「上天一定會祝福有夢想嘅人！」我用好正面嘅態度講出呢句話，希望可以激勵到徐一一。
徐一一聽完之後，好似有啲感動咁望住我點咗一下頭，然後講：「嗯，我一定會加油，希望今次成功。」
見到佢呢個有翻少少朝氣嘅樣，我都覺得好開心。
雖然我廢，但係我之前都叫做可以上場打到場籃球；咁好似徐一一呢啲有天份嘅人，我覺得上天無理由會浪費佢囉。
於是我同王君婷對望一眼，我見到王君婷都露出咗淺淺嘅笑容，似乎佢都覺得徐一一有翻希望係一件好事。
轉眼間嚟到放學嘅時候，亦都即係話，試鏡即將開始。
明明我本身只係去陪跑，但係唔知點解而家都搞到我有少少緊張。
正當我準備要起身出去話劇室報到嘅時候，張月星走咗過嚟。
「一陣你係咪同徐一一都要試鏡？」張月星笑住問，但係我感覺到佢有少少似係強顏歡笑。
「係呀，其實我只係諗住去陪跑㗎咋，放心聽日又會返返嚟溫書。」我怕張月星係介懷緊我唔嚟溫書嘅事，所以即刻戴定頭盔先。
「好啊，同埋你哋試鏡加油啦，試吓俾多啲支持徐一一，希望佢可以放鬆啲。始終都係一個學校表演啫，今次唔得，升上大學之後再試過都得嘅」張月星講。
「好啊，我幫你同佢講。不過呢，我覺得佢今次會成功。」我笑一笑答。
「點解嘅？」張月星好奇咁問。
「因為佢今次真係好努力，而且，幾有盼望。」我答。
「有努力，有盼望係好重要，只不過，其實世界上努力嘅人有好多。所以，努力試，唔代表一定就有成果。」張月星少有地消極咁講。
「咁有希望好過無希望吖！」我其實都反駁唔到張月星，因為我知佢講嘅係事實。
「好啊，咁你都加油啦，唔好太有希望啊，如果唔係唔小心攞咗個主角返嚟做啊！」張月星講完之後笑一笑，然後就拎起咗一疊練習卷，繼續同留喺班房嘅人溫書。
而我，就出發咗走去話劇學會。
去到嗰度，我發現原來嚟嘅人都比想像多。
然後我見到啲老師同埋話劇學會嘅成員會將啲參加者分咗男女兩批，然後會去唔同班房進行試鏡。
我入到班房之後，班房入面仲有其他幾個參加者。
入到班房我就坐喺幾個參加者隔離，老師就開始叫名叫人逐個出去表演。
每個參加者原來都有準備到一段大約3分鐘嘅表演，我望到嘅時候已經覺得有少少不妙，因為其實我冇認真睇過劇本。
不過唔理啦，我都係表演少林足球啫，啲對白都記得晒啦。
好快老師就叫咗我個名，我企到出去班房嘅中間，發現原來就算班房入面只係得六七個人望住我，我已經好大壓力。
果然，毒男嘅天性都係深深喺我嘅血液入面。
我聽到「叮」一聲，代表表演正式開始。
而我就拎出咗我精心準備嘅表現出嚟。
「少林功夫醒，好好嘢，少林功夫勁，係好近~~」
冇錯，我準備嘅係歌舞環節。
雖然呢首歌係一首我好熟悉嘅歌曲，但係我一邊唱，一邊望吓其他人嘅反應，發現佢哋都揞住嘴笑。
老實講，其實呢一段歌本身就好笑，可能佢哋係欣賞我呢。
只不過當我第一眼望到嘅時候，我好自然就覺得佢哋係恥笑緊我。
所以去到後半段，我幾乎係低着頭求求其其咁唱埋佢。
表演完之後，班房入面都有零星嘅掌聲。
負責睇我表演嘅老師講：「其實你呢個表現冇乜演技可言，不過你都算係唱歌幾好聽嘅，我哋嚟緊話劇有個小配角都要唱兩句歌，你會唔會有興趣？」
唔係啩，咁樣表演都可以有角色？
【選擇時間】各位巴打絲打，我應該點好呢？
A. 接受小角色
B. 拒絕小角色
C. 要求更加重嘅戲份
D. 直接要求一定要做主角
（今次投票將會以留言方式決定， 最快有十個相同留言嘅選擇將會成為最終決定，歡迎大家先討論再投票！）
＝ ＝ ＝ ＝ ＝ ＝ ＝ ＝ ＝ ＝
【本post到達100正評將會提供特別獎勵選擇，大家請多多支持】
【有機會幫手去Penana like下，嗰邊唔單止有唔同劇情，仲可以當係支持下，同埋都會解鎖獎勵！】
Penana 傳送門：
https://www.penana.com/story/134797
IG : windblowssilently
默颺讀者交流TG group：
https://t.me/+jD_eY63Yb5I0MmQ1
