直接走回莉處。
強：（堆笑向莉）班蒲精都話去，你作為gossip girl冇理由唔去架？
莉：（被逗笑）我去唔係因為你！
強：總之你去我就開心！
△ 敏回頭望了望康，見康仍在睡，心裡覺得應該叫埋康，走到強處。
敏：梁俊強，你約晒人喇？
強：約晒啦！
敏：咁你有冇約曾康呀？
強：梗係冇啦，做咩要約佢？
莉：佢咁乞人憎，有佢係度實搞到大家唔開心，你話係咪先？
敏：（不便多說，只好附和）係嘅…
△ 敏望向康，以為康睡著聽不見。
△ 康伏在桌上，眼睜開了，聽在耳裡，心傷。