喺非洲, 每60秒就過咗1分鐘(四)柏林盛宴(下)

有次搭飛機無聊
將一至三集+第四集部份轉做mp3
原來都成兩個鐘
聽完啱啱落機

法夫爾：你串錯字喎…

唔掂冇電
食個靚飯沖個靚涼擎乾埋水先繼續

Lm
樓主唔好爛尾呀

高質post留名

睇到呢度
相信各位聰明嘅小朋友都會問
喂唔係喎睇番柏林切餅大會後嗰幅地圖
德國劃嗰幾忽都唔細㗎喎
嗰時佢係世界第三大殖民地宗主國
又話俾斯麥唔like殖民主義嘅
霸啲地嚟做咩

呢層就要講少少德國統一時所面對嘅國際形勢喇
當時歐洲最主要嘅玩家有6個
分別係英國、法國、俄佬、奧匈、意粉同自己
要德國可以平穩發展
就必須維持呢幾個玩家嘅勢力平衡唔好打仗
法國就唔使睇㗎喇肯定冇計傾
俾斯麥可以做嘅
簡單嚟講
就係好似啲小學雞咁
聯合其他同學仔一齊杯尻法國
好彩多得拿破崙三世廿年嚟嘅傻仔外交
要做到呢點唔算好艱難
首先奧匈嘅法蘭茲約瑟夫一世畀拿破崙三世累死咗個細佬
拿破崙三世跣咗佢細佬去墨西哥做皇帝點知畀墨西哥佬革咗條命
同法國佬本身都唔啱牙㗎喇
再加上畀普魯士打咗鑊甘後
外交上都係唯德意志帝國馬首是瞻
所以奧匈係唔使擔心


墨西哥最後一個皇帝馬克西米連一世
佢老婆就係喺剛果斬手斬腳嘅利奧波德二世個妹
喺死咗老公後痴Q咗線
最後畀佢阿哥圂咗喺城堡度
吽咗成60年先死得

跟住就英國
呢個就有啲複雜
因為法國喺拿破崙三世治下
同英國有幾密切嘅經貿關係
不過一來普魯士不嬲都係英國傳統盟友
維多利亞女王又嫁咗個大女畀威廉一世個大仔
（即係後來個短命種皇帝腓特烈三世）
打埋算盤都係襯家
更加重要嘅係英國同法國喺海外殖民地嘅競爭
令英國樂於見到歐陸有勢力可以牽制法國
好似普法戰爭嗰時
英國都係繑埋雙手喺英倫海峽對岸睇戲
由得法國畀德國強姦
德意志統一後又係第一個國家發賀電
喺可見將來都冇乜原因會令英國埋法國堆（好似係）
所以英國都係安全嘅

腓特烈喺1875年影嘅全家福
右二嘅威廉仔大約16歲
當時有邊個會諗到
佢做得嗰99日皇帝就生癌死吖
又有邊個會諗到
受盡自由派思想薰塗嘅呢兩公婆
會生到個咁專制嘅仔呢
不過都幾肯定
佢唔死嘅話
德意志帝國將會成為英式君主立憲國家
到時唔知又會係一番咩境象呢

食咗藥好q眼訓
聽日繼續

麻煩唔好走數

留名等走數

最後就係俄佬
呢層就棘啲喇
雖然俄國一向相當撐普魯士以對抗哈布斯堡
拿破崙三世呢個仆街暗中支持嘅1863年波蘭起義
又係普魯士幫手鎮壓嘅
另外俾斯麥喺同法國開波前應承亞歷山大二世
支持佢廢棄喺克里米亞戰敗後簽訂嘅巴黎和約重建黑海艦隊
以換取俄國喺普法戰爭中保持中立
種種跡象顯示俄佬應該fd底靠得住
不過俾斯麥諗嘢就係會比其他人深多一層嘅
而家哈布斯堡已經變咗死狗喇
法國又被打皺咗
歐陸唯一威脅到俄佬嘅
暫時就只有德國
以佢喺俄國做大使時同亞歷山大二世交手嘅經驗
佢深知呢條白皮蒙古佬肯定亦都心知肚明呢點
對德國嚟講
最恐怖嘅情況
就係畀法國同俄國結盟夾死喇
一如七年戰爭嗰時一樣
佢要棋先一著
先可以制止俄佬反面發爛
咁可以點搞呢
呢個時候法國就為佢帶嚟一個答案…

要知道防範法俄結盟係寫咗喺帝國憲法嘅附件入面嘅
可想而知呢種恐懼係幾深入德國人嘅骨髓
吖唔知點解個三世祖最後會搞到咁嘅田地
仲妄想呢架載住個光頭佬嘅密封列車
會為佢帶嚟另一次勃蘭登堡奇蹟呢

普法戰爭法國死咗14萬人
之後巴黎公社暴亂又死咗3、4萬
加埋要諗計籌旗戰敗賠款嗰50億法郎
戰敗後嘅法國可謂百廢待興
法國當前最需要嘅
就係一個強而有力嘅政府去統籌呢一切
不過有樣嘢需要攞到個共識先
就係未來法國嘅國體
究竟要試多次共和制吖
抑或走回頭路捧番個國王上去行帝制呢
戰後嘅1871年國民議會選舉
將會有所決定
以時任臨時政府主席梯也爾為首嘅共和派
當然就係揀共和啦
但係村民就唔係咁諗
對呢班佔法國大多數、盲字都唔識多個嘅鄉下佬嚟講
呢啲政治鬥爭實在太遙遠喇
投票呢家嘢都係睇啲讀書人頭
而平時佢地接觸得最多嘅讀書人
就係教會班神父喇
當時教會喺法國尤其係鄉下地方嘅勢力非常之大
而傳統上教會同王室又係朋比為奸嘅命運共同體
加上大革命時畀共和派迫害嘅情境仍然歷歷在目
教會諗都唔使諗就企喺保王黨嗰邊...
…班共和派個精神契媽真係講得好：

「自由，自由，多少罪惡假汝之名而行！」

兩次共和究竟試咗啲乜呀
第一次整咗雅各賓嗰班暴君出嚟
第二次就一鑊泡畀拿破崙三世條傻仔上到位
由大革命開始
法國已經損失咗一代人嘅時間喇
佢地仲想點
我地需要嘅係穩定
而唔係擺喺空中樓閣嘅自由
喺教會每個禮拜日嘅洗腦下
保王黨得以喺議會選舉中攞到大多數嘅議席
嗱梯也爾睇到未呀收皮啦你
佢地開始搭起召喚國王嘅祭壇
首先憑藉議會大多數嘅優勢
喺8月通過限制總統權力嘅草案
藉此用議會架空梯也爾
跟住喺1873年5月以些微票數
通過對梯也爾嘅不信任議案
佢被迫辭職成為祭壇嘅祭品
最後就捧咗軍功顯赫嘅保王黨中堅麥克馬洪將軍上去做總統
自始召喚國王嘅祭壇完成
萬事俱備只欠國王
捧邊個上去好呢
當時嘅保王黨係分成兩派
分別係撐波旁朝查理十世個孫尚博伯爵亨利嘅正統派
同埋撐奧爾良朝路易腓力一世個孫巴黎伯爵腓力嘅奧爾良派
呢度要讚一讚古今中外嘅保王黨
基於共同利益佢地普遍係冇乜原則地團結
唔似得啲自由思想嘅自由派
佢地好快就達成共識
由將會冇仔送終、年紀較大嘅亨利做先
到佢死後就由有後代嘅腓力繼位
一個字：perfect池啦
如無意外共和制將會同法國擦身而過

尚博伯爵亨利

巴黎伯爵腓力

睇開我啲廢文嘅都知
咁講得即係有意外啦
話說當年佢阿爺查理十世喺七月革命畀人趕走時
亨利只有十歲
自始佢成家就離鄉別井喺歐洲各國周圍投靠親戚
作為波旁朝最後一位繼承者
佢自細就畀佢老母教養成好似佢阿爺咁堅定維護正統嘅保守派
呢四十幾年嚟
無論係奧爾良朝、第二共和抑或係拿破崙三世時期
佢都堅持要復辟波旁王朝
思想亦越發激進
所以當呢位落難多年嘅老憤青終於繼承王位成為亨利五世時
佢終於要爆喇

咩撚嘢自由、平等、博愛全部都係廢話
🇫🇷代表嘅就係大革命為我阿爺帶嚟嘅苦難
我要用返波旁呢支白底鳶尾花旗

陛下你冷靜啲先
三色旗用得好地地好難話改就改㗎喎
唔得我連支旗仔都改唔到仲做咩王帝呀
哦咁好吖你唔好做喇

lm

光頭佬又真係叫做完左東線嘅
冇預佢會反彈得咁快姐

珍

睇到呢度
相信各位聰明嘅小朋友都會留意到
唔係仲有個意大利要搞咩
呢度就真真正正開始入正題喇
而家就講講上一集結尾提過吓嘅柏林會議
呢個唔係切餅嗰個
而係歷史學家公認一戰嘅其中一個直接遠因——1878年柏林會議
要講嘅話真係有排講
喺呢度我就唔打算花太多篇幅喇
不過都要簡單講吓俾斯麥點解要開呢個會嘅
喺成立三皇同盟後
德國成功喺外交上孤立法國
正常嚟講
俾斯麥所炮製嘅呢個外交體系應該都幾穩固嘅
不過意外往往就係喺啲無厘拏更嘅地方發生
今次個意外就係發生喺亞德里亞海西岸嘅波斯尼亞和黑塞哥維那喇

之前第二集提過嘅1873年股災所引發嘅長期蕭條
令好多發展中國家承受信貸緊縮嘅壓力
好似上集嘅埃及咁
其實同一時間佢名義上嘅大佬鄂圖曼都中咗伏
早喺克里米亞戰爭後
佢已經向英法兩國嘅銀行借落一大筆債
用嚟發展海軍同畀蘇丹起皇宮
當時啲銀行（主要又係羅富齊）嘅息口相當辣
同佢借十蚊
實際攞得8蚊
但係要還13蚊
仲衰過九出十三歸
以佢嘅稅收根本就還唔到
咁辦法就只有兩個
1）借新債還舊債
2）加稅
喺信貸充裕時借新還舊都仲叫行得通嘅
鄂圖曼海軍喺充裕嘅資金下持續擴張
去到1870年代
已經成為全球第三大艦隊
僅次於英法兩國
不過當全世界都水緊時就出晒事喇
喺1875年鄂圖曼嘅總外債超過2億英鎊
每年淨係還息都冇咗一半收入
剩餘嘅根本養唔起咁大支海軍
遑論其他日常開支
喺舊債未清新債又免問下
鄂圖曼唯一可以做嘅就係加稅
正確嚟講係加非穆斯林嘅人頭稅
喺苛捐雜稅下啲基督徒農民苦不堪言
跟住禍不單行慘事成三
1873年嘅旱災加上第二年又水災
做成大面積農作物失收引發飢荒
令鄂圖曼嘅財政雪上加霜
咁冇錢咯咪再大力榨乾啲異教賤民囉
喺顆粒無收又稅官臨門下
呢啲世代都被緊縛喺呢片土地嘅農民
就剩番一樣嘢可以做：移民反抗
1875年7月黑塞哥維那開始有基督徒農民攻擊穆斯林地主
暴亂迅速喺巴爾幹半島漫延
時任蘇丹阿布杜勒阿齊茲一如歷任蘇丹一樣
對呢啲農民起義血腥鎮壓
不過同佢祖先唔同
佢面對嘅唔再只係啲表面上勢孤力弱嘅平民喇

1867年巴黎世界博覽會
拿破崙三世最威威嘅時刻
歐陸最有權勢嘅君王齊集巴黎出席
其中圖右二嘅就係蘇丹阿布杜勒阿齊茲
能夠同呢啲咁重量級嘅人物平起平坐
法國的確係畀足面呢位最大嘅債仔
不過有邊個會諗到唔夠十年
呢位風光一時嘅蘇丹
會因為國家破產而畀人趕落台再被自殺呢
圖右一係比利時嘅利奧波德二世

嗰時喺俄國嘅宣導下
泛斯拉夫主義喺整個巴爾幹半島已經深入民心
再加上眼見意大利同德國都可以成功統一
佢地都好想可以有一個斯拉夫版嘅薩丁尼亞或者普魯士咁嘅區內強權
可以統領斯拉夫人建立同列強分庭抗禮嘅強國
喺泛斯拉夫主義加持下
呢啲官迫民反、抗稅抗暴嘅反抗
即時昇華成民族起義
巴爾幹半島嘅暴亂此起彼落
而鄂圖曼嘅鎮壓亦越發血腥殘暴
例如1876年保加利亞嘅起義中
鄂圖曼喺叛亂區係逐條村去屠
將啲叛軍同家眷插上木棍慢火烤成卡巴
唔關事嘅就剝皮活埋

卡巴示意圖

一如既往
玩到咁盡目的都係為咗殺雞儆猴啫
但係喺嗰個資訊開始快速流通嘅年代
咁做就有副作用喇
屠殺好快就經美國駐君士坦丁堡外交官傳去英法兩國報章
喺兩國留學嘅保加利亞裔學生
亦都紛紛投稿訴說家鄉正蒙受嘅苦難
咁樣就得到歐美群眾好大嘅反響
要求政府介入制止
不過英法兩國心知肚明唔插得手
因為一插手借畀鄂圖曼啲錢就凍過水
所以都係按兵不動睇定啲先

喺佢地猶疑之際最差嘅情況出現喇──
亞歷山大二世以支援佢嗰啲受苦受難嘅斯拉夫同胞為由
決定介入威脅要出兵
英法兩國心諗仆街喇
畀俄佬乘亂擴張喺巴爾幹嘅勢力固然唔掂啦
不過礙於民意佢地又冇辦法出面幫鄂圖曼
收到風後同樣屌晒鬼嘅仲有奧匈...
…喂巴爾幹你玩晒呀
話晒盟友喎你開餐唔叫埋我
嗱嗱嗱說話就唔可以咁講喇
三皇同盟著眼點係共同防禦
邊有講過其中一方主動揼柒其他人時
要預埋另外兩方一份㗎
吖講嘢咁撚串嘅你
於是奧匈就同德國佬投訴話俄佬唔摻佢玩
俾斯麥：

巴爾幹我冇興趣
你地要傾就自己傾唔好煩我
咁俄佬都費事節外生枝
喺1877年1月同奧匈簽定布達佩斯密約
承諾唔會喺巴爾幹建立斯拉夫民族嘅大國
另外事成後會畀奧匈吞併波斯尼亞和黑塞哥維那
以換取佢保持中立
喺攞到兩個fd子嘅「善意中立」壯吓膽後
俄佬就喺1877年4月24號正式開鄂圖曼拖
是為第10定11次俄土戰爭啦我都唔知點計喇
視乎你計唔計埋英法為主嘅克里米亞戰爭啦

呢隻歐洲病夫仲脆過脆皮雪條一打就冧
俄佬用咗十個月多啲就打到佢叫我唔打喇.gif
唔打啦嘛咁你同我簽咗佢

1878年3月3號俄土簽訂聖士提法諾條約
成份嘢一渣圍繞黑海同巴爾幹嘅地名就唔多講喇
最重點其實係呢幅圖：

鄂圖曼成立自治既保加利亞大公國
一個喺黑海同愛琴海都有港口、包含馬其頓呢個巴爾幹最具戰略地位嘅中心地帶、同以斯拉夫人為主嘅大國
可以預料呢個就係俄佬控制下斯拉夫人嘅普魯士
英國同奧匈見到咁
就攞住份嘢去質俄佬喇...
英國：我屌你呀你夠撚膽攞地中海出海口嘅話我肯定同你開拖
奧匈：仆街啦你呃尻我又話唔會喺巴爾幹搞斯拉夫人強權嘅
俾斯麥一睇到咁就諗今鑊大煲夾杰喇
三皇同盟其中一方聯同第三方一齊威脅自己盟友
咁肯定會拖埋我落水㗎喎
唔得要搵齊人過嚟柏林當面講清楚先
憑佢本身喺外交界嘅江湖地位
加上佢強調德國喺巴爾幹冇任何利益
可以充當公正調解者
佢成功喺1878年6月13號
拉咗英法奧俄意仲有幾個巴爾幹地方勢力同鄂圖曼嘅代表嚟柏林
三口六面拆掂佢喇