最近港鐵沿線一間人氣小食店，因價錢實惠「抵食」而備受討論，成為便利店小食快餐以外的新選擇。小食快綫（Snack Express）主打港式街頭小食，近期相當入屋，有港人日前多番於社交平台上分享，其中該店的碗仔翅獲不少人勁讚「好掂」，形容「冬菇切得幾大片」、「勁多冬菇」，更有人認為「啲碗仔翅真係我暫時食過最好食」，每碗售$19起，但超足料，認為價錢合理實惠，性價比頗高！
除了碗仔翅外，小店亦主打各款燒賣、魚蛋、腸粉等小食，同樣喜獲不少食客歡心，其中燒賣或魚蛋8粒售$11，腸粉則4條$12，普遍認為「幾好食」、「味道幾好，又平又方便」、「呢檔野完勝，款式多價錢唔貴足料大份，30蚊6粒80蚊一份果啲收收X」。亦有食客透露小店過往曾經賣過煎釀三寶，感嘆「好好食，而家冇晒」、「以前仲有煎釀三寶，不過要另外攞牌，才冇供應」，但認為「呢間嘢真正良心企業，就算在商場入面，價錢都唔會特別加價，直頭平過好多小店」。
然而都有部分網民認為，各間分店的食品供應水準不一，指曾經食過某店的格仔餅直言「超唔掂」，「一早整好放入個盒裡面，個餅又淋又濕」、「以前格餅10蚊又好食， 而家加晒價仲要整定淋晒好難食」，似乎有待改進。
