屋企人中左風，往穩定方向發展，有復健的可能嗎？好徬徨

屋企人70歲，平時行得走得，從來無諗過佢會中風
入左醫院，出血性爆血管。術後出現血管痙攣，再到缺血性中風，而家係深切治療部。

醫生同我傾左好返都會傷殘，好難過。
覺得離開先係解脫

一開始好驚好內疚，諗起佢忍唔住喊
慢慢調整已作最壞打算
但病情開始穩定，覺得命運對佢好殘忍，
無人會想訓床郁唔到，講唔到野
有冇奇蹟會復健到，情況差過以前，但最少可以自理。


（一直覺得安樂死先係正向 ，
睇新聞有親人了結個長期病患，已經夠慘仲要坐監，承受殺人既壓力。
吊住條命根本無意義，想死死唔到，個感覺好窒息好痛苦）

加油，祝平安 你都辛苦啦

我有朋友個屋企人係缺血性腦中風，佢咁岩係大腦語言區域塞左血管，所以語言能力變到好低，一粒字都講唔到，不過佢坐到輪椅半邊身郁到，唔洗完全瞓床，可以坐，但so far 半年都冇乜進展

好恐怖，頭腦清醒後突然講唔到野
點接受到 ！
我已經想像到，
我屋企人醒返內心一定埋怨點解救返佢

https://mindspa.pixnet.net/blog/post/104045500-%e4%b8%ad%e9%a2%a8%e8%88%87%e6%86%82%e9%ac%b1

中風後腦部情緒區域會受影響，右身中風會偏向沉默及負面，左身中風會偏向過度樂觀自信

要認清中風後性格改變係生理問題，唔係人格問題

係呀，我自己都覺得死左可能仲好，而家好似折磨咁半身不遂

之前有無年年body check?

可唔可以幫我問多d?
個病人大約幾耐先自己坐到，
係醫院物理治療後，幾時要出院?
因為醫生已經同我地屋企人講出院點安排,
咩療養院，老人院咁.....好心UP

復健應該無 係睇好幾多成

有無試過安宮牛黃丸
我阿婆兩次中風都係靠佢
不過都建議問下醫生意見先

急救藥 中風三十分鐘內食先有用

Mo-ibilsation

可以諗下針灸, 頭1個月做比較有用
去到呢個位試下都好

之前無中過風？建議你搵多幾個醫生問

我所知係可以練返受傷區域 不過70 歲就唔知

我而家已經唔奢望可以講到野,
只要唔洗鼻胃喉，可以自主郁到個身，坐到輪椅，行到少少路就好
我唔想送佢去療養院，係屋企點都舒服d。
但屋企無人可以平日睇住佢.....
如果去到被迫出院，可以點?
而家請菲/印傭都唔知有冇人肯做

如果用口食唔到野都係會落錯格肺炎
無限輪迴
用鼻胃喉食野就必須有24小時照顧者
最少轉下身、一日喂4-5餐奶
屋企人真係照顧到咩？
就算請左工人，啲洗費都好金，同埋工人都要學用喉仔喂
假手哂照顧俾一個工人又得唔得先？

同埋聽你咁講
佢依家都係訓床多，無能力自己轉身，
想坐輪椅都好困難，我諗你都唔好考慮佢行得返

安宮牛黃丸果個
對出血性中風係無用
出血性中風其實除左做手術都係復健
呢個年紀應該好有限

如果佢連野都講唔到
應該好難唔用喉食返糊仔
如果屋企人無辦法同佢做到最少4個鐘轉一轉身
好快又會生哂壓瘡周身爛哂

樓主你個case 有啲特別..
出血性同缺血性都齊晒....
我屋企人兩年前出血性中風,右邊身郁唔到, 但因為身體問題唔可以做手術.嗰時都係用藥控制..大慨係醫院住咗三星期, 照到啲血塊有自然吸收, 個人都開始清醒啲同啲手有小小反應,之後醫生問屋企有冇人可以照顧到佢, 睇吓可唔可以接出院. 當然如果你屋企冇人照顧就建議係醫院留耐啲..

出院第二日就即刻係帶佢去政府注冊中醫針灸, 針完第一次已經郁得返啲手腳, 嗰日返到屋企已經拎到碗同匙羹食飯,當然你唔好預好靈活先, 要不停keep 住做復健同針灸. 針咗第二次已經可以同佢去練習行路..

如果你屋企人出唔到院, 建議可以問吓醫生可唔可以安排東華嗰啲針灸..之前上網睇話中風後半年內針就最好..但我就覺得越快越好...

嗰啲咩牛黃丸只係缺血性中風有效..唔好亂食.

過來人.希望幫到你..

請問你屋企人右邊身郁唔到都出左院先？
當時講唔講到說話？
針灸完行到, 郁返好叻，你哋去邊間到針灸，想查詢下，唔該晒🙏

我屋企人仲係醫院，清醒，唔太理人，成日訓覺，我自己都好難受。
我都約左同醫院合作既博愛中醫，去醫院針灸，今個星期開始，醫師話針手腳先，到時先知情況會點

我屋企人嗰時好彩地兩個星期再檢查發覺血塊有自然吸收, 同埋醫生有安排物理自療. 手腳都有小小反應 (例如可以逮高小小但握拳冇力, 開頭拎唔到叉食嘢之類). 嗰時臨近過年, 醫生又見佢穩定, 所以就問我屋企有冇人照顧. 我嗰時有個工人同埋我啱啱quit咗工, 所以可以照顧到就帶佢出院. 佢嗰時講嘢都有d一舊舊同詞不達意, 但隨住血塊嘅吸收之後都正常返. 同埋你講得啱, 佢地出血中風後會成日瞓, 仲試過有幻覺話見到d神佛係屋企..嚇死我. 後尾會有改善瞓小d. 但如果有d年紀要預佢有機會記億會差dd.

我好明白你好難接受, 我屋企人嗰時仲要武肺冇得探病, 淨係可以facetime同最開頭未穩定時恩恤比我探過一次. 入院時已經簽晒DNR, 所以佢之後出返黎過嘅每一日都已經當係bonus, 雖然佢最近因其他病痛已經走咗, 但起碼唔會最後嘅日子係手腳唔郁得或講唔到嘢要長期瞓床先. 所以如果樓主你媽媽今次冇事, 盡量抽多d時間陪佢, 唔好比自己有遺憾.(雖然我到呢刻都未接受到屋企小咗個人, 但起碼最尾呢兩年多返d時間同佢傾計先...)

關於針灸, 我屋企人係醫管局南區中醫診所做, 都係因為住得近. 最記得上晝針完, 中午返到屋企已經可以拎叉食飯, 腳郁得多d..冇記錯係一個星期針兩次. 之後第2次針完就同佢去練行路. 一開頭行10步到..之後扶住佢就行得多d..同埋正常醫院會幫你book 復康自療之類, 但嗰時武肺長期冇位加上佢進展都ok, 所以最後都冇去過..
https://www.ha.org.hk/chinesemedicine/clinic.asp?lan=chi&cid=C15

希望可以幫到你, 加油!