簡單先講下小弟嘅背景：係港大Engine讀緊final year，最近暑假透過介紹去幫一個升中五嘅女仔補英文。我自己21歲，佢就16歲，大家都係同一日生日(幾神奇？)
MBTI︰我係INTJ-A，佢就INFP-T。
由8月中補到依家9月尾都有一段時間，每個星期佢都會上我屋企補習，因為我收得比較平同埋住得近。第一次見面之前，我已經知佢讀band one官中，所以覺得佢成績應該都唔錯。開始補習後，我先察覺到佢成績其實唔係咁理想，自己都會主動問下佢係學校讀成點。一直補習以黎都無咩問題，有講有笑，由唔熟變到好熟，我自己都盡晒力好有耐心咁幫佢打好根基，再慢慢學習更加深入嘅內容。有時我都會提醒佢自己要主動學習，始終英文能力好嘅人都係由細到大靠接觸唔同事物浸出嚟，依靠我每星期教佢兩個鐘其實唔夠。
有一日佢睇落好似無咩精神，唔開心咁，我就主動關心佢睇下發生咩事。佢話比我聽讀書壓力好大，係學校又比人蝦，見到唔鐘意嘅人就唔係好想返學。我再了解多啲佢，先知佢原來有焦慮同抑鬱症，個主因係源自於學業壓力同人際關係。由果一刻開始，就算我好忙都會抽更加多私人時間教佢英文同一啲人生道理，想減輕佢讀書壓力同幫佢生活開心啲。可能呢樣係出至於大人有保護細路嘅責任感？同埋自己後生果時都試過抑鬱，所以係佢身上見到後生嘅自己，唔想佢行返我條舊路咁辛苦。於是，有時一補就由兩個鐘變左三四五個鐘超哂時，而佢都好開心咁聽我教佢同傾偈。佢試過同我講覺得自己無咩用無價值，一班同學人地聽完書就明，佢自己就唔識。我有同佢講每個人嘅天份同長處都唔一樣，學習模式更加係，可能只係學校老師教嘅方法唔好，同埋唔應該用讀書呢樣野去決定自身嘅價值。一個人成功與否其實係取決於自己心態同會唔會主動學習不同嘅事物，識唔識得同其他人溝通同合作。出去社會做野都係咁，就算你好有idea，如果唔識得同老細或下屬表達，client又唔信任你咁都冇咩用。咁樣睇，讀書成績其實唔係最重要，佢只係令自己條路易行少少。反而我好欣賞佢嘅表達同溝通能力，老實講有好多大人都未必可以真實做到咁。
相處日子耐咗，由唔知幾時開始我覺得佢好似鐘意左我？可能只係我直覺錯？好多時候佢都會主動whatsapp搵我，一傾就到半夜兩三點，大家咩都可以講，又試過凌晨五點搵我 (會唔會有啲誇張？lol) 同埋有陣時佢都幾黐身，令我覺得有啲尷尬想避開佢，又唔知佢諗緊咩。 有一次，補完習我約佢星期日出去行街玩，佢好快就答應左，而佢自己一向都係鐘意留係屋企唔出街果隻。果日我地都玩得好開心，有講有笑又影下相，晚上去睇海傾心事。佢仲話我地可以靈魂溝通到九成，果一刻我覺得好奇妙，二個年紀同人生經歷差咁遠嘅人竟然好似可以完全明白同了解對方。對於INTJ孤獨性格嘅人黎講其實係好幸福，竟然有人會願意接受同明白我，而自己朋友都無咁了解我嘅生活同諗法。到第二日我病左，平時又極少生病，唔知發生咩事發燒頭痛得好勁。晚上佢無端端send左一大推voice message話我聽佢飲醉左，咁我就好擔心佢，唔知佢會唔會唔開心出事。問佢係咪落左酒吧飲酒又唔答我，其實法定未夠18歲係唔落得酒吧，但係我果刻病左狀態好差都無諗到咁多野。再問多幾次，佢先話原來係屋企飲醉左。佢又話唔知好鐘意咩野，問佢都唔肯講清楚。到早上，佢醒返然後del埋晚上send過黎嘅voice message，問我佢醉果陣有無講唔應該講嘅野，我都唔知點答佢好。諗諗吓我自己好似唔知點解有少少鐘意左人地？我自己對上一次有鐘意嘅對象都係10年前，果種心動嘅感覺我已經觸摸唔到，更加唔可以清楚了解。
之後一路補習都無咩問題，直到中秋節我帶左佢返大學上堂。一開始佢都問我會唔會好尷尬，但係我都說服左佢話啲教授其實唔會介意人地上堂做咩野。我帶佢返去大學上堂行下街，其實都係想佢見識同了解出面嘅世界係點樣，中學生嘅生活始終係十分單調，無自由可言，
好多野都要跟住啲咩校規同教育制度而行。大學嘅生活反而差好遠，就算走堂都無問題，自己付返責任就得。
佢都有同我講過生活好似無咩意義，而我都想啟法佢比自己一啲目標去追尋幸福快樂，出面嘅世界真係好大，有好多唔同野玩，美麗嘅人同事，未知嘅道路值得佢去探索。 果日晏晝我察覺到佢好似有啲唔舒服，問下佢係唔係頭痛，之後就早啲送左佢返屋企休息。
到今日中秋節假期，我收到一個好唔想見到嘅壞消息，就係佢同我講以後唔會再過黎補習，想做普通朋友，對唔住。睇完個message，我都唔係好識形容自己嘅心情同感覺。由細到大，我都好似一個獨家村，鍾意離群去觀察其他人同呢個百無聊賴嘅世界，獨自去完成自己嘅目標。有好多時我都會不自覺咁避開其他人，因為後生時候被身邊重要嘅人同朋友丟棄過，所以我會保留一點距離令自己唔會咁容易受傷。依家當我搵到一個鐘意嘅人，又再次被丟棄，令我覺得好傷心同失望。有時我睇落好似嬉皮笑臉，實質我做事同看待承諾係好認真的。我都會怪責自己有咩做得唔好，但係當時嘅我都無辦法做得更好，因為我已經盡哂力唔想留有遺憾。世事往往都係唔完美，而遺憾依然留在我心。幸福永遠只能很短暫地出現係我身上，而多數都會換來沉重嘅悲傷。唔係我無爭取過，而係越努力珍惜，幸福就扁扁離我而去。
如果你有緣份睇連登嘅話，我想同你講我真心鐘意左你。請原諒你有一個咁傻嘅哥哥，我唔可以陪你行落去睇沿途嘅風景。雖然你同我講過你好需要我，但係你並不需要我，而係一份獨立。希望你可以搵到一個比我更加好嘅老師去教你英文，人生流流長我都祝福你係未來搵到自己嘅興趣同目標，追尋自己嘅幸福快樂，唔好比讀書同朋輩嘅枷鎖困住自己！你的確比同年嘅人思想成熟得多，請好好發揮自己嘅長處！同埋好多謝你係我生命中短暫地出現過，令我感受到咩係幸福快樂。
一個中秋節令我無左一個朋友，一個知己。
小弟第一次係呢度出post，希望大家可以開解到我。以前都未試過有呢種事發生，所以都唔知自己錯左咩同埋唔係好識得點處理。係唔係唔應該再搵對方？會唔會係我自己諗多左？定係其實一開始我已經錯哂，因為年紀差別，所以應該主動去中斷？
