近期個市比較瘋狂，四五月升完四五千點，到六月開始至九月又跌左差唔多七千點。見到身邊既朋友由好無乜興趣講股，變左日日係個Whatsapp Group到講，到而家又差唔多全部靜哂。真心，投資真係量力而為，唔好將太多既錢放左落去，咁樣反而會令自己心理壓力大增，越炒越短，甚至變Day Trade。買股票都係用番閒錢好喇。係呢到都想分享一下自己既炒股心理歷程，由我預科時期講到而家，希望大家唔好好似我咁柒。
我踏入投資的道路，是由2006年開始的。
因為老豆係做銀行證券部，所以我係中學時期已經對股票有一定了解。而去到預科，因為讀通識，果時想寫論點比較特別既文章，所以就開始睇老豆帶番黎既信報。以前既信報比而家有水準，我好多比較進階既財經知識都係係果到學番黎。去到中七，我終於夠18歲，係銀行開左我第一個證券戶口。
我當時都係開定先，因為戶口得果幾千蚊，都唔知可以買乜好。而為左準備好做足功課，我開始睇extra既財經野，例如信報月刊，我第一本睇既書就係東尼既富足一生（金金地色果本）。而當時大約係2006年尾。而完左高考之後，我就係銀行番parttime，有個同事影響得我好深，佢會成日借有關投資既書比我睇，仲話學識投資仲緊要過你搵到份好工。而係2007年6月左右，我正式開始投入股市。我仲記得我第一隻買既股票係中國銀行(3988)，原因就係認為內銀派到高息，同埋一開始實戰都想買d穩陣既，而最大最大原因，其實係因為我無乜錢，好多股票一手都要成兩三萬。
當時係大牛市，雞犬皆升，就算係內銀，都有唔錯既回報。其實果時自己睇中好多唔同既股票，咩稀土金銀銅鐵錫，咩中資金融細價老千妖股差唔多隻隻係第2日揀完之後都會升，所以更加相信自己係有料，而唔明白其實呢個係牛市既錯覺。果時眼見個市升得咁急，自己既投資回報比起上黎，感覺有d不值一提。無奈自己又無乜本，後來，我係財經雜誌上見到一定講窩輪，係一種本少利大既槓杆工具，急於搵錢想表現自己既我就開始左第一次買輪。
而我第一隻買既輪係中信泰富既CALL輪。買左唔夠半個月，回報就已經以倍數計，我當時覺得自己仲番partime真係好傻，亦以為呢種就係我同事講既投資既好處。或者咁講，我當時係認為呢d就係我一直學投資睇書打番黎既根基，所以一到實戰就可以贏到開巷，總之就係覺得自己與眾不同，先揀到隻爆升股，又識得用窩輪倍化回報，真係太醒了。我當時差唔多由9千幾蚊本，炒到大約有6萬幾7萬蚊。對於一個剛剛中七畢業黎講既人，其實真係一筆幾大既錢。
當然，每一個繼續炒股既人，通常都係獲得甜頭，所以先會繼續落去。而最後，我好自然又要經歷另一個新手必經階段，輸錢。2007年後期個市況都唔使我點講，恆指衝上三萬幾點之後直插至一萬一千多點。而玩得窩輪呢d既結局，通常都係輸爆廠。而自命不凡既我都算好彩——或者係唔好彩，只係輸哂曾經倍化既回報。而因為我AL要重讀，所以暫時放棄無買股票，但當然我都係KEEP住有睇信報。
