每個人屋企可能都總有啲睇唔順眼嘅核突礙眼位......
好似呢個咁,牆中間生咗兩格舊電位出嚟,唉~ 喺正個咁當眼嘅位,真係好un眼 🤦🏻♂️
遇到呢啲情況,DIY 新手最容易諗到嘅方法就係遮咗佢,
有人會揀掛幅畫、
有人會裝個布簾、
有人會揾個櫃遮住。
但係呢啲方法都有個缺點:礙眼位仍然存在!
過去無數嘅 DIY 經驗話畀我知,想遮住唔靚嘅位有時會更加令人想揭開佢,睇吓後面收埋咗啲咩,反而做唔到令啲礙眼位消失嘅目的。
咁...... 可以點吖?
對住礙眼位,我哋可以試吓用一個相反嘅思路,唔係去「遮咗」佢,而係「善用」佢吖。
好似今次咁,見到啲方格,我就諗起 Super Mario 遊戲入面啲方塊,所以決定利用原本平平無奇嘅白色膠蓋改造成 Mario 世界入面先有嘅方塊,從此間屋多咗個打卡位,哈哈~
想 DIY 整靚間屋嘅你,呢次經驗有咩你係能夠帶得走呢?就係當你見到屋企有啲睇唔過眼嘅位,可以諗諗有冇一啲元素係可以善用去變成你心目中想要嘅屋企,例如係結構、顏色,然後就可以開始你嘅 DIY 家居改造喇!
如果你都有心試吓 DIY,但係遇到難題唔知點樣美化間屋好,可以 click 入下面條 link,預約個免費諮詢,同你傾吓有咩你可以自己做,記得資料填得詳細啲,寫得太含糊,有機會被取消預約,留返啲位畀真正有需要嘅人。另外,諮詢內係冇嘢 sell 㗎,只係畀有興趣 DIY 嘅人可以就住你嘅問題攞到針對性建議嘅地方。
https://app.simplymeet.me/homebody
btw, 呢個係我 IG,對 DIY 有興趣可以 follow 我:
https://www.instagram.com/homebody_diy/