日本仙台遊記(唔知係咪叫多圖)

我覺得係因為地方太大, 但唔係度度都有岩睇既景點, 車程長
(唔似大阪去京都, 奈良 JR 1個鐘內車程), 講起車程長,
而家仲要加埋車費貴
就算你9月30買張JR Tohoku pass, 都講緊5日,
千1,2港紙一張, 前幾年對7, 10算個時,
個張JR pass差唔多係一張機票錢( budget airlines既話)

大部份香港人都係得5,6日, 比夠7日假期
即係去完東北就去唔到東京區內行
(以前14揀5日, 香港人都用唔到14日, 邊有咁多假)
如果 budget airlines有直航飛仙台, 咁就慳返D時間+車費

唔係個個都有車牌, 我見台灣人去東北好多都係自駕,
好多行程都唔岩行

連續5日係好pk
以前flexible 14 日內 5日好用好多多

無直航又因為交通問題，的確影響咗啲人去東北嘅意欲。

利申：去過兩次。

無直航其實係好事
東北真係後花園
少啲人輕鬆啲

仙台

係, 都唔知邊個決定咁改
5日真係,超越趕 (我試左一次啦)
多數都趕到無lunch, 坐既大站, 東京 > 山形 > 青森 > 仙台 >東京
除左山形有city walk, 其他都係轉車站
(我主要去澳入瀨)
坐JR, 坐JR, 同埋坐巴士
香港都仲算近, 都可以分幾次去(如果仲想去其他地方)
除非每次上東北都淨係去1,2個地方
5日真係太少, 但而家車費又加........ 又無直航, 再諗下啦
(雖然我都好想再去青森, 仙台 呢D地方)
但諗起要好趕...........

唔好意思
預計要今晚11點過後先有時間po文😵‍💫
(因為其實好多相都喺相機度)

所以睇住少少keep咗嘅相先啦


猊鼻溪嘅鴨，勁多鴨


盛岡站名物，好多人會睇新幹線解結/合體


岩手銀行紅磚屋


猊鼻溪船夫唱船歌

巴打你覺得猊鼻溪值唔值得去？諗緊12月頭

2017年係咪未有個公園 行唔到埋去？

個傳承館係2019年9月(令和元年，R1)先開


之前只係得棵樹

猊鼻溪四季都可以去，冬天去有雪睇同埋好似有暖爐船

我想將佢同京都保津川比較，兩邊都有去過
猊鼻溪特色係追求悠閑(你要expect會喺日本東北地方會揾到呢種感覺)。

不過缺點就係交通唔方便(班次好難夾)，同埋玩完呢個就基本上都係返去仙台/盛岡/去其他地方(最少同船嗰接近50人都係咁)，而唔會留喺嗰個地方。

而京都保津川嗰個就相反，多啲周邊配套，同埋進可攻退可守，人多唔想排就返京都行，不過近年就已經被玩爛咗，經常好多人，會失去睇大自然同文化嘅機會。

東北自駕最舒服

因為要同家母去嘅關係，所以會比較悠閑。
⚠️係注意事項
⭐️係冷知識

Day 1 香港-> 成田機場 -> 盛岡 ->仙台
自己就坐凌晨機(CX524)，去到NRT就06:35，托賴無遲到。
(⚠️事前要填好Visit Japan Web，然後會有兩個QR code，分別for入境同海關用)

07:40就岀到接機大堂。因為要換JR pass 嘅關係，所以坐N’EX 6號同新幹線(はやぶさ17號)呢個組合去到盛岡(12:32到達)。

今次用呢張JR東日本鐵路周遊券（東北地區），連續5日用，包JR東日本嘅絕大部份路線，連之後去奇蹟之一本松嘅大船渡線BRT都包，抵到爛，就 20000 yen 30,000yen(10月1日之後已經加咗價)。


⚠️記得N’EX同以下嘅新幹線列車班次只有指定席，要事前去綠色窗口或者去售票機預定席位(不另收費)(只寫東北地區)
東北新幹線: はやぶさ[Hayabusa] (東京<->仙台，盛岡，新青森)
秋田新幹線: こまち [Komachi] (東京<->仙台，盛岡，大曲，秋田)
北陸新幹線: かがやき[Kagayaki] (東京<->長野)
山形新幹線: つばさ [Tsubasa] (東京<->福島，山形)

⚠️(有啲人會抗拒(?)坐N’EX，你坐京成Skyliner(都係得指定席)去到上野/日暮里再轉都可以，不過京成用唔到JR pass，所以要另外收費，不過yen平就無所謂啦，自己唱就5.5，今日仲落到5.22左右。

盛岡本身並唔喺事前嘅規劃之中，只係自己想睇新幹線合併/分開先去 (都算係其中一個賣點，好多人㑹等睇)。睇完之後想試下食わんこ蕎麥麵(盛岡三大麵之一)，不過去咗兩間都無位就算(為咗試呢個而餓咗成大半日，之後去咗7仔食啲嘢就算。





之後去咗岩手銀行紅磚館，佢入面有免費區同收費區，免費區有得睇當年銀行嘅大堂(天花板有個符號，呢個符號同日本地圖上某個設施有關，大家可以估下)。
紅磚館同盛岡站之間可以行路或者坐巴士(でんでんむし[蝸牛號]嘅左回[逆時針)]，120yen)。之後就慢慢行番去盛岡站(盛岡城跡公園維修緊，所以入唔到去)，坐新幹線返仙台。



我住嗰間酒店喺仙台站旁(Hotel Metropolitan Sendai)，所以去其他地方都好方便，不過有啲舊。


喺酒店休息咗一陣之後(雖然喺新幹線已經係咁瞓)，夜晚去食仙台站3樓牛たん通り[牛舌街]一間餐廳食牛舌定食(善治郎)，有啲心理準備要等一小時以上，或者可以選擇區內其他分店或店家。牛舌定食好食嘅，不過建議唔好咁大食，我食咗6件厚切嗰個set(自己本身係大食人士)，第二日同個廁所有啲形影不離。


記得試下仙台另一個名產: ずんだ[毛豆]，有一間叫ずんだ茶寮，有好多毛豆相關產品，其中ずんだシェーク[毛豆奶昔]個人好鍾意，入面仲有啲豆嘅碎粒，不過有啲甜。



⭐️盛岡市係一個比較悠閑嘅城市，所在嘅岩手縣係擁有全日本第二大面積嘅都道府縣，不過亦係擁有僅次於北海道嘅第二少常住人口，感覺上會比想像中少人同遊客(就算我星期六去)

依家張東北pass仲要加到30,000 yen🫠

東北啲景點嘅特點係，分散得嚟，交通班次唔頻密(講緊一至兩個鐘一班嗰啲)，所以一係就好早起身去，一係就好遲先返到去，或者就要當地住番晚。

例如我由奇蹟一本松返仙台，係要4點幾就要搭巴士走人，返到仙台就八九點咁樣，就算係仙台(東北最大城市)，都唔似東京大阪有咁多夜生活，一入夜就好快無咩可以食。

盛岡(地位係中核市，低過身為政令指定都市嘅仙台)所在嘅岩手縣係僅次於北海道嘅第二少人口，所以就算去盛岡都覺得無咩人。唔好話旅客，本地人都少，同埋老人家多。

機場都要去花卷先有，比仙台仲唔方便

仙台可以考慮食牛舌閣

係冇，仲係原本嗰位

週圍乜都冇，全部都係地盤

下年11月去仙台bookmark定巴打個post做功課

24/9 Day 2: 松島+仙台市內

朝早喺酒店樓下間咖啡店食完早餐之後就前往「日本三景」之一 - 松島。
⭐️所謂嘅「日本三景」係指松島，天橋立，嚴島(宮島)



喺JR仙台站10號月台乘坐仙石線(月台喺站體嘅地底)往松島海岸站大概要40分鐘。


(⚠️唔好坐咗JR東北本線去咗松島站，會行好遠)
(⚠️另外唔係每一班都會去松島海岸站，記得睇時間表！)

落車之後，JR站外面會有一間遊船公司(我坐嗰間叫仁王丸)，會有好多人會買船飛，大人1000yen一張。由JR站行去上船點(下面我叫做棧橋)要十幾分鐘，可能會錯過船期，行得慢嘅或者有長者/小朋友嘅話未必趕得切。
不過，棧橋嗰度都有唔同船公司嘅好幾個售票處，所以未必需要喺JR站前嗰間馬上買，睇番自己本身行程就可以了。


每一個船公司所行駛嘅航線都大同小異，會圍繞松島灣一圈，會有日語同英語嘅介紹。





「松島」其實係一個總稱，因為區內二百幾個島嶼都種有松樹。我坐嗰隻船「仁王丸」(話係由松島之一「仁王島」而命名)係雙層的，上層要另加600yen(大人)。不過因為星期日嘅關係，全船連上層都滿座，有啲人仲要企岀甲板。


⚠️貴為「日本三景」之一，加上距離仙台市中心唔遠，所以會吸引好多來自日本各地以及其他國家嘅旅客過去松島地區玩，週末嘅人潮會令到交通、航程以及用膳方面會困難好多。




松島乘船棧橋附近有好多食店同紀念品店，有啲店舖有得體驗自己燒蒲鉾[かまぼこ，魚糕]，300yen一支，記得燒嘅時候保持耐性同留意翻轉嘅時機！如果擺得太耐會燒焦變苦。食落外皮有啲韌，入面都唔差嘅。


棧橋對面有個瑞巖寺(參觀需收費)，係知名日本戰國諸侯—伊達政宗嘅菩提寺，入面有人力車遊覽服務，不過價錢上都唔平(見仁見智啦)，15分鐘好似要千幾yen。

我哋兩個人行咗半日就返咗仙台，因為都好曬同埋星期日好難揾位坐低食飯。仙台市嘅景點主要喺JR站西面，東面就主要係住宅區。

市中心西面有定襌寺通同埋青葉通，搭兩個站地鐵就到(大概7-8分鐘一班)，所以你步行都無咩所謂。嗰邊仲有幾條商店街同埋百貨公司，非常熱鬧。呢種熱鬧唔係花園街或者心齋橋嗰種人逼人，而係好有生氣嗰種同埋有走動空間嗰種(比前一日嘅盛岡差好遠)。



定襌寺通喺12月嗰陣仲會有掛喺樹上嘅燈飾，夜晚會著晒燈，勁有feel。如果12月嗰段期間前往仙台，唔好錯過！


*網上圖片

係
果次去搵啲班次做幾鬼耐research
連新幹線都唔係好密
咁啱果次啲車delay都去唔到大內宿
去東北唔自駕搵交通真係要做足功課

成程船好似要90分鐘

單程30分鐘
到咗終點會上岸行20分鐘
回程30分鐘

不過上船落船要等齊人肯定會遲，所以成程90分鐘係無錯的

就係90分搞到我miss火車，去唔到了

25/9 Day 3 (前篇) 25/9 猊鼻溪

第三日，朝早由仙台(09:36)坐新幹線同埋JR大船渡線到猊鼻溪(10:49)，打算乘坐11點開岀嘅猊鼻溪泛舟，到站之後得10分鐘趕過去路程約450米嘅乘船點😵‍💫帶住長者或者小朋友就要揀啲唔好太緊迫嘅組合





整個旅程為70分鐘左右，包括30分鐘去程，20分鐘於終點停留，30分鐘回程，因為好大機會會遲開船，所以請預留90分鐘嘅時間。


⚠️因為JR大船渡線班次非常少(每日9班)，且兩班車之間相隔1.5-2小時，所以敬請留意班次！

只有以下三班車能夠接駁到船程
(一之關->猊鼻溪，船開出時間，猊鼻溪站回程時間)
10:17->10:49 (11:00->12:30) 13:12
12:46->13:18 (14:00->15:30) 17:08
14:17->14:46 (15:00->16:30) 17:08

我坐呢隻船，大半係日本人(船頭)，另外一半係台灣人(船尾)，只係我哋兩個同另外一對人係講廣東話。買飛嗰陣會比個地圖你(有繁體中文，因為都多台灣人去玩)。我日文都係好普通，大部分時間都聽唔明，只係靠自己理解同google解釋番比家母聽。

去程嘅時候船夫會以日語介紹沿途嘅奇石同景色，正所謂「七分靠想像」，似唔似就見仁見智了。


去到毘沙門窟嗰度會設有錢箱，船同錢箱之間有大概10米距離，要將硬幣拋得入去錢箱有啲技巧。如果拋得入嘅話會有響亮嘅鐘聲恭喜你哦！我坐嗰架船有個人試咗，不過失敗，不過後面嗰班船就有人入到，嗰下叮噹聲響到成個峽谷都聽到！



過咗30分鐘左右會到一個靠岸點，會有大概啦20分鐘時間比你深入峽谷，當中會去睇貎鼻岩，係一個突岀嚟嘅石頭，形狀好似獅子嘅鼻，因而得名。下面會有一個洞口，去後面嘅攤位用100yen買3粒石子(上面刻有唔同嘅字，有十款，可自選)，試下拋入目測三十米以外嘅洞口吧！有啲人會選擇擲鐵餅咁試，不過我自己就由下至上咁大力拋入去，中到舊石嘅機會會大啲。






回程嘅時候船夫會唱船歌「貎鼻追分」，合上眼睛聽下佢唱船歌，或者觀賞下周圍嘅景色，喂下鴨仔(可以同船夫買糧食)。來回程雖然都係同一條路，不過可以從唔同角度去觀看優美景觀！







猊鼻溪同京都保津川唔同，四周係無其他特別景點嘅，所以好多人坐完船之後都會返番車站，等車返一之關。


坐完船之後，可以坐番大船渡線返去一之關(得一個月台，所以要留意列車嘅方向!)，或者…




(待續)

唔好意思，近排有啲忙

如果你有機會再去嘅話，不妨參考下我#49所列嘅時間，尤其係下午嗰兩班船，時間上充裕啲
(等車期間去車站附近間family mart坐一陣)

日本風景四季分明，每次去都唔同完全一樣