關於欺凌問題嘅冷知識、誤解、大集結

簡單講吓打依篇嘢嘅目的，出現嘅原因：
1. 唔少人對欺凌事件有唔少誤解，尤其對被欺凌者。
2. 適逢9月開學。
3. 好少類似整合文。
4. 了解多啲可以減少不必要嘅二次傷害。

關於欺凌問題嘅大部分疑問：
好多人會問：
1. 欺凌事件點解會發生？
2. 被欺凌嘅人係唔係有問題先會俾人噉欺凌？
3. 係唔係得罪咗人都唔知啊？
4. 被欺凌者嘅證供可信嗎？
5. 有冇咁誇啊？
6. 點解到依家都唔轉校啊？
7. 被欺凌者煩唔煩啲啊，搞咗咁耐......等等問題


======
我希望可以解答到你地嘅問題。我眼見唔知某啲人太幸福定其實根本就係欺凌者本尊，好似唔係好明被欺凌者角色，有好多誤會噉，所以我想釋除疑慮，就係咁簡單。


======
問：嘜嘢係欺凌啊？
1. 當事人聽得見範圍聲量下言語暴力。
2. 行動上嘅暴力。


======
問：冷暴力算唔算欺凌啊？
冷暴力可以係欺凌，不過相對其他欺凌，唔算好大問題。

因為埋唔到堆、夾唔嚟冇得勉強，唯有自我開解。如果係針對性帶頭叫人杯葛佢，咁肯定算係欺凌，不過相比其他言語同行動上嘅暴力，相對算溫和。

對99%欺凌者嚟講，冷暴力完全止唔到欺凌癮，冷暴力同言語暴力、行動暴力有抵觸，所以施暴者會揀後者過癮啲。所以冷暴力唔係討論重點。


======
欺凌者嘅特質：

1. 有壓力，未解決：冇渠道發洩內心情緒，或者特登用錯渠道。

2. 「聰明」友：取易不取難，最簡單緊係搵啲冇勢力、圈子入面冇乜朋友、反抗力度低。

3. 莫須有：揀人欺凌好多時唔需要有過節先得，欺凌者唔會咁有規矩。唔好自己諗唔明點解會發生欺凌事件就幫欺凌者搵藉口，加入埋一份欺凌人。

4. 欲加之罪：揀咗目標當然要安啲罪名啦。

例如評擊樣貌、身材、身體特徵、行為、黑歷史、有冇拖拍、腳毛等等。

基本上任何一個有或冇眼耳口鼻嘅人都適用至少一個罪名。


5. 當然要有想行動欺凌人嘅所謂決心啦。


======
問：關於追問同想知被欺凌者點解會俾人恰：係唔係被欺凌者有啲咩問題或者原因先搞到被欺凌？

你覺得啲欺凌者會搵完個原因先恰人咁有規矩嘅咩？

有啲人唔同意，覺得欺凌人係想佢成長。依個好明顯中咗欺凌人嘅特質：好鍾意為欺凌事件安個理由，而且個理由都幾無敵。

欺凌者好睇「可持續性」，多過去了解你同佢有冇深仇大恨。因為佢要嘅係發洩對象。其實好少被欺凌者係曾經得罪過佢，我之後會分析。


======
被欺凌者嘅特徵：

1. 你少friend(s)，埋唔到堆。

九成九專恰依啲。

欺凌者主要係貪玩、想發洩、想玩人，最易入手唔係啲普遍人都覺得乞人憎嘅人，而係啲反抗力弱、孤軍作戰嘅人。

2. 唔合眼緣。(欺凌嘅時候可以安依個同「外貌」有關嘅罪名，當中包括：身高、身型、身體特徵如髮型、樣子等等)

3. 行為有異。

4. 平庸的人。

你覺得以上依啲原因另類到要俾人欺凌？簡單嚟講，欺凌者係欺善怕惡。好多時，被欺凌者，十居其九都係善良的小人物。請好好珍惜同幫助依類人，佢地好似冇乜大成就，仲好似俾人感覺有啲蠢；但好多時，佢地都會係可以成為你身邊永遠善良嘅朋友。

據我多年觀察，通常佢地係揀啲埋唔到堆，少朋友嘅人嚟恰，其次先係啲唔合佢地眼緣或者行為有異嘅人恰。

古代到依家都一樣有欲加之罪、莫須有，好多時被針對唔一定有原因。

假設你係事主，俾人再次懷疑自己係唔係有問題先俾人恰，已經好諷刺。得唔到幫助之如仲要合理化欺凌問題，講到好似係你有問題先俾人恰。就算係又點，欺凌人嗰班比被欺凌者更加有問題，更加有過之而無不及。


======
邊啲人少啲機會俾人當作持續欺凌對象？

1.有勢力。

2. 多friend、埋到(強大)圈子。

3. 某方面有突出表現令到佢可以投靠。

4. 欺凌緊人嘅人。(完全唔建議，暫時性，你唔知你噉做，好多人會唔妥你？)

如果個環境入面你係以上嘅人，你好大機會唔會成為欺凌目標。你可以避開佢明刀明槍嘅持續欺凌，但都有機會遇到間唔中嘅暗箭。


======
問：如果你同欺凌者有一個深仇大恨，下場如何？

答：模擬流程如下：

你同欺凌者有牙齒印。
→欺凌者未開始攻勢如果已經知道你唔好惹，就會將啖氣發洩去替罪羊身上。因為可能同你鬥，得罪咗你，你去幫被欺凌嘅人，會搞到佢冇得再欺凌人。(End：你冇事)

→如果唔知你底細，會試探。
↘同你當面互鬧。
↘如果你冇反抗，或反抗力弱、孤軍作戰，就會成為長期被欺凌目標。(End：你成為佢持久目標)

→如果你有一個圈子、同佢平分秋色。通常大家互鬧完，就各自喺自己圈子數臭對方。之後未來嘅日子，冤家路窄，就互鬧、或者眼超超、扮見唔到。
↘基本上你唔會成為佢欺凌對象，不過佢會將對你嘅不滿發洩去佢嘅長期被佢欺凌目標。(End：你冇事)


======
問：關於叫被欺凌者轉校問題。
答：轉校唔係想像中咁易。唔會教育局、學校、教師八方支援。

第一：佢地覺得最好嘅話就係想你地自己解決。老師聽校長校董之類大人物話，單人之力好難做到嘢。局方就想學校自己處理。

第二：基於第一點，轉校已經唔容易。

1. 冇人幫。學校唔想依方面出名，而局方可能冇記起你。

2. 俾人搞到缺席率咁高，你會覺得其他學校唔知頭唔知路會請佢？佢地唔會主動接觸、了解每個轉校生。

3. 俾人搞咁耐，你會覺得被欺凌者成績會好好嗎？噉嘅環境讀得好已經好叻，讀得唔好但繼續讀落去都已經好犀利。

仲有啲我地唔知嘅收生準則、閉門羹、留班、需要跨區到老遠番學、自修、等運到等等。你以為咁易，哈！

未搵到學校之前：一對一zoom，享受乎？老師黑你面、「一對一針對性照顧你不同需要」，爽乎？


======
欺凌幾部曲：

現實生活遇到不同形式嘅壓力，包括學業、家人、同其他人有過節、以及其他生活壓力等等。

↘得唔到正確嘅宣洩渠道，包括不利同有過節嘅人交手(自覺交手都係平手，或者不利交手)

↘搵替罪羊(被欺凌對象)渲洩以上所有情緒、壓力。

↘被欺凌對象條件：埋唔到堆、環境入面冇圈子、少朋友、反抗力度低 (以我觀察，通常有9成欺凌個案，被欺凌者都係唔知發生咩事，無啦啦就發生被欺凌事件。原因可以分析到，佢地要搵嘅唔係仇人，而係可以俾佢地長期欺凌嘅對象)

↘依啲欺凌者搵完對象，當然係要交下手啦。交手之後發現被欺凌者反抗力度有限，就會被認定適合作持續欺凌對象。

↘確認咗「獵物 (欺凌者就算見到你喊，佢地都冇當過你係人，唔會理你心情) 」可以被繼續施以言語暴力及行動暴力，就要合理化件事。當然係安個罪名啦，最大路就係話佢個「樣、外觀(身高、肥瘦、其他身體特徵)、行為有異」。嗱，通常依啲罪名仲有唔少「懵丙」會聽聽下又覺得似層層好合理，就支持欺凌事件，有啲仲參與其中添。各位如果有觀察力，其實會發覺依個世界真係有唔少「懵丙」，欠缺分析力，然後繼續幫「無賴」 (欺凌者) 宣揚被欺凌者有以上問題。

(補充：「樣、外觀(身高、肥瘦、其他身體特徵)、行為有異」依啲罪名安喺任何人身上都會適用。如果唔係，啲「懵丙」就唔會信埋一份。古時到依家都一樣有欲加之罪、莫須有，就知幾正常嘅嘢，都可以係罪名。)

↘解救方法：自己夠癲搞到對方怕咗你、等人解救 (你眼望我眼，睇下邊個最快忍唔住出手解救)。

↘如果係自我解救之後，通常欺凌者會唔忿氣，就會用言語攻擊作尾聲，唔會再用行動暴力。不過言語暴力嘅時長因欺凌者而異，都係睇佢地心情。佢地通常會講：「佢好大力、佢唔好惹、佢好得人驚」之類，務求攞番個尾彩；或者係因為佢地唔認輸，覺得輸咗，所以要繼續糾纏吓。

↘然後佢地就會搵下一個目標，到搵到下一個目標，就唔會再咁得閒纏繞上一個目標。

→除非得到教訓、後果，否則欺凌者唔會覺得欺凌行為有幾嚴重。你要知道，依類專門揀無深仇大恨弱者嚟欺凌嘅欺凌者，係好「聰明」，好識玩嘢，同埋係比您想像中「無賴」。


======
心聲：

1. 多啲珍惜同幫助被欺凌者。大部分被欺凌者其實內心比好多人更加善良。縱使佢幫唔到你啲乜、冇共同話題，但同佢相處你唔會感到有壓力、有防備。難道依啲就唔係比正常人更正常嘅表現？

2. 唔好再做幫兇。點解有一批人咁鍾意幫欺凌者搵個理由合理化欺凌行為？

我有理由相信依啲「幫兇」係欺凌者主角，又或者係其他欺凌案主角同埋潛在欺凌者。其次就係冇分析力嘅人。

3. 如果有啲人對我所講嘅嘢都仲係好想反駁、好唔明，噉好明顯依啲人好有潛質做「無賴」、「啊丙」、「欺凌者」，同埋我已經威脅到佢地嘅利益。佢地好有可能依家都仲欺凌緊人，而我噉講，好明顯對佢地好不利同不安，所以佢地又想作故仔合理化佢地嘅欺凌行為。

4. 給「聰明」嘅欺凌者：
適逢開學，我希望欺凌者唔好再得寸進尺，見好就收，聰明嘅人應該知繼續做唔會輕鬆。你糾纏當事人都冇意思，佢都冇得罪你，只係你覺得玩夠就收好樣衰。其實噉樣唔會真正開心。

5. 我希望某部分人唔好做啲落井下石嘅行為。其實我都好懷疑啲識得留言而又已經係成年人唔會未見過身邊有欺凌事件啩？我好懷疑某啲人平時係欺凌者、潛在欺凌者、或者係平時一向事不關己、慣咗扮睇唔到嘅人，但又手持投石器而不自知。

我都遇過啲欺凌者，只要肯改過，冇再做，我都唔會提起過去。

Karen喺連登算唔算被欺凌🤔

如果想鼓勵俾曾經或依家嘅被欺凌者，簡單留個名就得。

如果有咩唔啱聽，可以出番去，我唔會覆，因為冇乜討論空間。

只係唔想啲人落井下石，先有依篇嘢。唔係想討論，所以一律唔覆。

如果有需要改正，可以覆此層。

冇咩事我出番去，如果有需要歡迎轉載，列明出處更加理想。

如果有普遍人都覺得唔好嘅評論，可以負評＋Block，唔使覆佢。

你講漏左
被欺凌者嘅身體質素同父母職業都係原因之一

叫佢哋唔好比人知兩老做咩好過

支持關注

其實我內心係好想多啲人接收依類資訊，但係可能擺錯台，好快沉底。

為咗多啲人接觸、支持吓，熱鬧啲：

歡迎大家講下讀後感，或者睇法、經歷都得，圍爐取暖。

更正：有需要我都會覆下。如果好似有啲離題、脫離本意，就應該唔會覆喇。主要係想互相扶持、抒發、減少誤解，唔係好想增加矛盾。

麻煩大家如果覺得值得一推，幫手推一推。

見你第一個發言，破例覆你啦。

研究吓先...嘟嘟嘟...叮！

「Karen太出眾，已經超出大數據嘅分析範圍。」

我諗Karen嘅事蹟GDP都難以定奪。

咁如果被欺凌者走去反擊，但係結果互相報仇冤冤相報又冇一方肯停手，程度可能仲越搞越大，老師社工都阻止唔到，校又轉唔到，咁點算好，就算報埋警出到嚟，又會係唔犯法嘅程度內繼續搞大家，呢個時候點做好

好問題，我都想分享吓，可能有啲幫助。

以下方法，旁觀者同被欺凌者都可以試下。

以下人物假設：“你” = “被欺凌者角色”

我首先講吓欺凌者心理 (例如欺凌者需要乜、欺凌者驚乜、有乜嘢係被欺凌者最好唔好抵觸)，然後詳細講你可以點做。理論上都可以不以暴易暴、不流一滴血制止到欺凌者嘅行為。

其次會分享自身經歷，噉冇咁悶又可以參考吓。


======
欺凌者佢地需要乜：
其實欺凌者要搵嘅唔係得罪過佢地、佢地唔妥嘅人，當然唔妥更好，發洩多一樣。佢地係要搵一個反抗力弱、孤軍作戰嘅人作長期欺凌對象，以宣洩生活壓力。欺凌對象要係一個可以俾佢地作長期欺凌為宗旨，而唔係世仇。

======
佢地會驚乜：
驚冇得長期欺凌，即係你已經唔再好恰。同埋佢地永遠都係「取易不取難」，只要你做到令佢覺得你唔易恰，好難再玩落去，佢會寧願簡第二個落手，唔會再同你糾纏，或者係攞番個尾彩，言語暴力一段時間就會落幕。

======
有乜嘢係被欺凌者最好唔冇抵觸？

千奇唔好當眾落佢面。落佢面，贏同輸，佢都係死糾纏你，佢要攞尾彩、唔忿氣、同埋你會真真正正由一個冇得罪過佢嘅弱者變成威脅到佢自尊嘅仇人。你落佢面，即係佢已經俾其他人睇到佢蝕底，佢更加冇情講，已經蝕底，緊係搞下你。

所以，你想擺脫佢，你要令佢地知道「你已經唔好恰、恰你仲衰過唔恰、恰你冇著數」。同埋，你千奇唔好當眾落佢面：你唔落佢面，佢會選擇知難而退；你落佢面，佢唔會俾你安落。所以結論係你要私下對決，揀少人知嘅時機俾佢知道你唔好恰。


======
有個完美嘅方法，嘅唔落佢面，又俾佢地知道你唔好恰，更重要嘅當然係要令佢地知道恰你下場仲慘，噉佢就永世唔再恰你，仲對你恭敬添。

佢點解會180度轉變：
1. 你根本從來都冇得罪過佢。
2. 佢恰你只不過係因為你唔識反抗，適合做長期欺凌對象。
3. 佢唔係蠢，佢從來都係有三個重點：「可持續欺凌」、「取易不取難」、「唔可以(當眾)落佢面」。

只要你唔好搞到已經俾佢最唔想嘅人知佢嘅欺凌行為，而你又令到佢知道你係超級認真唔易恰，而佢又冇受到傷害，噉就可以解決；以後唔恰你，仲冇對你有仇念，可能仲恭恭敬敬。

======
我有一個方法，親自試過，應該好大機會work。被欺凌者同想伸出援手嘅旁觀者都可以試。

首先，你要準備一啲嘢，就係幫欺凌者準備「列有罪證嘅承諾唔會再犯信」。

講吓封信啲技巧，可以參考吓：
1.1. 假設你係被欺凌者：一式一份(三個欺凌者就總共準備三份)
1.2. 假設你係旁觀者：一式兩份(一份俾被欺凌者，一份你自己keep)(三個欺凌者就被欺凌者keep三份，你自己keep三份)
2. 內容上文係列咗啲罪證 (唔駛一定要列嗮，記到幾多，寫幾多，或者抽啲嚟寫都得)。
3. 內容下文係我XXX唔會再犯......。俾佢地簽名＋等佢地知。(如果重犯，我地可以將依封信俾老師)

然後，準備好嗮信件，就帶番學校先。然後到小息或者午膳，唔係多人嘅時機，帶住封信，走去佢身邊。然後你要好激動噉講 (其實都唔駛演技，因為好難唔激動)：「你同我簽咗佢，如果唔係，我就會講俾X老師」 (有威嚴嘅老師知，冇有威嚴嘅老師就話搞大佢、報警之類)。

基本上，佢唔係蠢，佢有衡量過，佢會簽。

然後，你就話，如果你再做依啲欺凌人嘅行為，就會將封信交俾X老師、警察、公告天下(諸如此類)。

基本上，你冇落佢面、佢知你唔好恰、佢又冇受傷、而且佢本身係因為你好恰先恰你，而唔係本身有仇，基本上佢對你態度180度轉變。就算唔180度轉變，佢係「取易不取難」、「欺善怕惡」、「搵嘅係長期無反抗力欺凌對象多過仇人」，所以佢可能會言語暴力幾日，發洩完攞個尾彩就對你收手。簡稱好來好去。

以上方法旁觀者都可以用㗎，旁觀者用可能更好，因為被欺凌者未必有咁大勇氣一下子變得堅強，同埋未必控制到情緒。

如果處理得好，可能可以令佢一段時間都唔敢欺凌任何人。

其實大家都會好唔妥欺凌行為，只係搵唔到機會有萬全反擊，而又雙方都明節保身，所以個個都按兵不動。只要你「嚇到佢，而且令佢信你真係認真 (當然你都係真係認真想揭發先得，俾人噉恰，或者見住人噉俾人恰，一定做到，其實唔使演技)、恰唔過、恰你會蝕大底」，佢(地)就會唔敢再惹你。


======
如果用硬碰同佢鬥，鬥贏鬥輸，佢都會攞尾彩。同埋就算你贏咗，你影響倒佢再搵長期發洩對象，佢一定死纏。鬥輸下場就係變本加厲。


======
自身經歷：

我班入面見過有三個同學欺凌一個同學。嗰個被欺凌者，好正常，我都諗唔明 (其實都係我嘅朋友嚟)。可能佢有打機但成績幾好掛。但係呢，另外嗰三個好似成績都好好。

欺凌者本身都有班fd，被欺凌者又有班fd，可能大家係共同fd圈子，其他人唔敢得罪佢地掛。其實我都係冇即時干預，冇得話人，我都唔想干預住。

之後冇人幫幾個月啦。其實睇邊個忍唔住幫姐。之後我就幫佢地寫埋承諾信，叫佢地簽名，然後話再犯就將「記錄咗欺凌事蹟嘅以後唔再犯承諾信」講俾老師聽。

經此一役，佢地冇再犯，而個被欺凌者下半年以至之後都有好多朋友 (其實本身都同人關係OK，只係冇人敢做第一個幫)，就知其實被欺凌者唔一定係有問題、有原因先俾人欺凌。

(欺凌者本身都有班fd，被欺凌者又有班fd，可能都係共同fd，唔敢得罪佢地掛。其實我都係，冇得話人，我都唔想干預住。)


→以上經歷有少少微調更改，務求唔會俾人認到任何角色，亦保證難以追查。
→過咗去我都唔會講番人地黑歷史，所以都會微調、唔提任何識別到身份等等嘅嘢。
→過程大致係噉。封信都扔嗮，憑記憶大致講吓有依三個重點。


題外話：
因為我嗰次事件之前(再細個啲嘅時候)曾經試過搞到欺凌者坐老師隔離......

不過嗰次3對1都係忍唔到，處理手法純熟咗，親測唔使老師就搞掂......。不過3對1之後，即升班之後都有其他欺凌事件，不過都係冇嘜採取直接干預......。


======
重申講吓封信啲技巧，可以參考吓 (假設你係旁觀者想幫人)：

1. 一式兩份(一份俾被欺凌者，一份俾自己keep)(三個欺凌者就被欺凌者三份，我三份)

2. 內容上文係列咗啲罪證。(唔駛一定要列嗮，記到幾多，寫幾多，或者抽啲嚟寫都得)。

3. 內容下文係我XXX唔會再犯......。俾佢地簽名＋等佢地知。(如果重犯，我地可以將依封信俾老師)

如果係已經搞到咁大，真係你所講嗰啲，其實幾難搞，佢已經咁偏激。我覺得只可以佢搞到大家一次就報案一次。冇辦法，只可以噉樣。咁激嘅話只可以情願嚴懲或者搵方法提高社會大眾關注事件。

識反抗真係好重要

係啊，最難係依樣，仲要做到出嚟，一take pass好有難度

之前答得唔好，冇覆到問題重點。以下會答得扣題啲。

被欺凌者反擊通常都唔會想纏擾咁耐，搞咁耐應該會冇癮，唔會想反擊咁多次，主要都係睇欺凌者點諗。

如果去到依種情況，欺凌者心裏面係唔想放過被欺凌者；而被欺凌者淨係想解決問題。

如果一直糾纏，被欺凌者應該好少會想選擇言語同行為攻擊番人，通常人地唔再撩佢，佢唔會撩番人。

所以，如果有得揀，被欺凌者一定會選擇其他方法阻止再被受滋擾，而唔係想正面衝突。

所以，一切都係欺凌者做主動角色，可以選擇幾時停；而被欺凌者就比較被動。

但通常去到噉，要等欺凌者停都要好長時間。被欺凌者可以做以下依啲：
1. 報案。
2. 提高社會大眾關注事件。
3. 搵辦法將請願信交到去特首上。(經過林鄭政府親測，特首嘅權力係好強勁的，不容小覷。) (特首如果解決到件社會關注度高嘅事件，可以大大提高管治威信)

最好請願信幫佢地諗埋可以點處理，但唔好太難度高。例如修例嚴懲依啲高難度動作。

可能寫下啲：
1. 禁制令；
2. 定期警署報到；
3. 唔可以再滋擾被欺凌者；
4. 有阻嚇性刑罰。例如如果欺凌者做唔到以上幾點 (1至3點)，就立即要被拘禁，最好係以年計。佢唔再犯就唔使坐監，犯一次坐一次，一次比一次坐嘅年數耐；噉俾到佢有選擇嘅權利，唔係一嚟就坐監。

特首如果有(得到)可行方法，又解決到件社會關注度高嘅棘手問題，增加民望之如又可以提升管治威信，百利而無一害；或許會伸出援手幫到事主。

*GPT

你寫點處理嘅1234都好脫離現實

唔係潑你冷水但我中學都係花生友見過好多年欺凌

你有冇深層次咁了解99%欺凌事件發生嘅時候，都唔會有人主動去幫被欺凌者？

99%都只會係花生友

我其實對於香港教育界過咗咁多年但係都對校園欺凌事件嘅處理豪無改善感到極度失望

啲有問題嘅學生離開校園進入社會其實都係隱形炸彈，社會最後都係要suffer但cost

不過成個社會都係wfc ，然後你話要喺中學比人欺凌嘅時候要告上特首，除咗堅離地我都唔知應該講咩好

樓主中學欺凌過我
踩我書包
扔我盒飯落垃圾桶
笑我係單親家庭
仲搵佢男朋友黎打我
你做過呢d事都仲敢出黎開post講欺凌

叫佢哋同老豆老母講問驚務處拎多幾個防狼器

More detail

以前讀書見過D欺凌者/受害者例子 當係比D例子大家一齊討論, 只可以話有D例子可憐之人或者有可恨之處, 但做欺凌者一定係仆街食屎狗

第1種係最無辜, 因為聽到欺凌者有跟大佬, 主動怕左佢(主動讓佢, 甚至逃避佢), 欺凌者覺得有滿足感好就開始欺凌佢, 恰佢原因單純係覺得好玩

第2種原因係妒忌, 一開始2位女同學爭仔, 爭嬴果邊開始俾爭輸果邊欺凌, 由於個男仔真係幾受班上面女同學歡迎, 其他女同學出於妒忌或者怕左大勢力都會加入埋一份, 先係帶頭杯葛, 趁佢唔係到畫花佢本書/張枱, 最後就係將D食剩既零食/小賣部熟食倒落佢個位/書包, 恰到個女仔最後轉左校,

第3種係報復, 中三果年有個同學轉左班, 大概係佢家長投訴格離班成班同學欺凌佢, 最後學校將佢調黎我地班, 同時好似話唔俾格離班任何同學再接觸佢; 岩岩開始大家都收斂既, 後面發現呢位同學原來有條打小報告癮, 上堂會Mark低邊個同學做過D咩野, 放學D人差唔多走哂就會向班主任篤哂D人出黎, 老師其實知咩事通常會叫佢顧好自己, 之後佢就會話騷擾到佢 (就算果位同學上堂訓教, 佢都會話影響到佢上堂), 再唔理就叫佢父母投訴老師不負責任, 搞到老師逼不得已只好罰犯規果D同學, 最後我地成班都一齊杯葛佢, ,而且有D火爆衝動撚係做過D過份既事, 最後呢位受害者中三畢業就轉左學校

最後係宣泄, 欺凌者同時係愛害者, 姐係28座大王果D, 俾高form恰完, 就係同級搵同黨, 再搵D冇乜朋友既同學黎出氣, 畢業之後我聽朋友講返先知, 原來佢俾高form果D打完, 同日佢就會搵返人黎發泄, 佢交左幾多保護費, 果日就會周圍搵同級收返保護費, 如果你唔係俾佢恰果個會覺得佢幾好傾幾nice, 欺凌人應該純粹係唔甘心自己俾人欺凌

讀書果陣親身見過都係呢幾種人

被人排斥，杯葛算唔算？

算https://www.edb.gov.hk/tc/teacher/student-guidance-discipline-services/gd-resources/anti_bullying1/index.html

間 接 的 欺 凌 - 例 如 造 謠 、 蓄 意 不 友 善 、 無 視 別 人 的 存 在 、 孤 立 、 杯 葛 或 排 擠 受 害 者 等

不過 讀書果陣係有個同學鐘意mark小器簿同老師篤灰, 最後成班當佢透明, 自招欺凌

回應99%都會係花生友問題：冇人敢幫，尤其係欺凌者同「架兩」本身係識。大家三五識七嘅話，幫手都好啲。如果係識嘅話，對方(欺凌者)會大啲機會更加怪你，或者針對你。其實我大部分時間都係花生友。好嚴重先諗下點幫。

情景題嘅回應內容問題：我諗唔到其他方法解決。

要去到雙方都離開咗局住相處嘅地方咁長時間都仲要糾纏咁耐，一定有其中一方比較執著。比較唔執著嗰方其實自己一個人做唔到啲咩，尤其被纏擾住，唔可以奢望被纏擾嘅日子係舒服、過得去，長期精神折磨都已經唔易搞；只能夠提高人地(局方／大眾)關注。

我諗起韓國素媛案，個性侵者(性侵過程極度兇殘)出獄後仍然大無私樣特登搬去受害人附近住。

有啲人唔係咁易就可以擺脫到......

======
其實我都認同某部分欺凌者處理得唔好會對社會或許有禍害。其實某部分欺凌者，對社會造成嘅問題整體係大過有可憐之處嘅被欺凌者好多 (或被針對者，#20嘅第三種case)，因為某一類欺凌者好識玩，佢地會針對某少數人，可能一兩個。佢地唔理人感受之如仲會有想害人嘅心，而且係冇被佢針對嘅人唔易察覺佢係噉嘅人 (類似雙面人噉)，比較蠱惑。加上就算搞到人幾慘都唔會動惻隱之心，依類先最難搞。

多謝分享，依幾類都好典型

第二種好似久唔久都聽聞過

第三種必有可憐之處，我都見過。不過你講嘅犀利啲，會主動影響到人。我遇過嗰啲係冇衛生意識／懶／其他習慣或者性格，依啲其實可能佢本身就係咁，唔係主動惹人，保持距離就得，唔會點影響到 (雖然長時間局住接觸都會好被影響)。但比起有心特登做啲行為影響人，其實好小事。你講嗰位唔知係唔係原本都係自己搞到乞人憎先比人，定係俾人欺凌過先噉。依類係幾影響人同氣氛......

我以前太天真太無知，有次小息時老師叫我去洗樓式睇下邊班用緊電腦(娛樂、睇片)，我記咗一次高年級。做咗一次小學雞行為。好彩之後醒覺，痛改前非