。呢排大家都好關心到底法國韓國嘅床蝨會唔會傳到嚟香港，今次就同大家了解下床蝨呢種生物，同埋睇吓床蝨喺顯微鏡下係點嘅樣話說有時微生物化驗室都會收到病房send床蝨嘅sample嚟。而床房通常會用膠紙痴實隻床蝨畀我哋，如果唔係嘅話至少都會整死咗佢先，然後我哋就會將佢放喺顯微鏡下睇佢地嘅結構特徵。下面嘅圖同片都係以前影落，同呢排法國韓國床蝨事件無關
。臭蟲/床蝨（Cimex，bed bug），係一種以吸食溫血動物血液為生嘅昆蟲，體長大約5mm。成蟲嘅壽命大約係9至18個月。佢哋之所以叫臭蟲係因為佢哋有對臭腺，可以分泌出難嗅嘅液體
，主要用嚟防禦天敵。雖然比臭蟲咬完之後會令皮膚紅腫痕癢，嚴重甚至可以引致貧血，但至今臭蟲尚未被證實可以傳播疾病。床蝨嘅繁殖能力驚人，只要交配一次就可以終生不斷產卵，而佢哋一生大約可以生產200至400粒卵
。臭蟲係採用一種比較暴力嘅交配方式，叫做創傷性授精（Traumatic insemination），雄性臭蟲會用生殖器官刺穿雌性嘅腹部，將精子注射入雌性體內嘅體腔，精子經血液到達精囊，然後再游向子宮受精。雄性會選擇已經吸飽血嘅臭蟲交配。由於佢哋唔識分對方係男定女，所以基本上佢哋係男女通吃
。而最常見會以人類血液為食嘅品種有温帶臭蟲（Cimex lectularius）同埋熱帶臭蟲（Cimex hemipterus）。溫帶臭蟲遍布全世界，而熱帶臭蟲就主要係熱帶地區先會搵到。而喺香港兩種臭蟲都會搵到。兩隻臭蟲嘅主要分別在於温帶臭蟲體型通常比較圓，前胸（pronotum）背板較闊而且兩側向外延伸成翼狀薄邊
；而熱帶臭蟲體型通常橢圓，前胸背板較窄而且兩側係隆起。下面呢兩隻就係温帶臭蟲，可以見到佢哋嘅前胸背板係闊，而且向外延伸嘅兩側好薄
，可以見到比較透光（圖入面箭嘴所指）。而呢兩隻其實一隻係雄性一隻係雌性，同普遍嘅昆蟲一樣雄性通常體型比較細，而且佢地嘅腹部睇落比較尖；而雌性體型比較大，腹部睇落比較圓（圖入面嗰隻雌性比較細隻嘅原因好可能係佢未係成蟲）。
而下面呢隻就係熱帶臭蟲，可以見到佢哋嘅前胸背板係窄啲，外測都係厚啲。
最後附上一張吸咗血腸道蠕動緊嘅床蝨GIF
推畀更多人見到
