外觀：
充電盒霧面磨沙表面，機蓋開合順滑，呼吸狀態燈，有一種高級感。
充電盒表面手感唔錯，但係唔太耐刮，用得耐避免唔到出現大量隱約刮痕。
有啲TWS耳機充電盒有排燈可以顯示電量，但XM5只有一粒燈，檢查電量冇咁直覺方便。
個人比較鐘意上一代嘅耳機設計，機械感重啲。今代耳機設計比較圓滑，增加左反光嘅部分，感覺上再中性左。
耳機體積比上代細粒，以配戴舒適度黎講，有所提升，雖然初初戴果陣都係有啲un耳，習慣咗之後就冇問題。
耳機本體有啲滑身，從充電盒取出時需要時間適應。
操控：
個人冇調整過觸控設定，預設左邊單點轉ANC/通透，右邊Play/Pause，觸控反應好快。
只係配戴時經常誤觸，呢一點有啲難避免。
電量：
個人黎講經常聽歌，暫時未試過聽到冇電，持航力個人黎講算係合格以上。(長開ANC，AAC編碼)
部分用家反映XM5有XM4嘅電池問題，個人暫時未遭遇過。
無線連接：
取出耳機戴上嘅時候已經連接完成，基本應有表現。
聽歌嘅時候去到某啲人群非常密集嘅地方(e.g.繁忙時間嘅地鐵站)，會有連接斷斷續續嘅情況，大型電器鋪都有機會出現問題。
一般情況下連接尚算穩定，個人日常使用未達到一個困擾程度。
但個人只有用AAC編碼，如果用LDAC嘅話，唔肯定情況會唔會更嚴重。
以定價超過二千蚊嘅TWS耳機黎講，連接穩定性實在需要改進。
調音程式：
功能全面，算易用。
連接後開APP，通常都要等一陣先讀到隻耳機，令到啲setting menu好耐先出現到。
ANC冇得較程度/Level，通透先有。
EQ preset冇一個岩聽，唔識手動tune EQ嘅話，”找到你的等化器”功能非常好用，只需要聽住歌去選擇佢提供嘅音色直到覺得滿意就得。
BASS level有獨立設定，呢個個人認為好重要，而且唔係款款TWS耳機APP都有。
跟機耳塞：
今代都係提供棉質耳塞，但今次呢款耳塞感覺上比普遍耳棉薄身，舒展性低，冇咁容易fit到耳道，除非size真係非常岩岩好。
耳塞表面有啲滑身，戴得唔夠入嘅時候，較容易跣出黎，特別係食野咀嚼果陣。
整體黎講，舒適度非常一般，隔音能力唔算突出，唔少用家都建議更換其他耳塞。
通話表現：
幾差，就算比較番一千蚊樓下同樣冇收音桿嘅TWS耳機，都冇佢咁差。
個人聽感：
解析力OK，音樂樂器同人聲有一定分離度，但音場唔算好闊。
調音音色偏暖，中低頻厚實，但低音唔係punchy果種，但算夠用，太重亦都可以較番細。
高頻表現一般，人聲比較靠後，未必滿意到偏好vocal嘅用家，聽pop都算ok，但聽A cappella/Opera果類未必理想。
ANC表現唔錯，耳壓感唔強，同馬路有一定距離嘅時候(12步左右)，基本上好靜，播埋音樂嘅話基本上察覺唔到噪音。
人聲過濾相對馬路噪音，表現上就冇咁出色。
通透模式幾好，夠用。
冇調過EQ嘅就咁聽嘅話，聽感好差，tune完就好好多，試聽嘅時候需要注意。
總結：
優點 – 音質中上，低頻表現理想，ANC表現優異，觸控反應快，持航力不俗，EQ調音方便且有獨立低音level控制，調音程式功能全面易用
缺點 – 貴，人聲表現一般，連接穩定性需要改善，跟機耳塞表現一般，通話表現較差
定價二千幾嘅TWS耳機黎講，未有一個驚艷嘅表現，只算係相對較好，各方面表現平均偏上。
如果同其他以性價比定位嘅耳機比較，而且以呢個價錢黎講，呢個表現做唔到一個明顯嘅分野。
